Stap Ansa long Singaot Ia blong Gat Moa Misinari: Leftemap Tingting ia, Insaed long Hom mo long Jos, blong Kam Wan Misinari
Bisop Vikto Nogales blong Parkwe Jakabuko Wod, Buenos Aires, Ajentina Kongreso Stek, i sidaon long fored blong wan notisbod we i fulap long ol pikja blong 37 yang man mo woman blong wod blong hem. Taem wan long olgeta i go long wan misin, hem i putum wan not long saed blong pikja ia.
“Ol yang pipol blong mi oli glad tumas taem oli kam long ofis blong mi mo luk ol pikja mo ol not,” hem i talem. “I pusum olgeta blong rere from ol misin blong olgetawan.”
Wod ia long Buenos Aires i spesel from hem i stap olsem eksampol ia blong spirit blong misinari wok. Long ol fas sikis manis blong yia 2012, 19 yut—14 long olgeta oli konvet—mo livim ol hom blong olgeta blong go long ol fultaem misin long eit kantri. Bitim 80 pesen long ol yut we oli save go long wan misin, oli bin komitim olgeta blong go long misin.
Long ol yia we oli jes pas, ol lida blong Jos oli bin mekem sam rikwes blong i mas gat moa yang pipol blong givim seves mo go long misin.
Long Epril 2005 jeneral konfrens, i no longtaem afta we Jos i rilisim Prijim Gospel blong Mi: Wan Gaed long Misinari Seves, Elda M. Rasel Balad blong Kworom blong Olgeta Twelef Aposol i bin givim kaonsel long ol famle mo lida blong leftemap tingting blong gat wan misinari spirit mo mekem moa yang man mo yang woman oli rere blong givim seves wetem ona taem ol famle mo lida ia oli helpem olgeta oli andastanem huia olgeta mo taem oli tijim doktrin long ol yangfala ia (luk long “One More,” Liahona, Mei 2005, 69).
Anaonsmen blong Presiden Tomas S. Monson long Oktoba 2012 jeneral konfrens se yia blong ol misinari blong save go long misin i go daon olsem blong rimaenem bakegen nomo se Lod i stap muvum kwik wok blong Hem.
Tedei plante famle mo lida blong Jos oli tekem ol mesej ia insaed long hat blong olgeta mo putum wan gud praktis blong misinari seves long ol eria blong olgeta.
Stap Helpem Ol Yut blong Oli Andastanem Huia Olgeta
Long ansa blong kwestin ia: “Olsem wanem yu bin mekem blong rere plante yut blong yu blong wantem givim seves long misin?” Bisop Nogales i bin ansa: “Taem oli bin singaotem mi olsem bisop, fas samting mi wari long hem, i bin ol yang pipol blong wod blong mi, mo mi bin mekem i klia long ol narafala lida blong wod se mifala i nidim blong kam pat blong laef blong olgeta.”
Eksampol, evri misinari blong Jakabuko oli bin gat ol koling long wod blong olgeta bifo oli go. Plante taem, oli bin invaetem ol niu konvet mo lesaktiv memba blong givim seves olsem ol tija, we i bin helpem olgeta blong tijim gospel.
Bisop Nogales i arenjem tu blong ol yut oli rere long saed blong spirit blong go long wan misin taem oli bin wok wetem ol lokol fultaem misinari.
Taem ol lokol lida mo memba blong Jos oli bin komitim olgetawan long ol yut blong wod, oli bin kasem riwod taem oli luk misinari spirit i stap gro bigwan.
Famle we I Gat Strong Tingting long Misinari Wok
Gat mo Elois Andrus blong Drepa, Yuta, YSA, oli save wanem i minim blong gat famle we i gat strong tingting long misinari wok. Oli gat 17 apuboe we oli bin go long misin, mo tufala i bin go long sikis misin.
Blong leftemap tingting blong gat wan spirit blong misinari wok insaed long famle blong yu, i wan samting we i stat taem ol pikinini oli yang, Brata Andrus i talem.
Sista Andrus i bin agri: “Yu no tokbaot, ‘blong go long wan misin,’ olsem wan kwaet hop, be yu tokbaot blong go long misin long ol pikinini mo ol apupikinini blong yu olsem se, hemia, i no wan kwestin—yu talem: taem bae yu go long misin blong yu, be i no sapos, yu go long misin blong yu.”
Blong stap tijim ol yut huia olgeta taem yu setem wan eksampol blong misinari seves, i impoten tu. Brata mo Sista Andrus oli bin akseptem fas koling blong olgeta long 1980, stret long taem we las bon boe blong tufala i stap aot i go long misin blong hem.
Wan apuboe i bin raet long olgeta afta we hem i kasem wan presen we tufala i bin sendem blong hem i rere from misin blong hem. “Hem i bin talem tangkyu long mifala [from presen ia], be hem i talem, ‘Moa impoten i blong talem tangkyu from eksampol we yutufala i bin soem,’” Sista Andrus i bin talem.
Stap Tijim Doktrin
“Ol yut blong yumi oli gat raet blong ting se papa mo mama blong olgeta, mo ol lida mo ol tija blong olgeta long Jos bae oli luk se oli save mo andastanem gospel blong Jisas Kraes,” Elda Balad i talem. “Tabu Spirit bae i konfemem trutok long hat blong olgeta mo Spirit ia bae i laetem Laet blong Kraes insaed long sol blong olgeta. Mo afta, bae yu gat wan moa misinari we i rere fulwan” (M. Russell Ballard, “One More,” 71).
Samples 9,600 km longwe long Buenos Aeres, rural branj blong Hos-sus Ben kolosap Boas, Aedaho, YSA, i bin luk namba blong misinari wok i kam antap bigwan taem ol famle mo lida oli bin traehad blong wokhad moa blong tijim gospel long ol yut blong olgeta.
Long wan smol branj blong 75 memba, naen yang pipol oli go long misin.
Elda Rasel M. Nelson blong Kworom blong Olgeta Twelef Aposol i bin tokbaot bigwan ol risen mo ol riwod blong go long wan misin. “Evri misinari … oli givim seves wetem wan hop ia nomo blong mekem laef blong ol nara pipol i moa gud,” hem i talem. “Desisen ia blong go long wan misin bae i jenisim laef long saed blong spirit, blong wan misinari, hasban o waef blong hem, mo laen blong tufala blong ol jeneresen we oli stap kam. Wan strong tingting blong wantem givim seves i kamaot tru long fasin blong jenisim laef fulwan, stap klin inaf, mo fasin blong stap rere” (“Ask the Missionaries! They Can Help You!” Liahona, Nov. 2012, 18).
Matin Woka, presiden blong Emet Aedaho Stek, i bin agri. “Blong stap givim seves long wan misin, i putum wan yang man o woman long wan rod we bae i lidim laef blong ol jeneresen,” hem i talem. “Olsem wan stek, yumi mekem evri samting we yumi save mekem, blong rere ol yang pipol from misinari wok.”
Pat blong fasin blong mekem ol yut oli rere, i gat tu blong tijim doktrin long ol yut. Ol yut long Hos-sus Ben Branj i save go long klas blong fasin blong stap rere olsem wan misinari evri wik we wan foma misin presiden i stap tijim—trening ia i givhan long misinari trening we i kam long stek miting blong rere long ol misinarai we i tekem ples evri manis, mo trening we i kam long Kamp blong Aronik Prishud wan taem long wan yia.
LaRen Adam—wan long ol sikis pikinini blong Brata mo Sista Andru—i bin givim seves long saed blong hasban blong hem, Jim, long Kopenhagen Denmak Misin stat long 2007 kasem 2009. Hem i bin testifae long olsem wanem i impoten blong tijim gospel long ol pikinini insaed long hom.
“Wan long ol bigfala samting we yu save mekem blong helpem ol pikinini blong yu blong bildimap wan testemoni blong misinari wok, i blong gat famle haos naet mo famle skripja stadi,” hem i talem. “Sapos yu givim olgeta ol stamba fandesen ia blong gospel stadi mo save ia long gospel, oli rere moa gud mo save moa gud moa abaot gospel.”
Bisop Vikto Nogales i stanap long notisbod we i soem evri yut blong wod blong hem, wetem olgeta we oli stap givim seves naoia long misin.
Foto we Pol L. Gavin i glad blong givim