Mo Le Malosi o le Autalavou O SE TAULA MO LE ASŌ
Sa tusia e le Au Peresitene Sili ia tulaga faatonuina i le Mo Le Malosi o le Autalavou faapea “o le a fesoasoani ia te outou i filifiliga taua o loo outou faia i le taimi nei ma [filifiliga] o le a faia i le lumanai.”1 Faatasi ai la ma le faalauiloa atu o le lomiga fou o le tamaitusi, sa mafai e mekasini a le Ekalesia ona faaaluina sina taimi e faatasi ai ma le peresitene aoao o Tamaitai Talavou o Elaine S. Dalton ma le peresitene aoao o Alii Talavou o David L. Beck e talanoa ai e uiga i le toe faafouina o le tamaitusi.
Aisea ua i ai se lomiga fou o le Mo Le Malosi o le Autalavou i le taimi nei?
Brother Beck: E le i suia tulaga faatonuina a le Alii, ae peitai ua faateleina le saoasaoa ma le malosi o osofaiga a le fili i na tulaga faatonuina. Ua toe faafouina le Mo Le Malosi o le Autalavou ina ia fesoasoani i le autalavou e tetee atu i ia osofaiga.
Sister Dalton: O loo faaauau pea ona talanoa mai perofeta i upu matuai manino lava i le autalavou, ma e matou te mananao e faaavanoa atu pea a latou upu o i ai nei. E manaomia le taulai atu o le autalavou ina ia mulimuli i le perofeta, ma o lea ua faaaofia ai aoaoga lata mai i totonu o lenei tamaitusi.
Brother Beck: E pei ona faamanatu mai e Peresitene Thomas S. Monson ia i tatou, o loo tuputupu ae le autalavou i le aso i se vaitaimi ua faalautele ai le avanoa i le va o tulaga faatonuina a le Alii ma tulaga faatonuina a le lalolagi.2 Ua faatupulaia le malolosi o faaosoosoga, ma ua amata ona taliaina lautele ia amioga le mama. O le fautuaga musuia i lenei tamaitusi fou o se faailoga lea o le alofa o le Tama Faalelagi mo le autalavou. E finagalo o ia ina ia fiafia tagata talavou taitoatasi i faamanuiaga o le ola ai i le talalelei ma ua tuuina atu ia i latou ni tulaga faatonuina e fesoasoani ai ia i latou. O loo i ai Lana galuega taua latou te faia i le taimi nei. O le a fesoasoani tulaga faatonuina i le Mo Le Malosi o le Autalavou e faagavaaina i latou ina ia faataunuuina Lana galuega.
O a ni mea na toe faafou i lenei lomiga?
Sister Dalton: Ua faaopoopo i ai le “Galue ma le Faalagolago o le Tagata ia te Ia Lava”. O le toatele o le autalavou o loo faaaluina le tele o taimi i tekinolosi fou—fegalegaleaiga faalauaitele, autilo i luga o le Initoneti, taaalo i taaloga vitio—lea latou te le iloa lelei lava le auala e faaaoga ai. O se popolega lena mea aua afai ae alu se tagata talavou i se misiona, o nisi taimi e lei saunia ai o ia mo ni tulaga faigata o lena galuega faaletino ma le faaleagaga. E o faatasi lelei lava lenei mea ma le isi vaega fou: “Soifua Maloloina Faaletino ma Faalelagona.” E manaomia le maloloina o lou soifua faaletino ma ia tausi i lou tino, ae e manaomia foi lou mafaufau i lou soifua maloloina faalelagona.
Brother Beck: Ua tuuina foi se faamamafa faaopoopo i le mulimuli i le Agaga ma ia ola agavaa e auai i le malumalu.
E faapefea ona avea e le autalavou le Mo Le Malosi o le Autalavou ma se vaega o o latou olaga?
Sister Dalton: Ou te fia manao latou te sailia faamanuiaga ia na ta’ua i le tamaitusi ma mafaufau pe faapefea e nei faamanuiaga ona taitai atu i latou i a latou sini. Ou te matuai talitonu o loo saunia e lenei augatupulaga le lalolagi mo le Afio Mai Faalua o le Faaola. Ou te talosagaina le autalavou ina ia latou manatua e tutu faatasi ma le lototele i Ona luma pe a toe afio mai o Ia.
Brother Beck: O loo ofoina atu foi i tamaitusi o le Faataunuuina o Lo’u Tiute i le Atua ma le Alualu i Luma o le Tagata Lava Ia a Tamaitai Talavou le anoanoai o manatu lelei. Mo se faataitaiga, i le vaega o le “Ola Agavaa” i le Tiute i le Atua, ua valaaulia ai alii talavou ia suesue i tulaga faatonuina i le Mo Le Malosi o le Autalavou, ma fai se fuafuaga ina ia ola ai, ona faasoa atu lea o latou aafiaga i isi. O le faia o lena mea, e le gata ua faamalolosia ai a latou lava molimau, ae ua faamalolosia ai foi isi.
Sister Dalton: O le isi gaoioiga manaia o le fai atu lea i le autalavou e suesue i le Mo Le Malosi o le Autalavou ma lio uma mai taimi o loo ta’ua ai le Agaga. O le ola ai i nei tulaga faatonuina o le a mafai ai e i latou ona maua le mafutaga faifai pea ma le Agaga Paia. Ma i se taimi o loo faia ai e le autalavou ni faaiuga faigata i o latou olaga, latou te manaomia ai lena mafutaga.
Brother Beck: Ou te vaai foi i le tamaitusi o se punaoa sili mo le faasoaina atu o le talalelei; ma e mafai ona tatou faaaogaina e fesoasoani ai i le faamalamalamaina atu ia tatou uo le mafuaaga tatou te ola ai faapea. E mafai foi ona faaaoga e le autalavou e saunia ai lesona o afiafi faaleaiga, lauga i sauniga faamanatuga, po o lesona mo vasega i le Lotu—pe na o le sailia ai foi o ni tali i fesili e faatatau i tulaga faatonuina a le Alii. Ao faia e le autalavou nei mea, o le a atili oo atu i le loloto o o latou loto ia aoaoga ma mataupu faavae o i le Mo Le Malosi o le Autalavou ma avea ai ma se vaega o loo avea ai i latou.
O le a se mea e te ta’u atua ia i latou o e mafaufau e faigata le tausiaina o nei tulaga faatonuina i le lalolagi i le aso?
Sister Dalton: Ou te fai atu, “Ioe e te sao, e faigata.” Ae ou te toe faamanatu atu ia i latou e sili atu le faigata pe afai e te le tausia tulaga faatonuina. E faafaigata e le agasala lou olaga ma tatai atua oe e feagai ma mea e te le manao i ai. Ou te faapea atu o le ola ai i tulaga faatonuina o i le Mo Le Malosi o le Autalavou o se ki lea i le fiafia, ma e mananao uma lava tagata ina ia fiafia.
Brother Beck: E le mafai ona faatusalia mea e ofo mai e lenei lalolagi i le uunaiga faamafanafana a le Agaga Paia, le tulaga faamalieloto o le iloaina lea ua fiafia le Tama Faalelagi ia te oe, po o le agai atu i le mana o feagaiga o le malumalu. O faamanuiaga ia na folafola mai ia i latou o e usiusitai i tulaga faatonuina a le Alii.
Sister Dalton: O le toatele o tamaitai talavou latou te fai mai, “Sa ou faia se mea leaga, ma e le mafai ona ou toe sau i le lotu.” Ona amata lea ona latou faia ni amioga le lelei. Ae ou te fai atu, “E mafai ona e salamo. E mafai ona e suia, ma o le taimi lenei. O le aso lenei. O lou taimi lenei.”
O le a se fautuaga e te avatua i le autalavou o e le maua se lagolagosua tele mai le aiga i le ola ai i nei tulaga faatonuina?
Brother Beck: Ou te talitonu ua tuuina i tatou taitoatasi e le Alii i se nofoaga e sili atu mea lelei e mafai ona tatou faia e faaaoga ai nei meaalofa faaleagaga ua Ia tuuina mai ia i tatou. Afai e le tutusa lou tuuto ma lou aiga i le ola ai i tulaga faatonuina a le Alii, aua le fiu. Faaauau pea ona ola i le auala e te iloa e tatau ona e ola ai, aua e te le iloaina lava po o ai o lou aiga o loo matamata mai ia te oe ma maua le malosi faalilolilo mai au faataitaiga.
Sister Dalton: Ia manatua foi, i taimi uma po o ai oe. Sa faapolopoloina oe ina ia e i ai i le lalolagi i le taimi nei aua e malosi lau molimau i le Faaola. Sa e faamaonia lena mea i le lalolagi o le muai olaga. Faapei ona taua e Brother Beck, o lou ola ai i tulaga faatonuina e ono iu ai lava ina faamanuiaina lou aiga. Aua nei faia se fetuunaiga. Aua le fiu. Pe a tatou ola i nei tulaga faatonuina, e mafai ona avea i tatou ma se malamalama. E mafai ona tatou faasusulu atu le malamalama o le Faaola.
O a ni faamanuiaga o le a oo mai i le autalavou pe a latou ola i tulaga faatonuina?
Brother Beck: Ua folafola mai e le Alii le anoanoai o faamanuiaga matagofie mo i latou o e faamaoni i tulaga faatonuina sa Ia faatuina. O nisi e vave: o le mafutaga ma le Agaga Paia, filemu o le mafaufau, ma le faateleina o le faatuatua ma le talitonuga. O taimi uma lava tatou te usiusitai ai i se poloaiga, ua faatupulaia lo tatou gafatia ia usitai.
Sister Dalton: O loo fai mai le lalolagi, “Faataitai i mea uma. Ona o la e te talavou i le taimi nei, e mafai ona e faataitai.” O le mea e tupu pe a e mulimuli i lena savali e pei o se faatumu e amata lautele ma oo lava ina lauitiiti i le pito i lalo. E amata ona faatapulaaina e na filifiliga lou faitalia. O gaoioiga e mafai ona taitaiina atu i se mausa. O sina taimi o le fiafia e mafai ona taitaiina atu ai i le to fale po o se suiga o le fuafuaga o lou olaga. Peitai afai o le a e savali i se ala sao—faau i lalo le faatumu—ma usitai i tulaga faatonuina a le Alii, o le a tatalaina mai le lalolagi atoa ia te oe ma tuputupu ae lautele ao e tausia poloaiga. Nai lo le noatia i au mea sese, o loo ia te oe le saolotoga e te ola ai i se ituaiga olaga o le a e maua ai le fiafia.
Brother Beck: O loo manaomia e le lalolagi ni tagata talavou o e malamalama i le taua o nei faamanuiaga ma le auala e agavaa i ai. E anoanoai au uo ma lau tupulaga o e o loo sailia se isi auala e ese mai le lalolagi, o e o loo mananao i mataupu faavae moni e fausia ai i luga o latou olaga. Pau lava le mea o loo latou mananao mai i ai, o lau faataitaiga lea ma lau molimau.
Pe e te fia faasoaina atu se isi mea i le autalavou?
Sister Dalton: O le savali ou te tuu atu i le autalavou e faapea, o le salamo e le o se mea leaga; o se faamanuiaga. Na saunia e le Faaola mo i tatou le gafatia e salamo ai. Aua le faatali. E mafai ona tatou suia, ma o le a fesoasoani lena mea ia i tatou e ola ai i tulaga faatonuina. E mafai e se alii talavou po o se tamaitai talavou amiomama ua taitaiina e le Agaga ona suia le lalolagi. E mafai ona avea oe ma lena toatasi.
Brother Beck: Matou te alolofa ia te oe, ma e matou te fiafia i lou lelei. E mataina ma faagaeetia mo i matou le molimauina o lo outou faamaoni. Afai e te lagonaina le tuua toatasi, ia manatua o loo i ai le faitau afe o le autalavou e pei lava o outou i le salafa o le lalolagi o e ua tuuto i le tausia o tulaga faatonuina a le Alii. Ia manatua foi e mafai ona avea le Agaga Paia ma au soa faamaoni. Ia ola agavaa mo Lona faatasi mai, mulimuli i Ana uunaiga, ma tuu atu ia te Ia e faamafanafana oe pe a e manaomia. E alofa le Tama Faalelagi ia te oe ma talitonuina oe. E i ai ni mea maoae o loo faapolopolo mo oe.
Agavale, luga: ata na tusia e Robert Casey; taumatau: Ata o Keriso, saunia e Heinrich Hofmann, faaaloaloga a C. Harrison Conroy Co.
Ata pue o auala © Plainpicture/Hasengold