Eaha to muri iho i te haapiiraa evanelia ?
Aita ta outou haapiiraa faaroo i hope i te taime a farii ai outou i te parau tu‘ite no te haapiiraa evanelia. Te vai ra â te tahi mea faahiahia roa no outou.
I roto i te haapiiraa evanelia e tuatapapa outou i te mau papa‘iraa mo‘a, e, e putuputu tamau paha outou e te tahi atu mau tamarii o to outou faito matahiti. E farii poupouhia outou, e e nehenehe ta outou e farii i te Varua. No reira, ia hope ana‘e te haapiiraa evanelia, ua hope atoa anei teie mau mea ? Aore roa ïa.
I muri mai i te reira te vai ra te faanahoraa haapiiraa evanelia na te feia apî paari (institut) a te Ekalesia, e au roa outou i te reira. Noa’tu e te haere nei outou i te haapiiraa tuarua e aore râ aita, e nehenehe ta outou e tamau noa i te haapii i te evanelia, e faaineine no te hoê misioni e no te faaipoiporaa hiero, e e faaite i te mau iteraa i te tahi atu mau taata o to outou faito matahiti.
Teie te tahi mau pahonoraa i te mau uiraa tumu no ni‘a i te haapiiraa evanelia a te feia apî paari. Te vai ra â te tahi atu i ni‘a i te itenati institute.lds.org.
Eaha te haapiiraa evanelia na te feia apî paari ?
Te haapiiraa evanelia na te feia apî paari, e mau piha haapiiraa evanelia ïa, e mau piha haapiiraa no ni‘a i te mau papa‘iraa mo‘a, no ni‘a i te mau haapiiraa a te mau peropheta, e te faaineineraa no te hoê misioni e aore râ, no te faaipoiporaa hiero. I roto i te tahi mau haapiiraa evanelia na te feia apî paari, e nehenehe ta outou e ma‘iti e rave rahi haapiiraa.
O vai te nehenehe e haere ?
Te faaitoitohia nei te feia apî paari atoa ia haere i te haapiiraa evanelia na te feia apî paari. Te mau taata atoa—tei faaipoipohia e aore râ, te vai otahi noa ra—i roto i te area matahiti 18 e tae atu i te 30, e nehenehe ta ratou e haere.
I hea e itehia ai ia’u te haapiiraa evanelia na te feia apî paari ?
I te tahi mau fenua, tei piha‘i iho noa te fare no te haapiiraa evanelia na te feia apî paari i te mau fare haapiiraa tuatoru. I te tahi atu mau fenua, te faatupuhia nei te mau haapiiraa i roto i te mau fare pureraa a te Ekalesia e aore râ, i roto i te tahi atu mau fare. A farerei i to outou episekopo e aore râ, te peresideni amaa no te ite e, tei hea te haapiiraa evanelia na te feia apî paari i to outou vahi, e aore râ, a haere i ni‘a i te itenati institute.lds.org no te ite i te haapiiraa evanelia na te feia apî paari fatata mai i ô outou.
No te aha i titauhia ai ia’u ia haere i te haapiiraa evanelia na te feia apî paari ?
Ua parau te Peresideni Thomas S. Monson e: « A faariro i te haereraa i te haapiiraa evanelia na te feia apî paari ei ohipa tumu matamua. … A feruri i te reira. E roaa te mau hoa, e fariihia te Varua, e e haapuaihia te faaroo. Te fafau nei au ia outou e, mai te mea e, e haere outou i te haapiiraa evanelia na te feia apî paari e e tuatapapa outou i te mau papa‘iraa mo‘a ma te itoito, e tupu i te rahi to outou mana no te patoi i te faahemaraa e no te farii i te arata‘iraa a te Varua Maitai i roto i te mau mea atoa ta outou e rave » (institute.lds.org, Eperera 21, 2009).
Hoho‘a papa‘i na Media Services