Wol Lidasip Trening—Wan Niufala Fasin blong Tij
Long ol manis we oli stap kam, ol memba blong Jos raon long wol bae oli tekempat long wan tabu mo niufala fasin blong tij long Wol Lidasip Trening.
Hemia i no semmak long ol trening miting blong fastaem, Wol Lidasip Trening blong yia ia bae i no brodkas wan taem nomo long ol wod mo stek lida. Be, oli seperetem long naen sot pat—long wan DVD mo long LDS.org—we i leftemap tingting blong evri lida, ol memba, mo ol famle blong toktok raon long olgeta truaot long yia ia mo afta tu.
Tingting blong trening ia hem i “Mekem Famle mo Jos I Kam Strong Moa Tru long Prishud.” Long trening ia, ol memba blong Fas Presidensi mo Kworom blong Olgeta Twelef Aposol, wetem ol nara Jeneral Atoriti mo jeneral ofisa, oli givim ol tabu tijing long:
-
Olsem wanem ol famle oli save faenem paoa mo pis tru long paoa blong prishud.
-
Olsem wanem blong helpem evri famle blong eksperiensem ol blesing blong prishud.
-
Olsem wanem olgeta we oli gat ol prishud ki, oli mekem ol hom mo ol famle oli kam strong moa.
-
Olsem wanem blong tij long ol wei olsem hemia blong Kraes.
-
Olsem wanem blong lukaotem mo tijim ol pikinini long laet mo trutok.
Evri yunit blong Jos bae i kasem ol kopi blong DVD, mo oli askem ol wod mo stek kaonsel blong luk fulwan. Afta oli mas kaonsel tugeta long olsem wanem blong helpem ol memba blong wod mo stek blong save kasem samting aot long ol trening ia.
Long ol miting mo ol klas, ol memba oli save lukluk mo toktok raon long wanwan pat blong DVD ia. Ol famle mo wanwan man mo woman i save lukluk ol pat ia, wetem sam moa tul blong helpem stadi blong olgeta moa, long wwlt.lds.org.
Long evri ples, pat we i moa impoten long trening ia, bae i hapen afta we wan pat i ova mo fasin blong toktok raon i stat. Taem ol lida, ol memba, mo ol famle oli stap tingting hevi, oli serem, mo oli testifae long wanem oli bin harem mo filim, Tabu Spirit bae i givim inperesem long olgeta mo tijim olgeta long olsem wanem blong yusum instraksen ia long ol situesen blong olgetawan. Tru long ol eksperiens ia, Wol Lidasip Trening ia bae i helpem mekem famle mo Jos raon long wol i kam strong moa.
Elda L. Tom Peri, Elda Donal L. Holstrom, mo Bisop Din M. Devis, oli lidim wan panel toktok long olsem wanem i impoten blong yusum ol prishud ki.
Taem oli stanap aotsaed long haos blong Meri Filding Smit, insaed long pak ia we nem blong hem i Ples Ia Nao, Elda M. Rasel Balad, Linda K. Beton, Elda Ronal A. Rasban, Ilein S. Dalton, Rosmeri M. Wiksom, mo Bisop Geri E. Stivenson oli toktok raon long ol blesing blong stap gat prishud insaed long evri hom.