Faariro i te amuiraa ei tuhaa no to tatou oraraa

A feruri ia faaohipa i te tahi o teie mau ohiparaa e mau uiraa ei reni haamataraa no te hoê tau‘araa parau utuafare e aore râ no te tuatapaparaa a te taata iho.

E faaite te mau numera api i tapurahia i piha‘i iho i te mana‘o i te api matamua o te a‘oraa.

Na te mau tamarii

Ua paraparau te Peresideni Thomas S. Monson no ni‘a i te faufaa rahi no te haapa‘o e nahea te haapa‘o-ore-raa i te hopoi tamau mai i te mau faautu‘araa (api 89). A feruri i te hoê taime ua haapa‘o oe i te mau ture utuafare. A feruri na i te hoê taime ua haapa‘o oe i te mau ture a te Atua ? Eaha to oe huru a haapa‘o ai oe ?
Ua faati‘a o Elder M. Russell Ballard no te Pŭpŭ no te Tino Ahuru Ma Piti Aposetolo i te aamu o te hoê tamahine iti tei tanu i te hoê tomati na roto mai i te hoê huero na‘ina‘i (api 18). Ei utuafare, a tai‘o e aore râ a faahaamana‘o i teie aamu e a tau‘a parau i te mea ta te reira e haapii mai nei no ni‘a i te rave‘a ia riro mai te Metua i te Ao ra te huru. E nehenehe ta oe e haamau i te hoê opuaraa ia rave i te hoê mea no te haafatata atu i te Metua i te Ao ra.
Ua paraparau o Elder Enrique R. Falabella no te Hitu Ahuru no ni‘a i te mea o te haapuai i te mau utuafare (api 102). Ua haapii mai oia e, te tahi o te mau parau faufaa roa e faaohipa e to oe utuafare oia ho‘i « ua here au ia oe », « mauruuru roa », e « a faaore mai i ta’u hara ». Te tuahine Rosemary M. Wixom, peresideni rahi no te Paraimere, tei parau e, « Ua here au i te mau mea atoa no ni‘a ia oe » (api 81). A hi‘o eaha te mea e tupu ia faaohipa ana‘e oe i teie mau parau i to oe utuafare. E oaoa anei ratou ? Eaha to oe mana‘o no te reira ?

Na te feia apî

Ua haapii mai te Peresideni Thomas S. Monson e maha parau tumu no te faaineineraa no te rave i te ohipa misionare—eiaha noa ei hoê misionare rave tamau ei hoê melo no te Ekalesia atoa râ (api 66). E nehenehe ta oe e tuatapapa i ta’na a‘oraa e teie uiraa i roto i te feruriraa : Eaha te mea ta’u e rave no te riro ei hoê misionare maitai a‘e i teie nei ?
Ua haapii mai o Elder Jeffrey R. Holland no te Pŭpŭ no te Tino Ahuru Ma Piti Aposetolo e, aita e fifi ia tae mai te feaa e te mau uiraa, ua haapii atoa mai râ oia e : « A tape‘a maite noa i te mau mea ta outou i ite a‘ena e a vai puai noa e tae roa’tu ua tae mai te tahi faahou â ite… Ia vai parau mau noa no te faaroo ta outou e mau ra » (api 93). A feruri e papa‘i i roto i ta oe buka aamu to oe mau ti‘aturiraa, te iteraa papû, e te tahi mau ohipa pae varua o ta oe i farii. A papa‘i atoa i ta oe mau uiraa e a tape‘a noa i te reira e a tai‘o ai oe i te mau papa‘iraa mo‘a e teie ve‘a, e nehenehe ta oe e imi i te mau pahonoraa.
E rave rahi taata a‘o tei paraparau mai no ni‘a i te haapa‘oraa e to te reira mau haamaitairaa. Ei hi‘oraa, ua haapii mai te peresideni Monson e, « A haapa‘o ai tatou i te mau faaueraa a te Atua, ei reira tatou e farii ai i te ite i te parau mau e i te mau pahonoraa i ta tatou mau uiraa rarahi » (api 89). A feruri i te imi i teie tumu parau no te peni û mai e aore râ no te tapa‘opa‘o mai i te mau haamaitairaa rau o te haapa‘o. Na te iteraa mai i teie mau haamaitairaa e nehenehe e faaûru mai ia oe ia tamau noa i te ora ma te parau-ti‘a.
E rave rahi taata a‘o tei haapii mai e, e nehenehe ta oe e tavini i te mau taime atoa, eiaha noa i roto i te mau opuaraa taviniraa. « A tavini i te mau mahana atoa », ua haapii mai te taea‘e David L. Beck, peresideni rahi o te Feia Apî Tamaroa. « Tei piha‘i iho noa ia tatou te mau rave‘a ». I roto i te a‘oraa a te taea‘e Beck, e nehenehe ta outou e tai‘o i te tahi mau hi‘oraa o te feia apî tei tavini ia vetahi ê (api 55).

Na te feia paari

E rave rahi mau taata a‘o tei faaite papû no Iesu Mesia. Eaha ta oe e nehenehe e haapii mai no ni‘a i To’na huru hanahana, ta’na misioni, ta’na taviniraa na roto mai i te mau a‘oraa i te mau api 22, 70, 96, 99 e 109 ?
Te tumu parau o te haapiiraa a te feia apî i te ava‘e no me, no ni‘a ïa i te mau peropheta e te heheuraa. Mai te mea te haapii ra oe i te feia apî i te fare pureraa e aore râ e taure‘are‘a ta oe i te fare, e nehenehe ta oe e tau‘a parau e o ratou i te haapiiraa e teie uiraa : No te aha e mea faufaa roa ia faaroo e ia pee i te mau peropheta ora ? A feruri i te tuatapapa i teie tumu parau no te ite mai i te mau tohuraa e te mau faaararaa, e mai te mea e haapa‘ohia, e tauturu te reira ia tatou ia manuïa i roto i teie tau hepohepo.
E rave rahi mau taata a‘o tei faatumu i ni‘a i te haapuairaa i te utuafare. Ei hi‘oraa, ua haapii mai o Elder Richard G. Scott no te Pŭpŭ no te Tino Ahuru Ma Piti Aposetolo e, « Ia riro ana‘e [te Faaora] ei tumu no to outou utuafare, e vai ïa te hau e te au maitai » (api 29). A imi i te mau rave‘a no te faariro i te Faaora ei niu no to oe nohoraa a tuatapapa ai oe i te a‘oraa a Elder Scott e tae noa’tu i te mau a‘oraa i te mau api 6, 81, 83 e 102.