Atong Luna
Unsaon sa Pagbaton og Limpyo nga mga Hunahuna
Kadtong kinsa makakontrolar sa ilang mga hunahuna nakabuntog sa ilang mga kaugalingon, miingon si Presidente Boyd K. Packer, Presidente sa Korum sa Napulog Duha ka mga Apostoles.1 Usa sa mga paagi nga makontrolar ang inyong mga hunahuna mao ang pagpili sa paborito ninyong himno ug magbaton og litrato sa templo. I-display ang litrato diha sa inyong kwarto. Sa matag higayon nga kamo makakita og tawo nga dili tarong og sininaan, ribyuha og maayo ang himno diha sa inyong hunahuna o hunahunaa ang templo. Kon ang inyong dili maayong mga hunahuna dili mawala, pag-ampo ug pagpuasa aron makalimtan kini.
Joseph D., edad 20, Haiti
Ayaw Pagpakawala og Paglaum
Usa sa mga pagsulay nga gisagubang sa among pamilya mao kadto dihang ang among kinamagulangan nga lalaki nasakit, ug sa pagkataud-taod namatay. Lisud gayud kaayo kadto sa sinugdanan alang kanamo, apan ang among pamilya nakalatas ra niana nga pagsulay. Tungod kay ang among pamilya nabugkos sulod sa templo, nahibalo kami nga among ikauban ang among igsoon pag-usab ug ang Langitnong Amahan ug si Jesukristo inig abut sa tukmang panahon.
Nahibalo ako nga kini nga pagsulay mao ang usa sa mga pamaagi nga giandam sa Ginoo kanamo alang sa ubang mga pagsulay—sa paghimo kanamong mas lig-on. Ang tanan adunay mga pagsulay nga sagubangon, ug ang atong Langitnong Amahan nahibalo nga mabuntog ra nato kini. Busa dili kita magpakawala sa paglaum.
Carmila R., edad 18, Southern Tagalog, Philippines
Daghan ra Kaayong mga Balaod?
Sa miaging tuig nagtuo ko nga daghan ra kaayong mga balaod sa Simbahan, ug nahunahuna ko, “Unsaon man sa pagka-alegre sa langit?” Akong gibati nga hinigtan sa Simbahan ug imposible ang paglingkawas.
Dayon akong gipanid-an ang kinabuhi sa akong mga higala. Nganong wala man ko moagi og sama sa pipila sa ilang mga pagsulay? Usa ka gabii akong naamgohan—wala akoy problema sama kanila tungod kay akong gisunod ang mga balaod nga gihatag sa Langitnong Amahan alang kanako. Usab akong nasabtan nga kon inyong sundon ang mga balaod, magmalipayon kamo ug makapalambo og pamilya ug makapuyo uban sa Langitnong Amahan ug ni Jesus sa kahangturan.
Stephanie H., edad 13, Utah, USA
“Mga panda … check. Mga baboy … check. Mga porcupine …”
Paghulagway pinaagi ni Val Chadwick Bagley
Litrato sa Templo sa Salt Lake pinaagi ni Craig Dimond