Raon long Jos

Singaot blong Ol Foto blong Yut

Stamba Toktok blong Miutuol blong yia ia hem i “Stanap long ol tabu ples mo no muvmuv” (luk long D&C 87:8). Ol yang man mo ol yang woman. Liahona i stap lukaotem ol foto blong yufala taem yufala i stap stanap long ol tabu ples. Ol foto ia oli save soem yufala i stap spendem taem wetem famle, stap givim seves, mekem misinari wok, stap mekem art, stap stadi long gospel, stadi long envaeromen, mo sam moa! Hemia olsem wanem blong sendem foto blong yufala:

• Mekem wan i tekem wan foto blong yu we yu stap stanap long wan tabu ples.

• Imelem foto we i hae kwaliti foto i go long [e-mail].

• Putum wan mesej we i talem from wanem hem i wan tabu ples long yu.

• Long imel blong yu, plis putum ful nem blong yu, deit we yu bon long hem, nem blong wod mo stek (o branj mo distrik), mo wan imel adres blong papa mo mama blong yu.

Ol foto blong yut raon long wol bae oli kamaot long nekis namba blong Liahona.

Aposol I Visitim Moroko

Long Disemba 2012, afta we oli krietem namba 3000 stek blong Jos long Siera Leone long Wes Afrika, Elda Jefri R. Holan blong Kworom blong Olgeta Twelef Aposol i bin mekem wan spesel visit long wan branj blong Jos long Rabat, Moroko we i smol mo stap hemwan.

Long wan spesel Sandei naet divosen, Elda Holan i bin serem lav we ol lida blong Jos oli gat long evri memba blong Jos raon long wol, nomata sapos i gat smol nomo o sapos oli stap longwe.

“Oli no fogetem yufala, mo yufala i pat blong wan bigfala wok olsem we Lod i talem mo from kambak blong Isrel long las dei ia i stap hapen kwik,” hem i talem.

Oli Dediketem Tegusigalpa Honduras Tempol

Long Sande 17 Maj 2013, folem wan kalja selebresen mo tri wik open haos, Tegusigalpa Honduras Tempol oli bin dediketem long tri sesen, we oli bin brodkastem i go long evri Jos yunit long Honduras mo Nikaragua.

Ol memba blong Honduras, we oli bin travel, olsem oltaem, blong sam aoa i go long Guatemala Siti Guatemala Tempol, oli glad blong luk fas tempol long kantri blong olgeta we oli dediketem. Fas Presidensi i bin anaonsem fas taem long wan leta we deit blong hem i 9 Jun 2006, mo oli bin brekem graon long ples blong bildim tempol long 12 Septemba 2009.

Presiden Monson I Visitim Jemani

Let long 2012, Presiden Tomas S. Monson i bin travel i go long Jemani blong mit wetem ol memba blong Jos long Hambeg, Belin, Munik, mo Frankfet, Jemani, mo blong askem strong long olgeta blong folem Jisas Kraes.

Hem i bin talem long ol memba blong Frankfet: “Hem i bin tijim fasin blong fogiv taem hem i bin stap fogivim man, Hem i bin tijim fasin blong gat sore mo lav taem Hem i gat sore mo lav. Hem i bin tijim divosen taem Hem i givim Hemwan.”

Ol yut raon long wol oli stap soem olsem wanem oli stap stanap long ol tabu ples.