O Lo Tatou Avanoa
Aisea e Tulai mai ai Tofotofoga?
O taimi uma lava tatou te mafaufau ai pe aisea ua maua ai o tatou faafitauli e tusa lava pe o tatou tausia ia poloaiga ma ola ai i le talalelei. Aua nei galo ia i tatou, na tatou o mai i lenei lalolagi ina ia tofotofoina. Pe a tatou manumalo mai tofotofoga ma faaali atu i le Tama Faalelagi e ala i a tatou filifiliga tatou te alolofa ia te Ia, o le Ia faamanuiaina i tatou ina ia pulea e le Agaga o le Alii totonu o o tatou aiga.
Kahellyn V. (lalo), Venesuela
Tiute i le Atua
Sa ou galue lava e faamaea lo’u Taui i le Tiute i le Atua, i le taimi sa ou nofo ai i Venesuela faapea foi ma le taimi ina ua matou siitia atu ma lo’u aiga i Saina.
O le polokalama o le Tiute i le Atua e moni lava e musuia. E mafai e se alii talavou ona aoao ni mea matagofie o le a faaaogaina i lona olaga atoa i le faamaeaina lea o sini i le polokalama. O le a ia aoaoina ni mea faaleagaga, mea faalelalolagi, mea faaletino, ma le tele o isi mea.
E matua aoga ai lava le taumafaiga o le tuuto atu o oe lava i le faamaeaina o nei sini. Ua ou aoao ina ia avea ma se tagata lelei atili, ua faatupulaia la’u molimau i le talalelei a Iesu Keriso, ma ua ou lava saunia ina ia maua le Perisitua Mekisateko ma auauna atu faamisiona. E ese le faafiafia loto o le iloaina o le a mafai ona avea au ma se faataitaiga lelei mo la’u fanau i le lumanai i se aso.
Jonathan A., Saina
O Le Mau e Sili Ona Ou Fiafia i Ai
O lenei mau ua faamalosia ai lo’u faatuatua aua ua faaali mai e Nifae sa ia usiusitai lava ma faia le mea na finagalo le Alii na te faia ao feagai ma luitau. Ma sa faamanuiaina o ia e le Tama Faalelagi mo lena mea.
Kaila T. (luga), Filipaina
Alualu i Luma o le Tagata Lava Ia
O le aso 27 o Fepuari, 2011, sa ou mauaina ai lo’u Faailoga o le Tulaga Faatamaitai Talavou. Ua ou fiafia ua mae’a la’u polokalama o le Alualu i Luma o le Tagata Lava Ia, ma sa ou tausia au lava ia mama, ma ua mafai ona ou ulaina ma le mitamita la’u asoa. Ou te iloa e fesoasoani le faalapotopotoga a Tamaitai Talavou ina ia tatou alualu i luma ma saunia i tatou lava mo se faaipoipoga i totonu o le malumalu paia. Ou te faafetai i lo’u Tama Faalelagi mo lenei faalapotopotoga. O le mauaina o la’u asoa, ua ou faamaeaina ai se tasi o a’u sini, ma e ou te iloa e mafai ona faaauau pea ona ou faia ni galuega lelei mo le Alii.
Katherine M., Venesuela
Mauaina o se Molimau Patino
Sa ou fanau i totonu o le Ekalesia, ma e lei i ai tele sa’u molimau pe ana le amata ona ou faitau i tusitusiga paia ma se faamoemoega manino. Nai lo le na o le faitau i upu i luga o le pepa, sa ou sailiili loloto i o latou uiga. Sa ou faitau i le 3 Nifae 11:3, ma sa ou tuuina au lava i tulaga o tagata. Sa faateia au e lena mau faapea ma le isi na sosoo ai. Talu mai lena taimi sa faaauau pea ona ou faitau i tusitusiga paia ma tatalo ma le faamaoni, ma sa faatupulaia la’u molimau.
Ryan R., Uosigitone, ISA