Elder Edward Dube

No te Hitu Ahuru

Ua haapiihia te evanelia ia Elder Edward Dube i te matahiti 1981 na te hoê fatu ohipa i reira oia i rave ai i te ohipa. Ua horoʻa mai te reira taata ia’na i te hoê Buka a Moromona. Aita oia i taiʻo i te reira buka e tae roaʻtu i te matahiti 1983, e ua putapû roa oia i te iteraa papû o Iosepha Semita no niʻa i te fâraa mai o Moroni, e no reira, ua farii oia i te aniraa ia amui atu i roto i te hoê pureraa iritiraa manaʻo i te farepureraa no Kwekwe, Zimbabwe.

Ua huru haamâ rii oia i te hamataraa, i te mea e, mai te huru ra e, e ti‘araa tavini to’na i mua i te rahiraa taata i reira.

« Ia faaite râ ratou i to ratou iteraa papû no niʻa i te Buka a Moromona, ua ite aʻera vau i te tahi mau tuʻatiraa to’u e teie mau taata », ta’na ïa i faahaamanaʻo, « e ua tiʻa ia’u ia faaite i to’u mau manaʻo no niʻa i te Buka a Moromona ».

I muri mai ua farii oia i te mau haapiiraa a te misionare, ua bapetizohia e ua tavini i roto i te misioni no Zimbabwe Harare.

I taua taime ra, ua haapii oia i te utuafare o Naume Keresiya Salazani, 16 matahiti i taua taime ra. Ua tamau noa ta raua haamâtauraa i muri aʻe i ta’na misioni e ua faaipoipohia raua i Kwekwe i te 9 no titema 1989. I te avaʻe me 1992 ua taatihia raua i roto i te hiero no Johannesburg Afirita Apatoa. E toru ta raua tamahine e hoê tamaiti.

Ua fanauhia o Elder Dube i te avaʻe me 1962 i roto i te mataeinaa no Chirumanzu, Zimbabwe, ia Clement e o Rosemary Dube, ua roaa ta’na parau tuʻite no te haapiiraa i Zimbabwe D. E. College i te matahiti 1992 e ua haere e rave i te ohipa i roto i te faanahoraa haapiiraa a te Ekalesia, e ua haamau i te faanahoraa o te séminaire e te institute i Zimbabwe, Zambia, e i Malawi. Ua haamaitaihia oia ia ite e rave rahi piahi ta’na i horoʻaʻtu i te parau haafetiaraa, ia tavini i roto i te mau tiʻaraa faatere o te Ekalesia i roto i taua mau fenua ra a tupu ai te Ekalesia i te rahi.

Ua tavini oia ei peresideni no te pŭpŭ peresibutero, ei peresideni amaa, ei peresideni mataeinaa, ei peresideni tĭtĭ, ei tauturu i roto i te peresideniraa misioni, e, mai te matahiti 2009 e tae atu i te matahiti 2012, ei peresideni no te misioni no Zimbabwe Harare. Hou a piihia ai oia i roto i te Pŭpŭ Hitu Ahuru Matamua, te tavini ra oia ei Hitu Ahuru Area.