Mesaj Premye Prezidans lan, Jen 2012
Aple pa Bondye e soutni pa moun yo
Antanke manm Legliz la, yo envite nou souvan pou nou soutni moun nan apèl yo resevwa pou sèvi. Sa gen kèk ane, yon etidyan 18 an te montre m kisa sa vle di soutni sèvitè Senyè a. Jiskaprezan mwen beni pa egzanp enb li a.
Li te fèk kòmanse premye ane li nan kolèj. Li te batize prèske ennan anvan l te kite lakay li pou kòmanse etid li nan yon gwo inivèsite. Nan kote sa a, mwen te sèvi kòm evèk li.
Lè ane lekòl la te kòmanse, mwen te fè yon ti entèvyou avèk li nan biwo evèk la. Mwen pa sonje anpil nan premye konvèsasyon sa a sof ke li te pale de pwoblèm li te genyen nan yon nouvo kote, men mwen pap janm bliye dezyèm konvèsasyon nou.
Li te mande pou l te vin kote m nan biwo mwen. Mwen te etone lè l te di: “Èske nou ka priye ansanm, e èske m ka fè priyè a?” Mwen ta pral reponn ke m te deja priye e m sipoze ke li te deja priye tou. Men, olyesa mwen te dakò.
Li te kòmanse priyè l la avèk yon temwayaj ke li te konnen evèk la te aple pa Bondye. Li te mande Bondye pou l te di m kisa pou l te fè nan yon bagay ki gen gwo konsekans espirityèl. Jènjan an te di Bondye li te si ke evèk la te deja konnen bezwen li e li t ap ba l konsèy li te bezwen tande a.
Pandan l t ap pale, danje espesifik li t ap fè fas yo te vini nan lespri mwen. Konsèy la te senp men li te vini nan gran klate: toujou priye, obeyi kòmandman yo, epi pa pè.
Jènjan sa a, ki te gen ennan nan Legliz la, te anseye pa legzanp sa Bondye kapab fè avèk yon dirijan lè li soutni pa lafwa ak lapriyè moun li aple pou dirije yo. Jènjan sa a te demontre m pouvwa lwa konsantman komen an nan Legliz la (gade D&A 26:2). Menmsi Senyè a aple sèvitè l yo pa revelasyon, yo kapab fonksyone sèlman apre yo fin soutni pa moun yo aple pou sèvi yo.
Pa vòt soutyen nou, nou fè pwomès solanèl. Nou pwomèt pou nou priye pou sèvitè Senyè yo epi l ap dirije yo ak fòtifye yo (gade D&A 93:51). Nou pwomèt ke n ap chèche ak espere pou n santi enspirasyon Bondye nan konsèy yo ak kèlkeswa lè yo aji nan apèl yo (gade D&A 1:38).
Pwomès sa a ap bezwen renouvle nan kè nou souvan. Enstriktè Lekòldidimanch nou ap eseye anseye pa Lespri, tankou nou menm nou ka fè, enstriktè nou an gen dwa fè erè devan klas la. Sepandan, nou ka deside pou koute ak veye moman lè nou ka santi enspirasyon vini. Lè moman an rive n ap note mwens erè ak pi plis prèv ke Bondye ap soutni enstriktè sa a.
Lè nou leve men nou pou soutni yon moun, nou pran angajman pou travay pou kèlkeswa bi Senyè a ke moun sa a aple pou akonpli. Lè pitit nou yo te piti, madanm mwen te aple pou anseye timoun piti yo nan pawas nou an. Mwen te non sèlman leve men m pou te soutni li, men, mwen te priye pou li tou epi m te mande pèmisyon pou ede li. Leson m te resevwa sou apresyasyon pou sa madanm mwen te fè ak sou lanmou Senyè a pou timoun yo toujou kontinye ap beni fanmi mwen ak lavi mwen.
Mwen te pale dènyèman avèk jènjan sa a ki te soutni evèk li a sa gen dèzane a. Mwen te aprann ke Senyè a ak moun yo te soutni li nan apèl li kòm misyonè, kòm prezidan pye, ak kòm papa. Lè konvèsasyon nou an te fini, li te di: “Mwen toujou priye pou ou chak jou.”
Nou ka detèmine pou n priye chak jou pou yon moun ki aple pa Bondye pou sèvi nou. Nou kapab remèsye yon moun ki te beni nou pa sèvis li. Nou ka deside prezante tèt nou lè yon moun nou te soutni mande pou volontè.1
Moun ki soutni sèvitè Senyè a nan wayòm ni an ap soutni pa pouvwa enkonparab li. Nou tout bezwen benediksyon sa a.
© 2012 pa Intellectual Reserve, Inc. Tout dwa rezève. Enprime nan Etazini Damerik. Apwobasyon Anglè: 6/11. Apwobasyon tradiksyon: 6/11. Tradiksyon First Presidency Message, June 2012. Haitian Creole. 10366 036
Ansèyman Ki Soti nan Mesaj Sa a
Apre ou fin pataje mesaj sa a, panse pou li sitasyon sa a: “Senyè a ap fè nou vin yon enstriman nan men li si nou enb, fidèl, ak dilijan. … N ap resevwa plis fòs lè nou soutni pa kongregasyon an ak resevwa mizapa” (Ansèyman, pa gen pi gwo apèl [1999], 20). Fè fanmi an rasanble otou yon bagay lou epi mande yon moun pou eseye soulve li. Pandan w ap ajoute yon moun chak fwa, envite lòt manm fanmi an pou yo ede soulve bagay lou a. Diskite sou sa k rive lè tout moun pote èd. Panse pou mete aksan sou konsèy Prezidan Eyring nan sou fason pratik nou ka soutni lòt moun nan apèl yo.