Mga Senior Missionary: Pagtubag sa Panawagan sa Propeta
Ang mga senior missionary sa tibuok kalibutan naghisgut og dagkong mga ganti sa pagbuntog sa mga babag sa pagserbisyo og misyon.
Sila si Chanta ug Sounthara Luangrath naglingkod sa ilang panimalay sa California, USA, naghunahuna kon unsa ang ilang angayang buhaton. Ilang giandam ang ilang upat ka anak nga mag-misyon, ug karon sila nasayud nga ilaha nang turno. Ang desisyon mas lisud pa kaysa ilang gihunahuna: mingawon sila pag-ayo sa ilang mga apo! Nabalaka usab sila sa pipila ka mga problema sa panglawas. Ug unsa ang ilang buhaton sa ilang balay ug kabtangan samtang wala sila?
Ang mga kabalaka sa mga Luangrath sa pagserbisyo og misyon wala lamang mahitabo kanila. Sa pagkatinuod, si Elder Robert D. Hales sa Korum sa Napulog Duha ka mga Apostoles miila og upat ka kategoriya sa mga babag sa buhat sa senior missionary: kahadlok, kabalaka sa pamilya, pagpangita sa eksaktong oportunidad nga mag-misyon, ug panalapi.1
Ang pagbuntog niining mga babag nanginahanglan og dakong hugot nga pagtuo, usa ka kinaiya nga gipakita sa mga Luangrath sa dihang ilang nadungog ang panawagan ni Presidente Thomas S. Monson nga nanginahanglan og dugang mga misyonaryo niadtong kinatibuk-ang komperensya sa Oktubre 2010. “Among nabati ang kusog nga pagdasig sa Espiritu,” sila namalandong. “Gusto namong sundon ang propeta, busa gisumiter namo ang among mission application.”
Ang mga Luangrath gitawag sa pagserbisyo isip humanitarian missionaries sa Laos, ang yuta asa sila natawo, nagdako, ug naminyo. Nawala ang ilang kabalaka samtang nangandam sila sa pagserbisyo: gisuportahan sila sa ilang pamilya, gisulbad nila ang ilang problema sa panglawas, ug gipaabangan nila ang ilang balay. Sila masaligon samtang ilang gibuhat ang sugo sa Manluluwas: “Lumakaw ka, … umanhi ka, ug sumunod ka kanako” (Marcos 10:21).
Ang mga Senior makaserbisyo og misyon sa daghang mga paagi ug sa daghang mga dapit. Sama sa ihulagway sa mosunod nga mga istorya, kon magserbisyo man og full- o part-time, isip magtiayon o single, sa ilang kaugalingon nga nasud o sa gawas, ang mga senior adult matinud-anong makabuntog sa mga babag nga nag-ali.
Pag-atubang sa Kahadlok
“Ang kahadlok sa wala pa mahibalo-i o ang kahadlok nga kita walay kahanas sa kasulatan o sa pinulongan makapaduha-duha kanato sa pagserbisyo. Apan ang Ginoo miingon, ‘Kon kamo andam dili kamo mahadlok’ (D&P 38:30). Ang inyong kinabuhi mao ang inyong pagpangandam. … Larga ug pagmatinud-anon lang sa inyong kaugalingon.”2
Elder Robert D. Hales sa Korum sa Napulog Duha ka mga Apostoles
Ang kahadlok makabalda sa misyonaryo nga buhat. Ang pipila sa mga tawo nahadlok nga kulang sila sa gikinahanglang mga kahanas ug kahibalo sa pagserbisyo. Ang uban nabalaka sa pagpuyo sa laing dapit sa kalibutan o makigtrabaho sa mga tawo nga dili nila kaila.
Si Sister Martha Marin sa Veracruz, Mexico, miatubang sa pipila sa iyang mga kahadlok samtang siya nagserbisyo og full-time sa employment resource center sa Puebla, Mexico. Siya dili komportable sa paggamit og mga computer, usa ka importanting ekipo sa employment center. Apan uban sa tabang ug suporta sa iyang kompanyon ug sa uban nga iyang katrabaho, iyang nakat-unan ang gikinahanglang mga kahanas. “Kini nga babag nahimong panalangin,” siya miingon. “Nasayud ko nga wala ko mag-inusara niini nga buhat.”
Si Sister Sondra Jones sa Utah, USA, gitawag sa pagserbisyo sa Marshall Islands uban sa iyang bana, si Neldon. “Nahadlok ko pag-ayo sa akong gisudlan. Dili gyud ko kaayo komportable sa pagtudlo sa ebanghelyo,” siya miingon. Human sa una niyang pagbati nga siya walay ikatampo, mihukom siya sa pag-focus sa iyang mga talento ug kahanas. Siya nakat-on sa paghigugma sa mga Marshallese ug nagserbisyo kanila pinaagi sa pagpanupi ug sa pagtudlo kanila og panahi.
Human sa 18 ka bulan iyang gibana-bana nga naka-700 siya ka tupi. Ang iyang kahinam sa pagpakigbahin sa iyang mga talento nakapahimo kaniya sa pagserbisyo ug pakigsuod sa gatusan ka mga tawo, naglakip sa mga miyembro sa Simbahan, investigator, ug uban pang mga sakop sa komunidad.
Pagsulbad sa mga Kabalaka sa Pamilya
“Unsa pa ka dakong gasa ang ikahatag sa mga apohan ngadto sa ilang kaliwatan kay sa pagsulti pinaagi sa buhat ingon man sa pulong nga, ‘Niini nga pamilya kami nagserbisyo og misyon!’”3
Elder Jeffrey R. Holland sa Korum sa Napulog Duha ka mga Apostoles
Ang paghunahuna nga mobiya sa nagkalisud nga mga anak o nagtubo nga mga apo ingon og dili maagwanta sa daghang mga tawo. Sa gihapon, ang mga misyonaryo nakakaplag nga ang ilang pagserbisyo nakapalig-on sa ilang mga pamilya sa paagi nga wala nila damha.
Sila si Raymond ug Gwen Petersen sa Wyoming, USA, nakaserbisyo og upat ka misyon. Ang ilang pagbiya alang sa ilang ikaduha nga misyon—ngadto sa Samoa sa ikaduhang higayon—sa sinugdanan usa ka hagit alang sa ilang mga anak, kinsa wala makasabut nganong ang ilang mga ginikanan kinahanglan nga moserbisyo og lain pa nga misyon.
Ang pamilya diha-diha dayon nakaamgo sa dagkong mga panalangin tungod sa ilang pagserbisyo. “Silang tanan milambo!” miingon si Sister Petersen. “Ang usa ka magtiayon nga wala pa makaanak napanalanginan og batang lalaki, ang usa adunay milagrosong pagkaayo sa kanser, ang anak nga may kakulangan milambo, ug ang uban nakasinati og dakong kalamboan sa ilang negosyo niadtong tuiga.”
Ang ilang kahago nagpakita og sundanan sa hugot nga pagtuo sa ilang kaliwatan. “Kami adunay upat ka apo nga nag-misyon karon nga nagsulti kanamo nga kami ang ilang inspirasyon aron magmisyon,” miingon si Sister Petersen. “Unsa pa man ang mas maayo nga ganti kaysa niana?”
Pagpangita sa Eksaktong Oportunidad nga Mag-misyon
“Kanunay akong mahingangha kon sa unsang paagiha nga ang giya sa Espiritu Santo motugbang sa mga kinaiya ug mga panginahanglan sa matag misyonaryo ug magtiayon sa nagkadako nga nagkadaiyang mga kahimtang sa misyonaryo nga pagserbisyo sa tibuok kalibutan.”4
Elder Richard G. Scott sa Korum sa Napulog Duha ka mga Apostoles
Pipila sa mga dapit nga gikinahanglan ang serbisyo sa senior missionary mao ang mga employment center, mga opisina sa mission, mga family history center, mga templo, ug mga visitors’ center. Ang mga aplikante makahangyo asa nila gustong moserbisyo, apan sa katapusan ang calling nagagikan sa Ginoo pinaagi sa Iyang propeta. Ang Ginoo nasayud sa saktong oportunidad sa pagmisyon alang sa matag andam nga single sister o magtiayon.
Nakat-unan nila ni George ug Hine Chase sa New Zealand nga ang ilang mission call angay lang gyud para kanila; sila nagmalipayon sa dihang daghan sa ilang kahanas ug mga talento sa pamilya nakatabang kanila sa ilang humanitarian nga buhat sa Papua New Guinea.
Si Elder Chase usa ka karpentero ug makatabang sa pagtimbang-timbang ug pag-organisar og mga proyekto sama sa paghimo og mga atabay. Si Sister Chase nagtrabaho sulod sa 18 ka tuig sa office management. “Ang akong kahanas sa administrasyon ug computer magamit kaayo,” siya miingon. Gihiusa niya ug ni Elder Chase ang ilang mga abilidad sa pagbuhat sa programa sa career workshop, pagtabang sa mga lumulupyo nga makakat-on og mga kahanas sama sa pagdumala sa oras, organisasyon, pagpangulo, pagpanglimpyo, ug komunikasyon.
Nagkahiusa, ang mga Chase migamit sa mga kasinatian nga ilang nakat-unan gikan sa ilang mga calling sa Simbahan ug —kasagaran—gikan sa pagkaginikanan. Samtang ang mga Chase nagtrabaho sa pag-apud-apod sa mga suplay para sa eskwela ug sa pagpalambo sa pag-atiman sa mga masuso, ang ilang kasinatian isip ginikanan nakatabang kanila nga makasabut sa giatubang nga mga kalisdanan sa lokal nga mga pamilya ug mga eskwelahan.
Pagtubag sa mga Panalapi
“Pagpakitambag sa inyong mga kapamilya ug sa inyong bishop o branch president. Ingon nga ang mga sulugoon sa Ginoo nakasabut sa inyong temporal nga sitwasyon, makadawat kamo sa mahangturong mga panalangin sa full-time nga misyonaryong pagserbisyo.”5
Elder Robert D. Hales sa Korum sa Napulog Duha ka mga Apostoles
Daghang mga magtiayon mibati nga sila walay igong kwarta sa pagserbisyo og misyon. Sila naghunahuna sa ilang mga galastuhan sa pagpuyo, medikal, ug sa balay ug naghunahuna unsaon sa pagbayad niining tanan. Ang mga lider sa Simbahan miila niining tinuoray nga mga problema ug giusab ang mga polisiya aron sa pagpagaan sa palas-anon (tan-awa ang sidebar sa wala). Sa gihapon, ang pagsulbad sa mga problema sa pinansyal nanginahanglan og hugot nga pagtuo, mabinantayong pagplano, ug pipila ka sakripisyo.
Sila si Leonard ug Vera Chisango sa Zimbabwe nakasinati og mga hagit bisan pa nga adunay epektibong plano. Sila nangandam nga mag-misyon sa ilang tibuok kinabuhi isip mag-asawa, ug sila nasayud nga ang ilang mga pension ug investment makasustento sa ilang unang misyon sa Templo sa Johannesburg South Africa. Apan samtang sila nagmisyon, ang ekonomiya sa kalit lang mihagsa, ug dako ang pagkunhod sa ilang mga investment.
Uban sa tabang sa ilang pamilya, ang mga Chisangos mipadayon sa ilang misyon. Ang mga panalangin niadto nga sakripisyo magantihon kaayo: maayo ang dagan sa negosyo sa ilang anak nga lalaki, na-promote sa trabaho ang ilang anak nga babaye, ug ang ilang mga anak nakakat-on sa pagtinabangay sa pagsuporta sa ilang mga ginikanan.
Daghang senior missionary nagpamatuod nga ang temporal nga gasto gamay ra kaayo ikompara sa mga panalangin nga nadawat diha sa pagserbisyo. Si Elder Peter Sackley, usa ka Canadian nga misyonaryo nga nagserbisyo uban sa iyang asawa, si Kelly, sa Area office sa Hong Kong, mi-summarized sa mga pagbati sa kadaghanan: “Mas dako og panalangin ang akong trabaho karon kaysa akong trabaho diha sa kompaniya.”
Pagbuntog sa mga Babag pinaagi sa Pagpalambo og Hugot nga Pagtuo
“Daghang mapaubsanong mga Santos sa Ulahing mga Adlaw nahadlok nga tingali dila sila takus sa misyonaryong buhat. Apan alang sa umaabot nga misyonaryo, ang Ginoo mihatag niini nga kasiguradoan: ‘Hugot nga pagtuo, paglaum, gugma nga putli, ug pagmahal, uban ang bug-os nga tinguha ngadto sa himaya sa Dios, nakahimo nila nga takus alang sa buhat.’”6
Elder Russell M. Nelson sa Korum sa Napulog Duha ka mga Apostoles
Sa pagtubag sa upat ka mga babag sa pagserbisyo sa senior missionary, si Elder Hales misugyot og yano nga solusyon: “Pagbaton og hugot nga pagtuo, ang Ginoo nasayud asa kamo gikinahanglan.”7 Ang hugot nga pagtuo makabuntog sa kahadlok, makalig-on sa mga pamilya, makatabang sa senior missionary sa pagkakita sa eksaktong oportunidad sa pagserbisyo, ug makatabang sa paghatag og pinansyal kahupayan.
Daghang katuigan ang milabay, ang ingon nga pagtuo naglambo sa usa ka batang babaye nga Polish, si Stanislawa Habel. Wala madugay sa iyang kinabuhi, ang iyang hugot nga pagtuo migiya kaniya sa pagdawat sa gipahiuli nga ebanghelyo ug dayon, isip hamtong, sa pagserbisyo isip misyonaryo sa family history sa Utah.
Ang pagserbisyo ni Sister Habel nagtudlo kaniya sa wala pa kaayo mahibalo-i nga sekreto: “Ang pag-misyon makapabata sa tawo.” Siya mipahiyom ug miingon, “Kon inyong kalimtan ang inyong mga babag, kamo makakat-on nga magmapasalamaton. Kamo makakat-on nga mahimong mahisama ni Kristo pinaagi sa pagserbisyo sa uban, ug kini mao ang pagpangandam sa pagpuyo uban sa Langitnong Amahan. Ang misyon makausab sa kinabuhi sa usa ka senior.”
Sa tinuoray, kini makausab, ingon man usab sa kinabuhi niadtong ilang mapainubsanong giserbisyohan.
Sila si Chanta ug Sounthara Luangrath, kinsa mibalhin sa California, USA, mitudlo sa Laos—ang yuta asa sila natawo ug nagdako ug karon nagserbisyo isip mga misyonaryo.
Si Sondra Jones nagserbisyo diha sa mga babaye sa Marshall Islands (sa wala, uban sa bana, nga si Neldon).
Si Martha Marin (sa layo sa tuo) full-time nga nagserbisyo sa employment resource center sa Puebla, Mexico.
Sila si Raymond ug Gwen Petersen nagserbisyo og misyon sa mga Samoan nga Santos sa Ulahing mga Adlaw.
Sila si George ug Hine Chase nagserbisyo isip direktor sa humanitarian sa Papua New Guinea.
Sila si Peter ug Kelly Sackley nagserbisyo sa Area office sa Hong Kong.
Sila si Leonard ug Vera Chisango nagserbisyo sa Templo sa Johannesburg South Africa (sa tuo).
Si Stanislawa Habel nagtabang sa mga patron sa Family History Library sa Siyudad sa Salt Lake, Utah.
Litrato sa Templo sa Johannesburg South Africa ni Craig Dimond © IRI
Ibabaw sa wala: Senior nga mga misyonaryo nga nagserbisyo sa Siyudad sa Salt Lake, Utah, nagtabang sa mga milalin gikan sa lain-laing mga nasud nga maka-adjust sa ilang bag-ong mga balay, lakip sa pamilyang Ntabwoba sa Rwanda, kinsa bag-ohay lang na-sealed didto sa templo.
SA IBABAW: GILITRATOHAN NI Robert Casey