Fausiaina o Faavae Mausali

Peresitene Henry B. Eyring, Fesoasoani Muamua i le Au Peresitene Sili, “O Mauga e A’ea,” Liahona, Me 2012, 24.

I le avea ai o se alii talavou, sa ou faigaluega i se konekarate i le fausiaina o fusi faavae ma faavae o fale fou. I le vevela o le taumafanafana, o se galuega faigata le saunia o le eleele mo taiala e sasaa i ai le sima mo le fusi faavae. Sa leai ni masini. Sa matou faaaogaina se piki ma se suo. O le fausiaina o faavae mausali mo fale, o se galuega faigata i na aso.

E manaomia ai foi le onosai. Ina ua uma ona sasaa le sima o le fusi faavae, sa matou faatalitali sei mago. Po o le a lo matou mananao e faagasolo le galuega, ae sa matou faatalitali foi ina ua uma ona sasaa le faavae a’o lei talaia taiala.

Sa sili foi ona faagaeetia loto i se tufuga fou le mea sa foliga mai o se faagasologa e le malie ma alu ai le taimi, e tuu ai ma le faaeteete u’amea i totonu o taiala e faamalosi ai le faavae ua mae’a.

I se auala foi faapena, e tatau ona saunia ma le faaeteete le eleele mo faavae o o tatou faatuatua ina ia tatalia ai afā o le a oo mai i olaga taitasi. O lena amataga mausali o se faavae o le faatuatua, o le amiosa’o o le tagata lava ia.

O lo tatou filifilia o le sa’o e le aunoa, i soo se taimi e tuu mai ai i o tatou luma se filifiliga, e fatuina ai le eleele mautu i lalo o lo tatou faatuatua. E mafai ona amata i le taimi o laitiiti talu ai o agaga uma lava ua fananau mai ma le meaalofa foaifua o le Agaga o Keriso. O lena Agaga e mafai ai ona tatou iloa pe a tatou faia le mea sa’o i luma o le Atua ma pe a tatou faia se mea sese i Lana silafaga.

O na filifiliga, e faitau selau i le tele o aso, e saunia ai le eleele mautu lea e fausia ai o tatou fale o le faatuatua. O le auivi uamea, lea e sasaa i ai le ‘anomea o lo tatou faatuatua o le talalelei lea a Iesu Keriso, faatasi ai ma ona feagaiga, sauniga, ma mataupu faavae.

O se tasi o ki i se faatuatua tumau, o le faamasino sa’o lea o le taimi e manaomia e maopo lelei ai. …

E le otometi ona maopo pe mautu i sina taimi, ae e umi se taimi. O le faasolo ina matua e le tupu fua. O le auauna atu i le Atua ma isi i le loto atoa ma le agaga e liliuina le molimau o le upumoni e avea ma malosiaga faaleagaga e le matineia.

O Fesili e Manatunatu Loloto I Ai

Pe e te manatuaina se taimi na tofotofoina ai lou amiosa’o patino? Na faapefea ona e tali atu i ai?
E faapefea ona faamalosia lou faavae faaleagaga i lou auauna atu i le Atua ma isi i le faatuatua?

Mafaufau e tusi ou mafaufauga i lau api talaaga pe talanoaina foi ma isi.