Mesaj Premye PREZIDANS LAN, Desanm 2012
Redekouvri espri Nwèl la
Sa gen dèzane pandan m te yon jèn ansyen, yo te aple mwen menm avèk kèk lòt moun pou n t al nan yon lopital nan Vil Salt Lake pou al fè benediksyon pou kèk timoun malad. Lè nou te rantre, nou te remake yon abdenwèl ak bèl limyè l byen klere e nou te wè pake ki te byen vlope anba branch byen deplwaye l yo. Apresa nou te pase nan koulwa kote tigason ak tifi yo—kèk ladan yo te gen bra yo oswa janm yo nan plat, gen lòt ki te gen maladi ki te petèt pa t ka trete rapidman—te akeyi nou avèk vizaj souriyan.
Yon jèn tigason, ki te malad anpil anpil, te mande m: “Kijan w rele?”
Mwen te di l non mwen, epi li te mande: “Èske w ap ban m yon benediksyon?”
Li te resevwa benediksyon an, epi pandan nou t ap vire ale pou n kite bò kabann ni, li te di: “Mèsi anpil.”
Nou te fè kèk pa, epi apre m te tande l di: “O, Frè Monson, m swete w jwaye Nowèl.” Epi yon gwo souri te parèt sou figi li.
Tigason sa a te gen espri Nwèl la. Espri Nwèl la se yon bagay mwen espere pou nou tout genyen nan kè nou ak nan lavi nou—non sèlman nan sezon patikilye sa a men pandan tout ane a tou.
Lè nou gen espri Nwèl la, nou sonje Li menm n ap selebre nesans Li a nan sezon sa a nan ane a: “Jodia, nan lavil David la, nou gen yon Sovè ki fèk fèt, ki se Kris la, Senyè a” (Lik 2:11).
Nan epòk pa nou an, espri bay kado a jwe yon gwo wòl nan selebre sezon Nwèl la. M ap mande m si nou pa ta pwofite mande tèt nou, Ki kado Senyè a ta vle mwen ba Li oubyen bay lòt moun nan sezon enpòtan sa a nan ane a?
Kite m sigjere ke Papa nou ki nan Syèl la ta renmen pou nou chak bay Li menm ak Pitit Gason l la kado obeyisans. Mwen santi tou ke Li ta mande nou pou nou bay tèt nou epi pou nou pa egoyis ni rapas ni gen lespri chirepit, jan presye Pitit Gason L la sigjere nan Liv Mòmon an:
“Paske anverite anverite, m ap di nou, yon moun ki gen lespri chirepit se pa mwen ki voye l, men se dyab la, ki … soulve kè lèzòm pou yo goumen nan kòlè youn ak lòt.
“Gade, se pa doktrin pa m, pou soulve kè lèzòm nan kòlè youn kont lòt; men, doktrin mwen se pou bagay konsa sispann” (3 Nefi 11:29–30).
Nan bèl dispansasyon plenitid tan sa a, opòtinite nou genyen pou nou renmen ak rann sèvis yo san limit, men yo pasaje tou. Jodia, gen kè pou nou fè rejwi, pawòl janti pou nou di, aksyon pou nou fè, ak nanm pou nou sove.
Yon moun ki te byen konprann espri Nwèl la te ekri:
M se Espri Nwèl la—
Mwen antre nan kay ki gen povrete, kote m fè timoun ki malad louvri je yo byen gran, ak bèl mèvèy.
Mwen fè menm moun ki egoyis la rilaks epi konsa sa mete yon bèl tach limyè nan nanm li.
Mwen fè moun ki aje a renouvle jenès li epi ri jan l te konn fè lè l te jèn.
Mwen kenbe womans vivan nan kè timoun, epi m klere somèy avèk bèl rèv majik.
Mwen fè pye ki enpasyan grenpe eskalye sonb ak panye byen ranpli, kote yo pati kite dèyè yo kè moun ki etone pou bonte ki gen nan mond lan.
Mwen fè pitit pwodig la poze yon ti moman nan chemen erans initil li a, pou l voye bay yon paran enkyè yon ti bagay ki fè l kriye ak lajwa—kriye ki efase rid chagren yo.
Mwen antre nan chanm prizon fènwa, kote m raple gason adilt ki dechire a sa ki ta ka genyen epi montre l pi bon jou ki ta kapab vini.
Mwen antre dousman nan kay blan plen doulè, epi bouch ki twò fèb pou pale jis tranble pou eksprime rekonesans elokan an silans.
Nan dè milye fason, mwen fè mond bouke a gade nan figi Bondye, e pandan yon ti moman bliye bagay ki piti ak mizerab yo.
Mwen se Espri Nwèl la.1
Mwen swete pou nou chak dekouvri yon espri Nwèl renouvle—Espri Kris la.
© 2012 pa Intellectual Reserve, Inc. Tout dwa rezève. Enprime nan Etazini Damerik. Apwobasyon Anglè: 6/11. Apwobasyon tradiksyon: 6/11. Tradiksyon First Presidency Message, December 2012. Haitian Creole. 10372 036
Ansèyman Ki Soti nan Mesaj Sa a
Pandan w ap pataje mesaj Prezidan Monson nan avèk fanmi an, panse pou mete aksan sou kesyon l poze sou ki kado Senyè a t ap renmen nou bay Li menm ak lòt moun yo nan sezon sa a. Ankouraje manm fanmi an pou yo ekri panse ak ide yo (oubyen, pou jèn timoun yo, fè yon desen) sou fason yo ka “dekouvri yon nouvo espri Nwèl—ki se Espri Kris la.”