Te mau haamaitairaa o te haapiiraa evanelia
Na te ao atoa nei, te arata‘i roa nei te haapiiraa evanelia i te feia apî mai ia outou na i piha‘i iho ia Iesu Mesia.
E ere o outou ana‘e i roto i ta outou faaotiraa ia haere i te haapiiraa evanelia. Na te ao atoa nei, e rave rahi hanere tauatini feia apî o te faariro nei i te haapiiraa evanelia ei tuhaa no to ratou oraraa, te haere nei ratou i roto i ta ratou piha haapiiraa na ni‘a i te pereoo utaraa taata, na ni‘a iho i te vaa initia, te pereoo taataahi, e aore râ, i ni‘a i te itenati. Te ti‘a nei te tahi mau feia apî i te poipoi roa no te ratere atea no te tapae i te hora, te tahi pae, te ratere nei ratou i te ahiahi, e te tahi te haapii noa nei ratou i te fare e rave rahi mahana i roto i te hepetoma.
No te haere i te haapiiraa evanelia e titauhia te faatusiaraa, tera râ, te ite nei te feia apî na te ao atoa nei e, e mau‘araa maitai te faaitoitoraa no te haere i te haapiiraa evanelia. E o ratou o te haere nei i te haapiiraa evanelia, te vai ra ïa hoê mea i roto ia ratou paatoa: na te haapiiraa evanelia e haafatata nei ia ratou i te Faaora e i to tatou Metua i te Ao ra.
Te fariiraa i te mau haamaitairaa i fafauhia
No te aha e mea faufaa roa te haapiiraa evanelia no outou ? Te tahi o te mau tumu, o teie ïa mau fafauraa no roto mai i te mau peropheta e te mau aposetolo no teie anotau :
-
Ua riro te reira ei « tao‘a a te Atua no te faaoraraa ia Iseraela i teie anotau na roto i te hoê hora fifi mau ».1
-
Na te reira « e faaineine ia outou no te vauvau i te parau poroi o te evanelia i faaho‘ihia mai, i te feia o ta outou e farerei atu ».2
-
Na te reira e tauturu ia outou « ia roaa te ite o te parau mau ».3
-
Na te haapiiraa evanelia « e horo‘a mai nei i te mau rave‘a faahiahia no te haapii i te mau parau haapiiraa o te faatupu i te oaoa i roto ia outou. E horo‘a mai te reira i te mau rave‘a nehenehe no te faahoa i te feia hoê â to outou huru ».4
-
« E tupu to outou ite i te evanelia i te rahi. E puai to outou faaroo. E faahotu outou i te mau autaatiraa e te auhoaraa nehenehe ».5
-
« E horo‘a mai te reira … i te ite pae varua, i te puai morare no te patoi i te ino e vai nei ati a‘e ia tatou, e tae noa’tu i te ite rahi i roto i te evanelia ».6
-
O te « hoê o te mau faaineineraa maitai roa a‘e no te hoê misioni ».7
Imiraa i te rave‘a no te haere
Te haereraa i te haapiiraa evanelia, o te faaru‘eraa atoa rii ïa i te tahi mea ta outou e au nei ia rave, ia roaa ho‘i ia outou te taime no te haere. Tera râ, e mau‘araa maitai te raveraa i te reira tusia. Ua ma‘iti o Elijah Bugayong no te fenua Firipino, ia rave i te reira faaotiraa i roto i te matahiti hopea o ta’na haapiiraa tuarua. I roto i ta’na haapiiraa tuarua, ua riro tamau noa oia ei numera piti i roto i ta’na piha. Ua hinaaro puai oia ia riro ei numera hoê i ta’na matahiti hopea, e ua feruri atoa oia e, e vaiiho i te haapiiraa evanelia ta’na i rave noa na i te mau matahiti na mua’tu, ia ti‘a hoi ia’na ia faatupu i ta’na opuaraa.
E i te hoê mahana, ua taui to’na mau feruriraa. « Ua [hi‘o atu vau ] i ta’u iri haapiiraa », ta’na ïa parau. « Ua ite atu vau i te hoê apaparaa buka i piha‘i iho, ta’u buka papa‘iraa mo‘a e maha, ta’u buka papa‘i e ta’u buka haapiiraa evanelia. Ua ui hohonu a‘era vau ia’u iho e, ‘Eaha te mea faufaa a‘e ? »
Ua ite o Elijah i ta’na pahonoraa i roto i te Mataio 6:33 : « E mata na râ outou i te imi i te basileia o te Atua, e te parau ti‘a na’na ; e amui-atoa-hia mai taua mau mea ra ia outou ». Ua faaoti oia e haere itoito i te haapiiraa evanelia e e imi i te tahi atu mau rave‘a no te faaau i to’na taime ia ti‘a ia’na ia haa i ni‘a i ta’na haapiiraa. I te hopea o te matahiti, ua ma‘itihia oia ei piahi numera hoê e ua roaa atoa ia’na te hoê pute no te haapiiraa tuatoru.
Ua faaoti o Spencer Douglas no Alabama, USA, ia faaru‘e i te tahi mau ohipa faaoaoaraa ia ti‘a hoi ia’na ia apo rahi mai i te mau mea no te haapiiraa evanelia. No ta’na na matahiti matamua o te haapiiraa evanelia, ua ti‘a oia i ni‘a i te hora 4 i te poipoi no te haere, e no na matahiti hopea e piti ua ti‘a oia i ni‘a i te hora 5 i te poipoi. Te parau ra oia e, « Aita ta’u e nehenehe e amui atu i roto i te mau faaoaoaraa i te pô e to’u mau hoa no te mea e titauhia ia’u ia taoto oioi. Aita ana‘e, eita ïa e ti‘a ia’u ia amui hope roa i roto i te haapiiraa e ia apo maitai i te poipoi a‘e ». No Spencer, e ere ïa te tae-noa-raa i te haapiiraa, o te ara-atoa-raa râ e te faaineineraa no te apo mai i te haapiiraa.
Ua haapii mai o Elder Dallin H. Oaks no te Pŭpŭ no te Tino Ahuru Ma Piti Aposetolo e : « Eiaha no te mea e mea maitai te hoê mea ra e tumu maitai ïa no te rave i te reira. Rave rahi mau ohipa maitai e ti‘a ia tatou ia rave tera râ, aita e rava‘i te taime no te rave i te reira. Te vai ra te tahi mau ohipa hau roa‘tu i te maitai, e o te reira ïa te mau ohipa e ti‘a ia ravehia na mua roa i roto i to tatou oraraa ».8 Tera te hoê a‘o faufaa roa ia haamana‘o i te taime a faaoti ai outou e, nahea ia faaau i te faufaa o te haapiiraa evanelia i roto i ta outou tarena.
Faaineine no te mau Misioni
Te pahono atoa nei te haapiiraa evanelia ei faaineineraa rahi no te ohipa misionare ta outou e rave—ei melo misionare i teie mahana e mai te mea atoa e, e rave outou i te hoê misioni rave tamau a muri a‘e. Ua ite o Franco Huamán Curinuqui no Peru e, ua tauturu maitai ta’na tai‘oraa papa‘iraa mo‘a ia’na no te faaineine no ta’na misioni.
E mau‘araa maitai te ti‘araa i ni‘a i te hora 4 i te poipoi no te haere i te haapiiraa evanelia, na ni‘a i te vaa ia tae i te mau ava‘e vai pu‘e, e na roto i te vari paruparu no te tae i te piha haapiiraa. Te parau ra oia e, « Ua hinaaro vau e faaoti i te haapiiraa evanelia a te feia apî e ia haamata i te haapiiraa evanelia na te feia apî paari no te faaineine ia’u no te hoê misioni. E tamau noa vau i te tupu i te rahi i roto i te Ekalesia ». E mea faufaa te haapiiraa evanelia no’na no te mea e haapii mai oia no ni‘a i te mau papa‘iraa mo‘a e e tamau aau oia i te mau irava faufaa, na te reira e tauturu ia’na ia riro ei misionare maitai a‘e.
Ia haamaitaihia i roto i te mau tuhaa atoa o te oraraa
A rohi ai te feia apî na te ao atoa nei no te haere i te haapiiraa evanelia, e farii ïa ratou i te puai i roto i te mau mea e rave rahi, eiaha i ni‘a noa i te tai‘oraa i te papa‘iraa mo‘a. Ua ite o Cameron Lisney no Peretane e, ua haamaitaihia oia i roto i te mau tuhaa atoa o to’na oraraa. « Eita te haapiiraa evanelia e tauturu noa i te mau mea pae varua ana‘e, e tauturu atoa râ te reira i te haapiiraa », te na reira ra o Cameron.
Te parau ra oia e, « na te haamataraa oioi i te mahana e faaara i to outou roro. Te parau ra te tahi mau hoa to’u e, aita to ratou e taime no te haere—a tae hoi e, e ere hoi mai te huru e, te haere nei outou e hi‘ohi‘o faahou i te « maths » i te hora 6 i te poipoi, e ere anei ? » Ia tuatapapa outou, « e tauturu mai te Fatu ia outou i roto i ta outou mau hi‘opo‘araa, e mai te mea e, e haere outou i te haapiiraa evanelia, e rahi roa’tu ta’na tauturu ia outou », te na reira ra o Cameron.
Oia mau, ua tauturu atoa te haapiiraa evanelia ia Cameron ia haapaari i to’na iteraa papû. Te na ô ra oia e, « Ua tae mai te haamataraa o to’u iteraa papû na roto mai i te faanahoraa o te haapiiraa evanelia. I te 14raa o to’u matahiti, ua tautoo u‘ana vau i roto i te evanelia. Aita vau i au i te Ekalesia, e ua tae roa vau i te raveraa i te mau mea aita e ti‘a ia’u ia na reira. Te tahi noa tau ava‘e rii i reira vau i faaru‘e ai i te mau mea atoa ». Tera râ, ia ani mai te hoê hoa ia Cameron ia haere i te haapiiraa evanelia, ua farii oia ia haere na muri iho ia’na. E ua haamata te mau haamaitairaa i te tae mai.
« Ua haamata vau i te farii faahou i te Varua », te parau ïa a Cameron. « Ua haamata vau i te haapa‘o maitai i roto i te pureraa, e ua haere au i te Haapiiraa Sabati e i te mau haapiiraa o te autahu‘araa. Ua riro maira te reira ei ohipa ohie a‘e, e ua haamata vau i te oaoa a‘e. I te pae hopea, ua roaa to’u iho iteraa papû no ni‘a i te evanelia ». E piti ava‘e i muri a‘e i te haapiiraa evanelia, ua farerei o Cameron i to’na episekopo e ua faatoro‘ahia oia ei haapii i roto i te Autahu‘araa a Aarona.
Ua ite o Cameron e, te tauturu nei te haapiiraa evanelia ia’na ia ti‘a ma te paari i mua i te mau faahemaraa o te ao nei. Ua parau oia e, « a tere noa ai te haapiiraa evanelia, ua ite a‘era vau e, e mea ohie a‘e ia faaruru i te mau fifi o teie nei ao. E mea fifi mau ia riro ei feia apî i roto i te ao ta tatou e ora nei—te haatihia nei tatou i te hara i te mau vahi atoa. Te faaite papû nei au ia outou e, mai te mea e, e haere outou i te haapiiraa evanelia, e itehia e outou te puai no te paruru ia outou i te reira. E hamani te haapiiraa evanelia i te hoê paruru varua no te paruru ia outou. Ua rau te mau tamataraa e te mau faahemaraa tei topa mai i ni‘a i to’u e‘a, e ua riro te haapiiraa evanelia ei tauturu papû mau no te tapea ia’u i ni‘a i te e‘a afaro e te pirihao ».
Haapuai i te tahi e te tahi
Na te haapiiraa evanelia atoa e tahoê ia outou e te tahi atu mau feia apî hoê â to outou mau ti‘aturiraa. Te parau nei o Vika Chelyshkova no Rusia e, « Ua faauruhia vau e te mau taata hoê â feruriraa e to’u, o te mau nei ho‘i te hoê â mau ture morare e o te ti‘aturi atoa nei i te Atua mai ia’u te huru ». Te parau faahou ra oia e, « Mai te mea e, e uiraa ta’u, e nehenehe ta’u e aparau i te reira i to’u orometua haapiiraa evanelia e i te tahi atu mau piahi. E nehenehe ta’u e faaite i to’u mau mana‘o e i to’u iteraa papû ia vetahi ê no te haapuai i to’u iho faaroo e i to vetahi ê. Na roto i te tai‘o-amui-raa i te mau papa‘iraa mo‘a e te feruri-maite-raa i te mau mea no te pae varua, te fatata atu nei matou i te Atua e i te tahi e te tahi.
Ua ite atoa o Ksenia Goncharova, no « Ukraine », i te reira mau mea. Te parau nei oia e, « Ia faaite ana‘e tatou i to tatou mau iteraa i te tahi e te tahi, e rahi a‘e to tatou puai, e e maramarama maitai a‘e tatou i te mau papa‘iraa mo‘a. Ia paraparau ana‘e matou i te mau hi‘oraa no roto mai i to matou oraraa i te taime no te mau haapiiraa, te ite nei au i te huru ohiparaa a te evanelia i roto i to’u oraraa e i roto i te oraraa o vetahi ê ».
Te iteraa i te Metua i te Ao ra e ia Iesu Mesia
Aita i maoro a‘enei ua anihia i te hoê pŭpŭ feia apî e mea nahea to te haapiiraa evanelia haamaitairaa ia ratou. Ua faaite mai ta ratou mau pahonoraa i te hoê tumu parau rahi—ua tauturu te haapiiraa evanelia ia ratou ia haafatata ia ratou i te Metua i te Ao ra e i te Faaora. Ua haapii mai o Elder David A. Bednar no te Pŭpŭ no te Tino Ahuru Ma Piti Aposetolo e : « E mea faufaa te mau tumu parau atoa ta outou e tuatapapa nei i roto i te haapiiraa evanelia. I te mau matahiti atoa ia tuatapapa outou i te hoê o te mau buka papa‘iraa mo‘a, o te Fatu ra o Iesu Mesia te tuatapaparaa matamua ».9
Teie te mau parau e rave rahi ta te feia apî i faahiti no ni‘a i te huru to te haapiiraa evanelia haafatataraa ia ratou ia Iesu Mesia.
-
« Ua haapii au i te mau mea ta te Faaora e rave ra no’u, na roto i te tai‘oraa i teie mau aamu no roto mai i te mau peropheta e rave rahi, e na roto i te iteraa e, e mea faufaa rahi au i mua Ia’na. Ua ite au e, no To’na here rahi ia’u, i pohe ai e i mauiui ai Oia no to’u mauiui ».
-
« O te haapiiraa evanelia te hoê rave‘a maitai roa no te haamata i to’u mahana. Noa’tu te huru o to’u rohirohi, e ite au i te Varua e e ite au i te puai, e ia tae mai te mau mea teimaha i roto i to’u mahana, ua ite au ma te feaa ore e, ua here to’u Faaora ia’u, e i reira to’u ti‘aturi e rahi ai no te ti‘a no te parau ti‘a ».
-
« E taata fafariuhia mai au i roto i te Ekalesia. Ua haamata vau i te haapiiraa evanelia hou a bapetizohia ai au. Ahani aita e haapiiraa evanelia, eita paha ïa vau e bapetizo-roa-hia. Ahiri e, aita e haapiiraa evanelia, eita ïa vau e farii i te Faaora i roto i to’u oraraa i teie nei e aore râ, eita ïa vau e ite e, e nehenehe ta’u mau hara e faaorehia. Aita re‘a to’u iteraa i te Metua i te Ao ra e ia Iesu Mesia i roto i to’u oraraa. Na te haapiiraa evanelia i tauturu mai ia’u ia ite ia Raua e ia faariro a muri noa’tu ho‘i ia Raua ei tuhaa no to’u iho oraraa e no te oraraa o ta’u mau tamarii a muri a‘e ».
-
« Na te haereraa i te haapiiraa evanelia i te mau mahana atoa i tauturu mai ia’u ia haafatata roa i piha‘i iho i to’u Fatu e to’u Faaora, o Iesu Mesia, na roto i te aporaa i Ta’na mau haapiiraa, To’na here rahi ia’u, e te rave‘a e ti‘a ai ia’u ia ho‘i e ora i piha‘i iho Ia’na ra ».
-
« Ia tae au i te haapiiraa evanelia, e ite au i te hoê auraa hohonu i roto i te mau papa‘iraa mo‘a. Na te reira e tauturu ia’u ia haamana‘o i te mau poipoi atoa ia riro mai te Mesia ra te huru i roto i te mau ohipa atoa ta’u e rave ra i te mau mahana atoa ».
-
« Ua haapii mai te haapiiraa evanelia ia’u nahea ia tai‘o i ta’u mau papa‘iraa mo‘a, e eiaha ia oaoa noa i te reira, ia ite atoa râ i te faaohiparaa i roto i te papa‘iraa. Ua apo mai au i te mau haapiiraa e te mau parau tumu o tei tauturu i te haapuai i to’u iteraa papû no ni‘a i te hoê Metua i te Ao ra here e ia Iesu Mesia, o ta’u ïa e tapea i roto ia’u no te taatoaraa o to’u oraraa ».
Na roto i teie mau haamaitairaa e rave rahi o te roaa mai na roto i te haereraa i te haapiiraa evanelia, e mea ohie roa ia ite e, no te aha te feia apî na te ao atoa nei e faariro nei i te reira ei ohipa tumu i roto i ta ratou tarena.
Hoho‘a papa‘i na te CES; hoho‘a na Scott Greer
Hoho‘a papa‘i na Christina Smith
Atau : hoho‘a no Provo, Utaha, hoho‘a haafetiaraa fariihia e te Haaputuraa Parau no te Ekalesia