I Tala Fou

Liahona Ua Ofoina Mai i le Faa-Saina ua Faafaigofie

Ua mafai nei ona maua e tagata e tautatala faa-Saina le Liahona i le Faa-Saina ua faafaigofie.

E ono lomiga o le Liahona —o lomiga e lua o le konafesi (Me ma Novema) ma lomiga masani e fa (Ianuari, Aperila, Iulai, ma Oketopa)—o le a fatuina i le Faa-Saina ua faafaigofie i tausaga taitasi. O lomiga o Ianuari ma Aperila 2012 sa na o luga o le initoneti sa lolomiina ai; o le lomiga o Me o le uluai lomiga lea ua lolomiina.

Mo faamatalaga e uiga i le mauaina o lomiga taitasi o le mekasini po o le lesitala mo le mauaina o lomiga, faamolemole faafesootai Faletusi Autu pe asiasi i le store.lds.org.

Faamamafa e Mekasini a le Ekalesia le Mo Le Malosi o le Autalavou Tulaga Faatonuina

E amata atu i le masina lenei, ona faaali ai e mekasini a le Ekalesia se faasologa o tusiga e faamamafa ai tulaga faatonuina o loo otooto atu i le tamaitusi fou ua faafouina o le Mo Le Malosi o le Autalavou. O le faasologa o le a faaalia i le New Era ma itulau a le autalavou i le Liahona mo ni masina se tele (vagana ai lomiga o le konafesi); o tusiga taitasi o le a taulai atu i tulaga faatonuina eseese ma o le a tusia e se sui o le au peresitene aoao o Alii po o Tamaitai Talavou po o se sui o Fitugafulu.

O le a aofia ai i le Liahona ma le Ensign, se tusiga e tasi le itulau mo tagata matutua i le auala e mafai ai e matua ona aoao atu le tulaga faatonuina o lena masina i a latou fanau, ma, i taimi pe a tutusa ia autu i le Mo Le Malosi o le Autalavou ma autu i le O O’u Tulaga Faaletalalelei mo tamaiti o le Peraimeri, o le a i ai foi se tusiga mo tamaiti i le Liahona ma le Friend.

Ua Maua Nei le Polokalama o le Aoina Mai o Igoa a le FamilySearch

O le polokalama o le Aoina Mai o Igoa a le FamilySearch mo tagata e faaaogaina le iPhone ma le iPad ua fesoasoani i tagata taitoatasi e teu ma faasoa atu faamaumauga taua o gafa mai le lalolagi atoa i luga o masini feaveai.

O le polokalama, sa faalauiloaina i le pe tusa o le taimi lava e tasi na maua ai le Tusigaigoa o le 1940 a le Iunaite Setete mo le aoina mai o igoa, ua maua nei mo le siiina mai mai le Faleoloa o Polokalama a le Apple (masini iOS) po o le Google Play (lomiga Android).

E maua i le gagana Peretania ma le Sipaniolo, ua mafai nei e tagata e faaaogaina le polokalama ona tilotilo i vaaiga laiti —o se igoa, se nofoaga, po o isi faamatalaga laiti talafeagai—mai pepa o faamatalaga tusilima ua leva e pei o pepa fanau, pepa faaipoipo, po o faamaumauga o tusigaigoa. E na o le tusi (ao mai) lava e tagata o mea latou te vaaia, ae o le polokalama a le FamilySearch mo le faia o faasinoupu o igoa, e faaopoopoina ia faamatalaga i faamaumauga o gafa e leai se totogi lea e maua i le familysearch.org.

Ua mafai nei e tagata tautatala faa-Saina i itu eseese o le lalolagi ona faitau le Liahona i le faa-Saina ua faafaigofie.

O le polokalama fou o le faia o Faasino Upu o Igoa a le FamilySearch o le a mafai ai e tagata e toatele atu ona saofaga i le sailia o talafaasolopito o aiga i se tulaga laitiiti pe tele foi.