I roto i te 183raa o te amuiraa rahi ua tupu te patururaa o te peresideniraa rahi apî o te Feia Apî Tamahine

« Ua haaputapuhia to tatou aau », te parau ïa a te peresideni Thomas S. Monson i roto i te tuhaa pureraa opaniraa o te 183raa o te amuiraa rahi matahiti i te 7 no eperera 2013, « e ua haapuaihia to tatou iteraa papû no teie ohipa hanahana e ua parahi mai te Varua o te Fatu i roto ia tatou. Ia haamanaʻo maoro na tatou i te mea ta tatou i faaroo i teie na mahana toopiti i maʻiri ».

E nehenehe ta outou e tauturu

Ua faaitoito mai te peresideni Thomas S. Monson e o Elder Russell M. Nelson no te Pŭpŭ no te Tino Ahuru Ma Piti Aposetolo i te mau melo ia tauturu i te afata moni rahi na te misionare. I te 4 no eperera 2013, e 65 634 misionare rave tamau e tavini nei, e hau atu i te 20 000 tei farii i to ratou piiraa.

I roto i te tuhaa pureraa iritiraa o te amuiraa rahi, ua parau te peresideni Monson, « No te tauturu i roto i te aupururaa i teie nuu misionare, e no te mea ho‘i, e rave rahi o ta tatou mau misionare e oraraa haehaa to ratou, te ani nei matou ia outou, ia au i tei roaa ia outou, ia horo‘a rahi i te afata moni rahi na te misionare o te Ekalesia ».

E nehenehe i te mau melo e horoʻa i ta ratou tuhaa na roto i te faaohiparaa i te parau aufauraa ô ma te tapaʻoraa i te moni ta ratou e hinaaro e aufau i raro aʻe i te afata moni rahi na te misionare o te Ekalesia. E nehenehe atoa i te mau melo e aufau na niʻa i te Itenatildsphilanthropies.org.

Ua hau i te 100 000 taata tei tae mai i roto i na tuhaa pureraa e pae o te amuiraa rahi i roto i te Pû Amuiraa i Roto Miti, Utaha, te mau Hau Amui no Marite, e afata teata, te peeutari, te ratio e te Itenati. Ua tiʻa i te mau melo ia faaroo i te amuiraa i roto e 95 reo na roto anei i te mau haapurororaa, na roto anei i te mau hohoʻa video, te mau raveʻa faaroo e te mau parau papaʻi i niʻa i te tahua Itenati LDS.org.

Ua iriti te peresideni Monson i te amuiraa matahiti na roto i te faaararaa i te mau faanahoraa no te paturaa i te hiero i Cedar City, Utah, te mau Hau Amui no Marite, e i Rio de Janeiro, Beresilia—ia amuihia te rahiraa hiero i faaarahia e o te patuhia nei, tei niʻa ïa i te 29 i teie nei, e 141 hiero e tere nei i teie mahana.

I roto i te tuhaa pureraa no te mahana maa avatea, e rave rahi tauiraa i ravehia i roto i te faatereraa o te Ekalesia. Ua haamauruuruhia te taatoaraa o te mau melo o te peresideniraa rahi o te Feia Apî Tamahine, e ua haamauruuruhia o Elder Walter F. González ei melo no te peresideniraa o te Hitu Ahuru. Ua haamauruuru-atoa-hia e pae ahuru ma hoê Hitu Ahuru Area.

Ua paturuhia o Elder Ulisses Soares no te pŭpŭ matamua o te Hitu Ahuru ei melo no te peresideniraa o te Hitu Ahuru.

Ei peresideniraa rahi apî no te Feia Apî Tamahine, ua paturuhia o Bonnie Lee Green Oscarson ei peresideni ; Carol Foley McConkie ei tauturu matamua ; e o Neill Foote Marriott ei tauturu piti.

Ua paturu-atoa-hia e toru melo apî no te Pŭpŭ Hitu Ahuru Matamua : Elder Edward Dube no Zimbabwe ; Elder S. Gifford Nielsen no Sugar Land, Texas, USA ; e o Elder Arnulfo Valenzuela no Queretaro, Mexico.

Ua tavini o Elaine S. Dalton, te peresideni rahi tahito o te Feia Apî Tamahine, i roto i te peresideniraa rahi no te Feia Apî Tamahine, ei tauturu e aore râ, ei peresideni, no te roaraa 11 matahiti hou a haamauruuruhia ai oia i te avaʻe eperera ra.

A hiʻo i te tapura taatoa o te mau patururaa e te mau haamauruururaa i niʻa i te api 26.

A hiʻo i te api 139 te haamaramaramaraa no ni‘a i te feia faatere i pii-apî-hia.