President a Odzi Kan na n’Apamfo Amandzɛɛbɔ, Ɛbɔw 2013
Asomdwee mu, Yɛ Dzinn
Da kor bi, mfe a abasen kakra ekyir no, muwiee ɔfese dwumadzi no, menyaa nkenyan dzendzen bi dɛ menkɛsera kunafo bi a n’enyi efir a, ɔda mpanyinfo ahwɛdobea asoɛe a ɔwɔ Salt Lake City no. Mekãa me hɛn tsentsendo kɔr hɔ.
Ber a mehɛn ne dan mu no, muhun dɛ hɔ atɔ pan. Mibisaa ɔhwɛdofo no bea a ɔwɔ, na ɔkyerɛɛ me asado kwan no. Hɔ na muhun kunafo dɔfo yi a n’akyerɛbaa nye nyɛnko bi so abɛsera no no. Yɛbɔɔ mu twetwee nkɔmbɔ enyigye mu.
Yegu do rekasa no, banyin bi baa pia n’abow no ho dɛ ɔrebeyi nsã dɛw efi efir a ɔtɔn adze no mu no. Ɔmaa n’enyi do hwɛɛ me na ɔsee dɛ, “Dɛn ntsi, ɔwo nye Tom Monson.”
Mubuaa dɛ, “Nyew.” “Nna asɛ Hemingwayfo yi.”
Ɔkyerɛɛ dɛ ɔyɛ Stephen Hemingway, Alfred Eugene Hemingway a, ɔsoom dɛ me pamfo ber a nna meyɛ bishop mfe pii a abasen kɔ no, na mefrɛɛ no Gene no, ne babanyin. Stephen kãa kyerɛɛ me dɛ n’egya da ayarsã bea hɔ ara na ɔda owu abow ano. Me dzin ada Gene n’ano, na ebusua no apɛ dɛ hɔn nsa bɛkã me, mbom woenntum ennhu me tɛlɛfoon akyerɛw amba no.
Meserɛɛ kwan ntsɛmara na menye Stephen kɔr sor, kɔr me nkaano ɔpamfo no ne dan mu, bea a nna mba nkaa no ehyia mu no, a nna ne yer no otwaa mu kɔree mfe ndaansa nye yi. Ebusua no faa emi na Stephen a yehyiae wɔ asado bea no dɛ, ɔyɛ hɛn Ɔsor Egya Ne nyiano ma hɔn pɛ kɛse dɛ mubohu hɔn egya ansaana oewu, na metsie ne frɛ no. Mara so muhun dɛ ɔtse dɛmara, osiandɛ sɛ Stephen annhɛn dan no a meresera binom dɛm ber noara ɔbaa no mu a, nkyɛ murunnhu dɛ Gene mpo wɔ ayarsã bea hɔ.
Yɛmaa no nhyira. Asomdwee sunsum tahyee. Hɛn nsera nkitahodzi no yɛɛ ahomka, na nkyii mifiir edzi.
Adzekyee anapa no, tɛlɛfoon do ɔfrɛɛ no daa no edzi dɛ Gene Hemingway twaa mu kɔree—minitsi 20 ara a ɔgyee nhyira fiir emi na ne babanyin hɔ no.
Medzi kommyɛ mpaabɔ kyerɛɛ me ndaase maa Ɔsor Egya wɔ N’akwankyerɛ nhyɛdo a, okenyaan me ma mekɛseraa ahwɛdo asoɛe no, na ogyaa me kɔr me nyɛnko dɔfo Alfred Eugene Hemingway hɔ no.
Ɔyɛ a, modwen ho dɛ Gene Hemingway n’adwendwen dɛm ewimbir no—ber a Sunsum ne kan no fuaa hɛnho no, yɛbɔɔ ahobrɛadze mpaabɔ, na yɛmaa no asɔfodzi nhyira no—tse dɛ nsɛmfua a ɔwɔ ndwom “Owura, Ehum no Rutu Dzen” mu no:
Tsintsim, O Ɔpomfo nhyiranyi!
Mma nngya monko bio,
Na enyigye mu na mobodwir nhyira ahɛngyinabea no
Na mahom wɔ esuagya dwuodwoo no.
Meda ho pɛ dɛm ndwom no, na megye dase wɔ awerɛkyerkyer a ɔma no ho:
Epo a ehum n’ebufuhyew-apram no mpo
Anaa mbɔnsam anaa nyimpa anaa adze biara,
Esu biara nnkotum amen nsuhɛn a
Po nye asaase nye sor no Wura da no.
Hɔn nyina bɛyɛ wo pɛ enyigye mu:
Asomdwee mu, yɛ dzinn.1
Yedua enyisuwa nye nsɔhwɛ mu, suro nye awerɛhow mu, yedua akomayaw nye ankonamyɛ ber a yɛahwer dɔfo bi, dze nya taduasi dɛ abrabɔ yɛ daapem. Hɛn Ewuradze na Agyenkwa yɛ iyi ho dasefo ɔtseasefo.2Ne nsɛm a ɔwɔ kyerɛw krɔnkrɔn mu no dɔɔsõ: “Hom nyɛ dzinn, na hom nhu dɛ emi nye Nyame”(Ndwom 46:10). Megye nokwar yi ho dasse.
© 2013 odzi wɔ Intellectual Reserve, Inc. Wɔakora ho tumdzi nyina. Wotsintimii wɔ USA. Ngyirisi kasa ho mpendo: 6/12. Nkyereasee ho mpendo: 6/12. First Presidency Message, March 2013, ne Nkyerɛasee. Fante. 10663 502