E tae atu i te taime e farerei faahou ai tatou
Te ti‘aturi i te taraehara
No roto mai i te hoê a‘oraa i hohorahia i te hoê pureraa i Brigham Young University i te 4 no novema 2008. No te a‘oraa taatoa i roto i te reo peretane, a haere i ni‘a i te itenati speeches.byu.edu.
E ti‘a i te ti‘aturiraa ia haamauhia eiaha i ni‘a noa i te ite e i te iteraa papû, i ni‘a atoa râ i te faaohiparaa i te taraehara no te taata iho.
Ua farerei au i te mau taata tei mo‘e roa te ti‘aturiraa. Ua feruri ratou e, te tatarahapa, eita ïa e maraa ia ratou, e te faaoreraa i te hapa, eita e roaa ia ratou. Aita teie mau taata e maramarama nei i te mana tamâ o te taraehara. E aore râ, mai te mea e, te maramarama nei ratou, aita ïa ratou i ite hohonu i te auraa o te mauiui o Iesu Mesia i Getesemane e i ni‘a i te satauro. No tatou paatoa mai te mea e, e faaru‘e tatou i te ti‘aturiraa ia tamâhia to tatou oraraa, te patoi ra ïa tatou i te hohonu, te mana e te aano o To’na mauiui no tatou.
Tau matahiti i ma‘iri a‘enei ua tonohia vau i te hoê amuiraa tĭtĭ, ia uiui i te hoê tane e 21 matahiti no te haapapû i to’na ti‘amâ ia tavini i te hoê misioni. I teie nei, aita te Hui Mana Faatere Rahi e uiui i te mau misionare e faaineine ra. No reira, e mea taa ê rii teie mea. A tai‘o ai au i te tahi mau faaiteraa no ni‘a i te mau tumu o ta’u uiuiraa, ua mauiui to’u mafatu. Ua rave teie tamaiti i te tahi mau hara rahi. Ua maere au no te aha vau i anihia ai ia farerei i te hoê taata mai teie te huru, oia hoi, e ere ïa i te ohipa matarohia na’u ia horo‘a i te parau faatia ei misionare.
I muri a‘e i te tuhaa pureraa no te po Mahana Maa o te amuiraa, ua haere au i roto i te piha toroa o te peresideni tĭtĭ no taua uiuiraa ra. A tia‘i noa ai au, ua haere maira te hoê taure‘are‘a nehenehe e te hi‘oraa maitai. Ua uiui noa vau e, e nahea vau i te tatarahapa i te mea e, e mea papû maitai e, ua hinaaro oia e paraparau, e e farereiraa hoi ta’u e te hoê taure‘are‘a fifi roa. I muri iho ua faaite maira oia i to’na i‘oa. O’na ïa taua taure‘are‘a ra ta’u e tia‘i ra.
I roto i te mo‘emo‘e o te piha toroa, ua ui noa’tu vau hoê ana‘e uiraa: « No te aha vau e uiui ai ia oe ? »
Ua faatia maira oia i to’na oraraa i mutaa ihora. Ia hope ta’na faatiaraa, ua hamata a‘era oia i te faataa mai i te mau taahiraa e te mauiui ta’na i farerei . Ua paraparau maira oia no ni‘a i te taraehara—te mana hope ore o te taraehara. Ua faaite mai oia i to’na iteraa papû e ua faaite i to’na here i te Faaora. E ua na ô maira oia e, « Te ti‘aturi nei au e, ua nava‘i te mana o te mauiui o te Faaora i Getesemane e To’na tusia i ni‘a i te satauro, no te faaora i te hoê taata mai ia’u te huru ».
Ua putapu vau i to’na haehaa e i ta te Varua faaururaa, no reira, ua parau atura vau e, « Te tuu nei au i to oe i‘oa ia tavini oe ei ti‘a no Iesu Mesia ». E ua parau atura vau e, « E ani au ia oe hoê noa iho mea. Te hinaaro nei au ia riro oe ei misionare maitai a‘e i roto i te Ekalesia taatoa. Ti‘a râ atu ai ».
E toru e aore râ, e maha ava‘e i muri mai, te paraparau ra maua te Tuahine Edgley i roto i te hoê pû haapiipiiraa misionare. I te pae hopea o te pureraa, te farerei ra vau i te mau misionare a ite atu ai au i te hoê taure‘are‘a matauhia e au.
Ua ani maira oia e, « Te haamana‘o ra oe ia’u ? »
Ua huru haamâ rii au, e na ô atura vau e, « Eiaha oe e inoino mai. Ua ite au e, ua matau vau ia oe, tera râ, aita vau e haamana‘o nei ».
Na ô mai nei oia e, « E faaite atu vau o vai au nei. O vau te misionare maitai roa a‘e i roto i teie pû haapiipiiraa misionare ». E ua ti‘aturi au ia’na.
Ua niuhia te ti‘aturiraa o teie taure‘are‘a eiaha i ni‘a noa i te ite e i te iteraa papû o te taraehara, i ni‘a atoa râ i te faaohiparaa i teie horo‘a i ni‘a ia’na iho. Ua ite oia e, no’na iho teie horo‘a ! Ua ite oia i te mana o te taraehara e i te ti‘aturiraa ta’na e horo‘a i te taime ua mo‘e te mau mea atoa, e aore e ti‘aturiraa faahou.