Te taraehara e te tere o te tahuti nei
No roto mai i te hoê a‘oraa i roto i te hoê pureraa i Brigham Young University i te 23 no atopa 2001. No te taatoaraa o te papa‘iraa na roto i te reo peretane, a haere i ni‘a i te itenati, speeches.byu.edu.
Na te mana o te taraehara e haapuai ia tatou ia rave e ia riro ei taata maitai e ia tavini na ni‘a atu i to tatou iho hinaaro e to tatou aravihi.
Ta opuaraa rahi o te evanelia a te Faaora ua puohuhia ïa e te Peresideni David O. McKay (1873–1970): « Te opuaraa o te evanelia o te … faariroraa ïa i te taata ino ei taata maitai, e te taata maitai ei taata maitai atu, e te tauiraa ho‘i i te natura o te taata ».1 No reira, te tere o te tahuti nei o te haereraa ïa mai te ino i te maitai e i te maitai a‘e, e te fariiraa atoa i te tauiraa rahi o te aau no te taui i to tatou huru hi‘a (a hi‘o Mosia 5:2).
Ua riro te Buka a Moromona ei buka arata‘i na tatou a ratere ai tatou na ni‘a i te e‘a mai te ino e haere ti‘a‘tu i te maitai e i te maitai a‘e, e a rohi ai tatou ia taui i to tatou aau. Ua haapii te Arii Beniamina no ni‘a i te tere o te tahuti nei e no ni‘a i te ohipa a te taraehara i roto i te manuiaraa o taua tere ra: « No te mea te taata tino nei, o te enemi ïa o te Atua, e e enemi oia mai te hi‘araa o Adamu mai â, e e enemi hoi a muri e amuri noa’tu, area ia auraro oia i te parau a te Varua Maitai, e ia faaru‘e i te mau peu a te taata tino nei, e ia riro mai ei taata mo‘a na roto i te taraehara a te Mesia ra te Fatu » (Mosia 3:19; teiaharaa papa‘i tei ano‘ihia).
Te huti nei au i to outou feruriraa i ni‘a e piti na parau taa ê. A tahi—« faaru‘e i te mau peu a te taata tino nei ». Te tere mai te ino haere ti‘a’tu i te maitai, o te faaru‘eraa ïa i te mau peu a te taata tino nei e aore râ, te vahine tino nei i roto ia tatou. I roto i te tahuti nei, e faahemahia tatou na te tino. Te mau materia i hamanihia ai to tatou tino e materia hi‘a ïa, e tei raro a‘e te reira i te hutiraa a te hara, a te ino e a te pohe. Tera râ, e nehenehe ta tatou e upootia i ni‘a i te mau hinaaro o te tino e i ni‘a i te mau faahemaraa « na roto i te taraehara a te Mesia ». Ia rave ana‘e tatou i te mea hape, ia ofati ana‘e tatou i te ture e ia rave ho‘i i te hara, e nehenehe ta tatou ia tatarahapa e ia riro mai ei taata mâ na roto i te mana faaora o te taraehara a Iesu Mesia.
A piti—« ia riro ei taata mo‘a ». Te faaite nei teie parau i te ohipa i muri iho e te piti o te tuhaa no te tere o te oraraa nei no te faariro « i te taata maitai ei taata maitai a‘e » e aore râ, e nehenehe e parau e, ia riro mai ei taata mo‘a. Teie tuhaa piti o te tere, oia ho‘i, teie faanahoraa no te maitai haere atu i te matai a‘e, o te hoê ïa tumu parau aita tatou e tuatapapa e aore râ, e haapii pinepine nei, e aita atoa e maramarama maitai nei.
Te mana‘o nei au e, e rave rahi melo no te Ekalesia e mea matau a‘e ratou i te parau no te huru o te mana faaora e te tamâ o te taraehara, i to’na mana haapuai. Te vai ra to tatou iteraa e, ua haere mai Iesu Mesia i ni‘a i te fenua nei no te pohe no tatou, oia ïa—o te reira te tumu e te niu mau o te parau haapiiraa a te Mesia. Tera râ, e mea titau-atoa-hia tatou ia farii e, te hinaaro nei te Fatu, na roto i To’na Taraehara e na roto i te mana o te Varua Maitai, ia ora i roto ia tatou—eiaha no te arata‘i noa ia tatou, no te haapuai atoa râ ia tatou.
Ua ite te rahiraa o tatou e, ia rave ana‘e tatou i te ohipa ti‘a ore, e hinaaro tatou i te tauturu no te upootia i ni‘a i te mau fifi o te hara i roto i to tatou oraraa. Ua aufau te Faaora i te hoo e ua faati‘a ho‘i ia tatou ia riro mai ei mea mâ na roto i To’na mana faaora. Ua maramarama papû te rahiraa o tatou e, no te feia hara te taraehara. Tera râ, aita vau i papû e, ua ite anei e ua maramarama anei tatou e, no te feia mo‘a atoa te taraehara—te mau tane e te mau vahine maitai tei haapa‘o, tei ti‘amâ, e o te tautoo nei ia riro mai ei taata maitai a‘e, e o te tavini nei ma te faaroo. Te ti‘aturi hape nei paha tatou e, e mea ti‘a ia tatou ia tere i to tatou tere mai te maitai e tae atu i te matai a‘e e ia riro mai ei taata mo‘a, na roto i to tatou iho puai, na roto i te itoito, te hinaaro mau e te haapa‘o, e na roto i to tatou iho mau aravihi ha‘iha‘i.
Te evanelia a te Faaora e ere ïa no te haapae noa i te ino i roto i to tatou oraraa; no te rave râ i te maitai e no te riro atoa ei taata maitai. E e horo‘a mai te taraehara ia tatou i te tauturu no te upootia e te haapae i te ino e no te rave e te riro ei taata maitai. E roaa te tauturu a te Faaora ra no te tere taatoa o te tahuti nei—mai te ino haere atu i te maitai e mai te maitai haere atu i te maitai a‘e, e no te taui atoa i to tatou huru mau.
Aita vau e parau atu nei e, te mana faaora e te mana faatupu o te taraehara, e piti ïa na mea taa ê e te ite-ore-hia. Te parau atu nei râ vau e, teie na huru e piti o te taraehara, ua tu‘ati noa raua, e e paturu te tahi i te tahi; ua titauhia raua toopiti atoa ia ohipa i roto i te mau tuhaa atoa no te tere o te oraraa nei. E faufaa mure ore no tatou ia ite e, teie na mea toopiti o te tere o te tahuti nei—te faaru‘eraa i te taata tino e te riroraa ei taata mo‘a, te upootiaraa i ni‘a i te ino e te riroraa ei taata maitai—e ravehia te reira na roto i te mana o te taraehara. E titauhia te mana‘o puai, te hinaaro mau e te anaanatae, te faanahonahoraa maitai e te haamauraa i te opuaraa, tera râ, eita e ravai te reira no te faaoti i teie tere tahuti. Oia mau, e mea ti‘a ia tatou ia turu‘i i ni‘a i « te mana, e te aroha, e te maitai hoi no te Mesia Mo‘a » (2 Nephi 2:8).
Te aroha e te mana faatupu o te taraehara
I roto i te faatoro Bibilia te haapii nei tatou e, ua faaohipa-pinepine-hia te parau aroha i roto i te mau papa‘iraa mo‘a no te tatara i te mana faatupu :
« [Aroha o te hoê ïa] parau o te ite-pinepine-hia i roto i te Faufaa Apî, i roto ihoa râ i te mau papa‘iraa a Paulo. Te mana‘o tumu o te reira parau maori râ te mau rave‘a hanahana no te tauturu e aore râ no te puai, tei horo‘ahia mai na roto i te maitai e te here rahi o Iesu Mesia.
« Na roto i te aroha o te Fatu ia Iesu, tei tupu na roto i to’na tusia taraehara, e ti‘a faahou ai te taata nei i roto i te tahuti ore, ma te farii te taata atoa i to ratou tino mai roto mai i te menema no te hoê oraraa e a muri noa’tu. E mea na roto atoa i te aroha o te Fatu, na roto i te faaroo i te taraehara a Iesu Mesia e te tatarahapa i ta ratou mau hara, e farii ai te taata i te puai e te tauturu no te rave i te ohipa maitai, o te ore roa e ti‘a ia ratou ia rave mai te mea e, na roto noa i ta ratou mau rave‘a. Teie aroha, o te mana faatupu ïa o te faati‘a i te tane e te vahine ia roaa te ora mure ore e te faateiteiraa, i muri a‘e i ta ratou mau tautooraa atoa ».2
O te aroha te tauturu no te ra‘i mai o ta tatou tata‘itahi e titau nei no te tomo i roto i te basileia tiretiera. No reira, na te mana faatupu o te taraehara e haapuai ia tatou ia rave i te maitai e ia riro ei taata maitai e ia tavini na ni‘a atu i to tatou iho hinaaro e to tatou aravihi.
I roto i ta’u tai‘oraa papa‘iraa mo‘a, e mea pinepine au i te papa‘i i te parau ra « mana faatupu » i te mau taime atoa e ite au i te parau ra aroha. A hi‘o i teie irava ta tatou paatoa i mataro maitai: « Ua ite hoi tatou e, na roto i te aroha e ora‘i tatou, hope noa’tu to tatou itoito atoa » (2 Nephi 25:23). Te ti‘aturi nei au e, e rahi to tatou ite i teie huru o te taraehara mai te mea e, e papa‘i tatou « mana faatupu e te haapuai » i te mau taime atoa e ite tatou i te ta‘o ra aroha i roto i te mau papa‘iraa mo‘a.
Faahoho‘araa e te tuuraa
Te tere o te tahuti nei, o te haereraa ïa mai te ino haere atu i te maitai e i te maitai a‘e e te tauiraa i to tatou mau huru. Ua î te Buka a Moromona i te mau hi‘oraa o te mau pĭpĭ e te mau peropheta tei ite, tei maramarama, e tei tauihia ho‘i na roto i te mana faatupu o te taraehara no te haere i taua tere nei. A rahi a‘e ai to tatou iteraa i teie mana mo‘a, e aano e e rahi atoa’tu to tatou ite i te evanelia. Na te reira e faataui ia tatou i te huru faahiahia.
O Nephi te tahi hi‘oraa no te hoê taata tei ite, tei maramarama, e tei ti‘aturi i ni‘a i te mana faatupu o te Faaora. Haamana‘o na tatou e, ua ho‘i faahou te mau tamaiti a Lehi i Ierusalema no te faaô mai ia Isemaela e to’na utuafare i rotopu ia ratou. Ua faatupu pe‘ape‘a o Lamana e te tahi atu pae i roto i to ratou tere mai Ierusalema e ho‘i atu i roto i te medebara, e ua faaitoito o Nephi i to’na mau taea‘e ia faatupu i te faaroo i te Fatu. I taua taime ra o to ratou tere, ua taamuamu te mau taea‘e o Nephi ia’na i te taura e ua opua e haapohe ia’na. A hi‘o na i te pure a Nephi: « E te Fatu e, mai te au i to’u faaroo, o tei roto ia oe ra, e faaora oe ia’u i te rima o to’u na tuaana; oia ïa, a horo‘a mai hoi oe i te puai ia’u ia tatara i teie nei taura i ruuruuhia‘i au nei ra » (1 Nephi 7:1 7; teiaharaa papa‘i tei ano‘ihia).
Ua ite anei outou e, eaha ta’u e pure ahiri e, o vau tei ruuruuhia e to’u mau taea‘e ? « A tatara na ia’u i rapae i teie fifi I TEIE NEI! » E mea taa ê mau ia’u i te mea e, aita o Nephi i pure no te ani ia tauihia to’na vairaa. Ua pure râ oia no te ani i te puai no te taui i to’na vairaa. E te ti‘aturi nei au e, i na reira oia i te pure no te mea ua ite oia, ua maramarama oia e ua farii a‘ena oia i taua mana faatupu ra no te taraehara.
Aita vau e mana‘o nei e, ua topa noa te mau taura i ruuruuhia ai o Nephi i to’na rima e i to’na fatiraa rima, na roto i te hoê huru manamana. Te feruri nei râ vau e, ua horo‘ahia mai te puai taa ê ia’na hau atu i te puai o te natura taata, i ti‘a ai ia’na, i roto « i te puai o te Fatu » (Mosia 9:17) ia tatara, ia taviri e ia huti, e ia tumutu i te mau taura.
E mea papû maitai te auraa o teie aamu no tatou tata‘itahi. A maramarama maitai ai tatou e a faaohipa ho‘i tatou i te mana faatupu o te taraehara i roto i to tatou oraraa, e pure tatou e e imi ho‘i tatou i te puai no te taui i to tatou vairaa, e eita atura tatou e pure no te ani ia tauihia to tatou vairaa. E riro mai tatou ei mau taata o te ohipa aita atura ei mau mea e faaohipahia ra (a hi‘o 2 Nephi 2:14).
A rave na tatou i te hi‘oraa i roto i te Buka a Moromona a hamani-ino-hia ai o Alama e to’na mau taata na Amulona. Ua tae maira te reo o te Fatu i teie mau taata maitai roa i roto i to ratou ra ati e na ô mai ra :
« E na’u hoi e haamâmâ i te mau hopoia teiaha i tuuhia i ni‘a i to outou tapono, eita roa o to outou tapono e mauiui …
E inaha, i haamâmâhia ihora te mau hopoia i tuuhia mai i ni‘a iho ia Alama e to’na ra mau taea‘e; oia ïa; na te Atua ratou i faaitoito, i ti‘a‘i ia ratou i te faaoromai i te mau ati ma te paruparu ore, e ua auraro ihora ratou ma te aau tae e te faaoromai i te hinaaro atoa o te Fatu ». (Mosia 24:14–15 ; teiaharaa papa‘i tei ano‘ihia).
Eaha te mea i tauihia i roto i teie aamu ? E ere te hopoia tei tauihia; aita te mau tauiraa e te mau fifi o te hamani-ino-raa i tatara-oioi-hia i ni‘a i te taata. Ua haapuaihia râ Alama e to’na mau taata, e no te faarahi-raa-hia to ratou puai i mâmâ ai ta ratou hopoia. Ua haapuaihia teie mau taata maitai na roto i te taraehara no te rave ei mau ti‘a e no te haa i ni‘a i to ratou vairaa. E i roto « i te puai o te Fatu » ua arata‘ihia Alama e to’na mau taata i te vahi hau i roto i te fenua no Zalahemela.
E uiui paha outou ma te ti‘a e, « Eaha te mea i fariro i te aamu o Alama e to’na mau taata ei hi‘oraa no te mana faatupu o te taraehara ? » E itehia te pahonoraa i roto i te hoê faaauraa i te Mosia 3:19 e te Mosia 24:15.
« E ia faaru‘e i te mau peu a te taata tino nei, e ia riro ei taata mo‘a na roto i te taraehara a te Mesia ra te Fatu, e ia riro hoi mai te tamarii ra i te marû, e i te mamahu, e i te haehaa, e i te faaoromai, e i te î i te aroha, e ma te hinaaro ia auraro i te mau mea atoa ta te Fatu e hinaaro ia tuu i ni‘a ia’na, mai te tamarii e aurao hoi i to’na ra metua » (Mosia 3:19 ; teiaharaa papa‘i tei ano‘ihia).
A haere ai tatou i mua i roto i te tere o te tahuti nei mai te ino e haere atu i te maitai e i te matai a‘e, e ia faaru‘e tatou i te mau peu a te taata tino nei i roto ia tatou tata‘itahi, e ia rohi tatou ia riro ei feia mo‘a e ia tauihia ho‘i to tatou huru mau, ei reira te mau huru i faataahia i roto i teie irava e faaite papû ai i te huru taata ta outou e ta’u e riro mai. E rahi atu to tatou riroraa mai te tamarii te huru, to tatou faahaehaaraa, to tatou faaoromai e to tatou hinaaro mau ia auraro.
I teie nei, a faaau i teie mau huru i roto i teMosia 3:19 i te mau huru i faaohipahia no te faataa i te huru o Alama e to’na mau taata : « E ua auraro ihora ratou ma te aau tae e te faaoromai i te hinaaro atoa o te Fatu » (Mosia 24:15 ; teiaharaa papa‘i tei ano‘ihia).
Te mana‘o nei au e, e mea faahiahia roa te faaauraa i faaitehia i roto i teie mau irava, e te faaite atoa nei te reira e, ua riro mai te mau taata maitai o Alama ei mau taata maitai a‘ena roto i te mana faatupu o te taraehara a te Mesia te Fatu.
A hi‘o na tatou i te aamu o Alama e o Amuleka i roto i te Alama 14. I roto i teie fifi, e rave rahi Feia Mo‘a faaroo tei haapohehia na roto i te auahi, e ua tapeahia teie na tavini o te Fatu i roto i te fare auri e ua tairihia. A hi‘o na i teie taparuraa i pûpûhia e Alama a pure ai oia i roto i te fare tapearaa : « E te Fatu, ia horo‘a mai oe i te mana na maua mai te au i to maua faaroo, o tei roto i te Mesia, e ora‘i » (Alama 14:26 ; teiaharaa papa‘i tei ano‘ihia).
I ô nei â te ite faahou nei tatou i te maramarama e te ti‘aturi o Alama i te mana faatupu o te taraehara i roto i ta’na aniraa. E a hi‘o na i te hopearaa o teie pure :
« E ua fati ihora ia raua te mau taura i ruuruuhia‘i raua ra; e ite a‘era te feia i te reira, ua haamata ihora ratou i te horo, i roohia hoi ratou i te mata’u i te pohe …
E tae maira Alama raua o Amuleka i rapae au i te tapearaa, aita roa o raua e ino; i horo‘a mai hoi te Fatu i te mana ia raua mai te au i to raua faaroo, o tei roto i te Mesia » (Alama 14:26, 28 ; teiaharaa papa‘i tei ano‘ihia).
Te ite faahou nei â tatou i te mana faatupu a aro ai te mau taata maitai i te ino e a tautoo ai ia riro mai rarou ei taata maitai a‘e e ia tavini maitai a‘e « i roto i te puai o te Fatu ».
Teie â te tahi atu hi‘oraa faufaa no roto mai i te Buka a Moromona. I roto i te Alama 31, te arata‘i nei o Alama i te hoê pŭpŭ no te haere e faaho‘i mai i te mau Zorama taiva, tei patu i ta ratou Rameumepitoma, e ua pûpû i te hoê pure papa‘ihia e te te‘ote‘o.
A hi‘o na i te taparuraa no te puai i roto i te pure a Alama : « E te Fatu, ia faaitoito mai oe ia’u, ia ti‘a ia’u, i te faaoromai ma te haamahu i teie mau ati e tae mai i ni‘a ia’u, no te ohipa ino a teie nei feia » (Alama 31:31 ; teiaharaa papa‘i tei ano‘ihia).
Ua pure atoa o Alama ia faarii to’na mau hoa misionare i te reira haamaitairaa : « Ia faaitoito mai oe ia ratou ia ti‘a ia ratou i te faaoromai i to ratou mau ati te tae mai i ni‘a ia ratou no te ohipa iino a teie nei feia » (Alama 31:33 ; teiaharaa papa‘i tei ano‘ihia).
Aita o Alama i pure no te ani ia iritihia to’na mau ati. Ua ite oia e, e ti‘a oia no te Fatu, e ua pure oia no te ani i te mana no te haa e no te arata‘i i te ohipa e tupu ra i ni‘a ia’na.
Te vahi faufaa roa o teie hi‘oraa tei roto ïa i te irava hopea o te Alma 31 : « Ua faaitoito mai [te Fatu] ia ratou ia ore ia roohia i te hoê ati, maori râ o tei horomiihia i roto i te oaoa i te Mesia ra. E teie nei, ua au teie i te pure a Alama ra ; e ua na reirahia ïa, no te mea i pure oia ma te faaroo » (irava 38 ; teiaharaa papa‘i tei ano‘ihia).
Aita te mau ati i tatarahia. Ua faaitoitohia râ o Alama e to’na mau hoa e ua haamaitaihia na roto i te mana faatupu o te taraehara « ia ore ia roohia i te hoê ati, maori râ o tei horomiihia i roto i te oaoa i te Mesia ra ». Aue ïa haamaitairaa nehenehe. E aue ïa haapiiraa nehenehe e ti‘a ia tatou tata‘itahi ia apo.
E ere i roto ana‘e i te mau papa‘iraa mo‘a e itehia ai te mana faatupu. Ua fanauhia o Daniel W. Jones i te matahiti 1830 i Missouri, e ua tomo mai oia i roto i te Ekalesia i Californie i te matahiti 1851. I te matahiti 1856 ua amui atu oia i roto i te ohipa faaoraraa i te mau pŭpŭ pereoo huti rima tei mau i Wyoming i roto i te vero hiona. Ia ite atu te feia faaora i te feia mo‘a tei roohia i te ati, ia oti te mau tauturu i te horo‘ahia, e ia faanahohia te parau no te feia ma‘i e tei paruparu no te faauta atu i Rotomiti, ua farii o Daniel e te tahi atu feia apî tamaroa ia faaea noa i reira no te tia‘i i te mau tauhaa a te pŭpŭ. Aita i rahi roa te maa e te mau tauhaa i vaiihohia mai ia Daniel ra e i to’na mau hoa, e ua pau oioi noa ïa. Na teie faahitiraa parau no roto mai i te buka aamu o Daniel Jones e faataa mai i te mau mea tei tupu.
« Ua varavara roa te animara oviri e aita roa hoê mea ta matou e nehenehe e taparahi. Ua amuhia e matou te taatoaraa o te i‘o puaa faito hopea roa; e poia te taata e amu i te reira. E i te pae hopea, ua pau te mau mea atoa, aita hoê mea toe faahou maori râ te mau iri animara. Ua tamata matou i te amu i te reira. E rave rahi tei tunuhia e tei amuhia ma te faanoanoa ore e ua ma‘ihia te taatoaraa o te pŭpŭ taata …
Ua fifi roa matou, aita hoê mea toe faahou maori râ te mau iri ota o te mau puaatoro pohe poia. Ua ani matou i te Fatu ia faaite ia matou i te ohipa e rave. Aita te mau taea‘e i amuamu, ua mana‘o râ ratou e, e ti‘aturi i te Atua. … I te pae hopea ua faauruhia vau e nahea ia tatara i taua fifi ra e ua horo‘a vau i te arata‘iraa i te pŭpŭ, nahea ia tunu i te reira; tutu‘i e para‘u i te huruhuru; na te reira e tupohe e e tamâ i te au ore o te hau‘a paapaa. Ia oti ana‘e i te para‘u, e tunuhia i roto i te pape pihaa, e faaru‘ehia te pape tei tatara i te tapau, i muri iho e horohoroi-maitai-hia te iri, e tamâhia i roto i te pape toetoe, i muri iho, e haapihaa faahou e e faatoetoe, e i reira e amu ai e te tahi maa tihota i ni‘a iho. E ere i te mea ohie, tera râ, aita ta matou e ohipa ê atu e nehenehe e rave, e e mea maitai a‘e te reira i te pohe poia.
Ua ani matou i te Fatu ia haamaitai i to matou opu e ia faaau ia ratou i teie maa. … I te taime amuraa mai te mea ra e, ua oaoa te mau taata atoa. A toru mahana aita matou i amu i te maa hou a rave ai matou i teie rave‘a. Ua fana‘o matou i teie maa maitai roa e ono hepetoma te maoro ».3
I roto i taua huru taime ra, e mea papû e, e pure au no te ani i te tahi atu maa e amu : « E te Metua i te Ao ra, a tono mai na Oe i te tahi manu e aore râ, i te hoê puaatoro ». E mea papû e, eita vau e feruri ia pure ia haapuaihia to’u opu ia faaauhia i te maa e vai ra. Eaha ho‘i ta Daniel W. Jones i ite ? Ua ite oia i te parau o te mana faatupu o te taraehara a Iesu Mesia. Aita oia i pure ia tauihia te mau mea ta’na e farerei ra. Ua pure râ oia ia faaitoitohia oia no te faaruru i te mau mea ta’na e farerei ra. Mai ia Alama e to’na mau taata, ia Amuleka, e o Nephi i faaitoitohia, ua roaa ia Daniel W. Jones te maramarama varua no te ite e, eaha te mea e ani atu i roto i taua pure ra.
Na te mana faatupu o te taraehara a te Mesia e faaitoito ia tatou ia rave i te mau mea e ore roa tatou e rave na roto ia tatou iho. I te tahi taime e uiui au e, i roto i to tatou ao fana‘o no te mau mahana hopea nei—i roto i to tatou ao e umu uira e te niuniu afa‘ifa‘i e te mau pereoo uira e te matai faatoetoe e to tatou mau fare au maitai—te haapii ra anei tatou ia ara papû i to tatou vairaa i raro a‘e i te mana faatupu o te taraehara i te mau mahana atoa.
E vahine faaroo rahi e te aravihi te tuahine Bednar, e ua apo mai au i te mau haapiiraa faufaa roa no ni‘a i te mana faaitoito no roto mai i to’na hi‘oraa marû. Ua ite au i to’na faaoromai rahi i roto i to’na mau ma‘i tamau o te poipoi—ma‘i papû i te mahana taatoa i na ava‘e e va‘u—i te taime no to’na na hapuraa tata‘itoru. Ua pure amui maua ia haamaitaihia oia, tera râ, aita taua fifi ra i tatarahia. Noa’tu râ te reira, ua ti‘a ia’na i te rave i te mea o te ore e ti‘a ia’na ia rave na roto noa i to’na iho puai. I te roaraa o te mau matahiti, ua hi‘o atoa vau i to’na tauturu-raa-hia no te arai i te tahitohitoraa e te faainoraa o te totaiete ia haapa‘o ana‘e te hoê vahine feia mo‘a no te mau mahana hopea nei i te a‘oraa a te peropheta, e ia faariro ana‘e oia i te utuafare e te aupururaa i te tamarii ei hoê o ta’na mau ohipa tumu mau e te faufaa roa. Te haamauruuru nei au e te haapoupou nei au ia Susan no to’na tautururaa mai ia’u ia apo i taua mau haapiiraa faufaa rahi ra.
Te ite nei e te maramarama ho‘i nei te Faaora
I roto i te Alama pene 7 te haapii nei tatou e nahea e no te aha e ti‘a ai i te Faaora ia horo‘a i te mana faatupu :
« E e haere Oia, ma te faaoromai i te mauiui e te ati e te mau huru faahemaraa atoa ra; e e na reira oia ia faatiahia te parau tei na ô mai ra e, e rave oia i te mauiui e te mau ma‘i o ta’na mau taata ia’na iho.
E e faaoroma‘i oia i to’na poheraa, i tatara‘i oia i te mau tapea o te pohe i ruuruuhia‘i to’na ra mau taata; e e rave oia i to ratou paruparu i ni‘a ia’na iho ia faaîhia to’na ra aau i te aroha i au i te tino, ia ite oia na roto i te tino i te rave‘a e faaora‘i i to’na mau taata i to ratou paruparuraa ra » (Alama 7:11–12 ; teiaharaa papa‘i tei ano‘ihia).
Ua mauiui te Faaora eiaha no ta tatou noa mau hara, no te tuea-ore-raa atoa râ, no te ti‘a ore, no te mauiui, no te oto, e no te pe‘ape‘a i te pae feruriraa o te tupu pinepine nei i ni‘a ia tatou. Aita e mauiui i te tino, aita e oto i te varua, aita e mauiui o te varua, aita e ati e aore râ e ino o ta outou e o ta’u iho e farerei i roto i to tatou oraraa tahuti nei o tei ore i orahia e te Faaora na mua roa. E riro outou e o vau nei i te parau ma te oto, i roto i te hoê taime mauiui, « aore hoê taata e maramarama nei. Aore hoê taata e ite nei ». Penei a‘e aore hoê taata e ite nei. Tera râ, te ite e te maramarama papû maitai nei te Tamaiti a te Atua, no te mea ua ite Oia e ua amo ho‘i Oia i te mau hopoia hou tatou a amo ai. E no te mea e, ua aufau oia i te hoê hoo hopea e ua amo i te reira hopoia, ua ite papû Oia i te reira mau mea, e e nehenehe Ta’na e toro mai i To’na rima aroha i roto i te mau tuhaa e rave rahi o to tatou oraraa. E nehenehe Ta’na e faatoro i te rima, e tapea, e tauturu—e horo mai ia tatou nei—e e faaitoito ia tatou ia hau atu tatou i to tatou iho huru, e ia tauturu ia tatou ia rave i te mea o te ore roa e ti‘a ia tatou ia rave na roto noa i to tatou iho puai.
« E haere mai outou ia’u nei, e te feia atoa i haa rahi, e tei teiaha i te hopoia, e na’u outou e faaora.
A rave mai i tau zugo i nia ia outou, e ia haapiihia outou e au, te mărû nei hoi au e te haehaa o te aau: e e noaa hoi te ora i to outou varua.
Te mărû nei hoi ta’u zugo e te mâmâ nei ta’u hopoia » (Mataio 11:28–30).
Te faaite nei au i to’u iteraa e to’u mauruuru no te tusia hopea ore e te mure ore o te Fatu o Iesu Mesia. Ua ite au e te ora nei te Faaora. Ua ite au i To’na mana taraehara e i To’na mana faatupu, e te faaite papû nei au e, e mana mau teie na mana e piti, e e roaa te reira ia tatou tata‘itahi. Oia ïa, « i roto i te puai o te Fatu ra » e nehenehe ta tatou e rave e e upootia ho‘i i ni‘a i te mau mea atoa a haere ai tatou i mua i roto i to tatou tere i te tahuti nei.
Ta’u Metua, na Simon Dewey
Faahoho‘araa na Jeff Ward
Faahoho‘araa na Jeff Ward
Tuhaa hohoa no Behold My Hands, na Jeff Ward