Reirein te Euangkerio
Reiakina te Raoiroi n te Mweenga
Delbert L. Stapley e bungiaki n Ritembwa 11, 1896, i Arizona, USA. E katabuaki bwa te membwa n te Kooram n Abotoro n te Tengaun ma Uoman n Okitobwa 5, 1950, ao e beku n te kooram ni karokoa e mate n Aokati 19, 1978. Te maroroo aei n te bootaki n e taekinaki n te Brigham Young University ni Beberuare 1, 1977. Korobokian te maroroo aei n te taetae n Imatang e kona n reke n speeches.byu.edu.
Bon te tibwanga ao te kakabwaia irouia kaaro n reireiniia ao ni kataneiaiia natiia ni maiuakina te raoiroi.
Kaaro iai tibwangaia n reirei ao ni katei bannaia natiia aika uarereke imwaain ae e roko mwaakan Taatan ni kariiriia ao imwaain ae a roko n te ririki ae tebwi ma waniua, n riki ni bukintaeka imwiina imatan te Atua. … Te Uea e a tia n anganiia kaaro ririki aika a kakaawaki, n aia moan ririki ni maiuia ataei ngke a tuai ni bukintaeka ibukin bwaai ake a taekini ao ni karaoi. Bon tibwangan ao kakabwaiaia kaaro bwa a na reirei ao ni kataneiaia natiia ni maiuakina te raoiroi.
Te kawai ae moan te tamaroa n reiakina te raoiroi ao te aro n te mweenga bon man te banna ni katotoo. Te kantaninga, kaaro a na kawakin oin maiuia ni maiuakina te raoiroi ao ae itiaki bwa e na kona ni uaana ni kabonganaaki bwa te katotoo inanon maiuia n reiakiniia ao ni kataneiaiia oin natiia. [Beretitenti David O. McKay (1873–1970) e reireiniira:] “Ngkana ko na reiakina te onimaki iroun te Atua, kaota onimakinana i bon iroum, ngkana ko na reiakina te tataro, tataro i bon iroum, … ngkana ko tangiriia bwa a na rau, ngkanne bon mairoum kona kararoako man te kakauntaeka; ngkana ko kan karaoia natim ni maiuakina te raoiroi, n am tiatianiko i bon iroum, n tamaroan rongorongom, ngkanne katea nakoina te banna ni katotoo ae tau ibukin bwaai aikai ni kabane.”1 Ni karaoan anne e na karikii reirei aikai bwa a na rangi ni kakukurei nakoia natim, ao a na, reke kairaia akanne mai irouia kaaro, a kona ni kakorakoraia ni kaitara ana karirii Taatan, are a na kouru bwa e na kamaunai mauia ngkana a roko n te ririki ni bukinaki. Kaaro iai tibwangaia ni karikiia natiia bwa a na rikirake inanona ni kaineti ma te momoa aomata, nanoanga, taubaang, ao n ninikoria ni karaoi bwaai aika a eti n taainako. Te banna ni katotoo e rangi ni korakora riki nakon te reirei.
Te maiu n te mweenga ni katoabong e riai ni bootau ma reirein ara Ekaretia ao ara kainibaire. Arora n reitaki a riai ni bootau ma ara aro. Ataei a waekoa ni kinai aaro aika aki koaua. John Milton e taku bwa te aro ni kakaraoa ae buakaka bon tii te bure are e aiwa n aki ataaki ma tii te Atua ae ataia. Ataei, e ngae n anne, a rangi ni kakai namakin nakon bwaai aika a bure, ao a aki tangirii aaro aika a kairua ao a riribai aro ni kewe ao taan kewe. Ti ataia bwa ataei a kairaki riki man te reirei are ti maiuakin nakon are ti tataekini. Kaaro a riai n taainako ni kokoaua ma natiia, ni kawakin berita ake a karaoi nakoia n aki toki n tataekina te koaua. Bon kaaro ake a teimatoa ake a karekea te onimakinaki mai iroun natiia. Ngkana e namakinna te ataei bwa ko karinea ana onimaki ao ni manga kaokia, e na bon aki urua, ke ni kabaerekareka aram. …
Kaaro a bon riai n aki kauntaeka imataia natiia. N tabetai e riki te kauntaeka man kaetan bwaai ke ni boaakin te ataei. Temanna te karo e tiribure; are temanna e kaaitara. Ao te namakin ni katiteuanaaki n te mweenga, n aron are e rootaki iai te ataei, e a maunanako. Kaaro a kainnanoa bwa a na katiteuanaaki n ataa aron te kawai are a tangira iai te ataei bwa e na nako iai; bwa n tokina, e kona ni karaoi ana rinerine aika a bure are a riki mai mwiin anne. Richard L. Evans e taku: “Te marena imarenaia kaaro e bon aki raoiroi ao e kaminonano ao e kamemerea aan te utu. Naake e riai n taraa te ataei ibukin kairakina a riai ni katiteuanaaki n te kairiiri are a anga.”2 Ti ataia bwa ataei a rangi ni kainamakinmwaaka nakon taian aroaro n te utu ao namakin, a kona n namakina te un ao te kakaokoroaki are a kona n oota iai ao ni kabwaranakoi. …
Iai inaomatan te ataei n namakinna bwa inanon mweengana ao iai ana tabo ni katantan, te tabo ni katanaki man te kangaanga ao buakaka ake itinanikun te aonaaba. Te katiteuanaaki n te utu ao te etieti a kakaawaki bwa e na tauraoi nakon te kainnano anne. Bon akea riki te tabo teuana nakon te mweenga are e reke iai te koaua ao te kukurei ae aki toki ae kona ni kuneaki n te maiu aei. E kona ni karaoaki te mweenga bwa aekakin karawa; ni koauana, I katamneia karawa bwa e na reitinako n riki bwa te mweenga ae tamaroa n te maiu ikai iaon te aba.3 …
Te euangkerio are ti reirei iaona e bon koaua. E maiu Kristo, e maiu te Atua, ao mweengara ae mimitong a katauraoaki i eta ibukiia natina ni kabane ake a kakaonimaki. Bairea ngkai te aekaki ni mweenga ao n utu are ko tangiria ao aron karekan kainnanoia ataei ni kawakiniia iaon te kawai are eti are e na kairiia nakon te utu nakon te maiu are akea tokina n te mweenga ae te Tiretio. Te Atua e na kakabwaiai ngkami ni kabane, tariu ao mwaneu. I taku bwa ko kona n oota n ae mwaiti n te bwai are e a tia n taekinaki nakoim. Ao ni bairean ao ni uotakirakean mweengam n te katei ae e tabu e bon rangi ni kakaawaki nakoia aomata aika kairake ake a roko ni kakabwaia maium.
Kamataata n te tamnei iroun Craig Dimond © IRI