Na Nomu iTavi Tabu ni Veiqaravi
O a ciqoma na kaukauwa, na dodonu, kei na itavi tabu mo veiqaravi ena gauna ga o tabaki kina ki na matabete.
Na Reki ni Veiqaravi
Kemuni na cauravou ena Matabete i Eroni, oi kemuni na luvena tagane daulomani na Kalou, ka tu Vua na veicakacaka cecere mo ni cakava. Mo ni rawata na cakacaka oqori, sa dodonu mo ni qarava vakavinaka sara na nomuni itavi tabu mo ni veiqaravi vei ira na tani.1
O ni kila beka na kena ibalebale mo ni veiqaravi? Ni vakasamataka toka na taro oqo niu talanoataka tiko vei kemuni na kena italanoa e dua na goneyalewa na yacana o Chy Johnson.
Ni tekivu vuli torocake ena yabaki sa oti o Chy, sa tekivu me dau vakayacori vua na ivalavala ni veivakalolomataki. E dau lauroba, laubili, ka vakanini ni lako tiko ki kalasi—eso na gone era viritaka saraga vua na benu. O ni sa dau raica beka na nodra vakalolomataki eso na tamata vaqo ena nomuni koronivuli.
E levu na tamata, e dau gauna ni galili kei na rere na nodra gauna vakaitabagone. E sega ni dodonu me vaqori. E ka ni kalougata vei Chy, ni ra tiko eso na cauravou ena nona koronivuli era kila na ibalebale ni veiqaravi.
A kerei ira na qasenivuli e koronivuli na tinai Chy me ra veivuke ena kena tarovi na veivakalolomataki, ia e toso tiko ga. A qai tarai Carson Jones, e dua na Matabete i Eroni ka dau imatai ni digidigi ni kotabeki ena timi ni veicaqe. A kerei koya me veivuke vua ena nodra kunei o ira era veivakalolomataki tiko.
A vakadonuya o Carson me veivuke, ia e vu ni yalona e kila ni sega ni rawa ni levu cake na ka e rawa ni cakava mai na nona kilai ira walega era veivakalolomataki tiko. E vakasolokakana vua na Yalotabu ni gadreva me vukei Chy me vakila ni lomani.
A kerei ira eso na nona lewe ni timi o Carson me ra duavata kei koya ena veiqaravi vei Chy. Eratou sureti koya me dabe vata kei iratou ena gauna ni vakasigalevu. Eratou lako vata kei koya ki na kalasi me vakadeitaki kina ni taqomaki vinaka. E sega ni kurabuitaki, ni ra sa nona itokani na dauveicaqe, ka sega tale ni dua e dau vakalolomataki Chy.
Oqo e dua na gauna vinaka vei iratou na timi ni veicaqe. Ia ni marautaki tiko ni sega ni dua na druka ena gauna oya, era sega ni guilecavi Chy na cauravou oqo. Eratou sureti koya me mai duavata kei na timi ena loma ni rara ni oti na qito. A vakila o Chy ni lomani ka taleitaki. E kila ni taqomaki. E marau.
Eratou qai lai rawata na timi ni veicaqe na bilo ni yasana. Ia a yaco e koronivuli e dua na ka bibi cake mai na qaqa ena veicaqe. Na nodra ivakaraitaki na cauravou oqo sa vakauqeti ira na vo ni gonevuli me ra dau veiciqomi vakalevu cake, veitokani vakalevu cake. Era sa dau veikauwaitaki ka veivakarokorokotaki vakalevu cake sara.
Eratou a qai kila na tabana ni itukutuku ni matanitu na veika era a cakava na cauravou oqo ka wasea na kena italanoa ki na matanitu raraba. Na ka a tekivu ena dua na sasaga me ra veiqaravi vua e dua sa vakauqeti ira tiko na udolu tale na tani me ra vakayacora vakakina.
E vakatokai ira na cauravou oqo o tinai Chy “o ira na agilosi vakamatavulo.” E totolo na nodra tukuna o Carson kei ira na nona itokani ni vakalougatataka vakalevu cake na nodra bula o Chy mai na nodra vakalougatataka o ira na nona. Oqori na ka ena yaco ni o vakayali iko ena veiqaravi ena vukudra na tani—o na kunei iko.2 O na veisau ka tubu ena sala eso ka na sega beka ni rawa kevaka e sega. Era sa sotava tiko na cauravou oqo na reki ni veiqaravi ka tomana tiko na nodra vakasaqara na madigi eso me ra vakalougatataki ira kina na tani. Era sa nanamaki tiko me ra vakatetea yani na nodra veiqaravi ena veivula ka lako mai ni ra laki veiqaravi vakadaukaulotu tudei.3
Dua na Gagadre ka Dua na iTavi
E udolu vakaudolu na Chy Johnsons e vuravura raraba—o ira era gadreva me ra vakila na loloma ni Tamada Vakalomalagi. Era tu ena nomuni veikoronivuli, ena nomuni kuoramu, kei na nomuni matavuvale sara mada ga. Eso era votu sara mai vakatotolo ki na noda vakasama. Eso tale e sega soti ni ra gagadre vakalevu. Ia e matata ni o ira kece eda kila e rawa ni ra vakalougatataki ena so na sala mai na nomu veiqaravi. Sa nuitaki iko tiko na Turaga mo yacovi ira yani.
E sega ni gadrevi mo dua na dau qito rogo mo veiqaravi kina vei ira na tani. O a ciqoma na kaukauwa, na dodonu, kei na itavi tabu mo veiqaravi ena gauna ga o a tabaki kina ki na matabete. E vakavuvulitaka o Peresitedi James E. Faust, “Na matabete sai koya na kaukauwa ka soli ki na tamata me veiqaravi ena yaca ni Kalou.”4 Na Matabete i Eroni e tu kina na idola ni nodra veiqaravi na agilosi.5
Ni o lomani ira na Luvena, ena tuberi iko na Tamada Vakalomalagi ka ra vukei iko na agilosi.6 Ena soli vei iko na kaukauwa mo vakalougatataka na bula ka vueta na yalo.
Sa nomu ivakaraitaki o Jisu Karisito. A lako mai o Koya “me sega ni qaravi, ka me dauveiqaravi ga.”7 Me da veiqaravi e kena ibalebale me da lomani ira ka kauwaitaki ira na tani. E kena ibalebale me da qarava na nodra gagadre vakayago kei na gagadre vakayalo. Me vakarawarawataki ga, e kena ibalebale me da cakava na veika ena cakava na iVakabula kevaka a tiko eke.
Nomu Matavuvale
Tekivu sara ga ena nomu vuvale. Oqori na vanua mo na cakava kina na nomu veiqaravi levu duadua.8
O vinakata mo tovolea mada e dua na vakatovotovo taleitaki? Ena gauna tale e vinakata kina o tinamu eso na veivuke ena loma ni vale, kaya vaqo “Vinaka vakalevu Na. Au taleitaka sara ga meu veivuke.” Qai vakaraica na ka ena cakava. Eso vei kemuni o ni na gadreva mo ni vakavinakataka cake mada na nomuni maqosa ni veiqaravi taumada ni bera ni o ni tovolea na ka oqo. Sa rawa ni o vakavuna na nona rebo. Ni o sa vakabulai koya tale, o na raica e matanavotu na vinaka cake ni nomudrau veimaliwai ka levu cake na Yalotabu e vale.
Oqori e dua ga na sala e rawa ni o veiqaravi kina ki na nomu matavuvale; e vuqa tale tu. O na veiqaravi ni o vosataka na vosa ni yalo vinaka vei ira na lewe ni matavuvale. O na veiqaravi ni o raici ira na tacimu kei na ganemu me ra nomu itokani vinaka duadua.
E rairai ka bibi sara, mo veiqaravi ena nomu vukea na tamamu ena nona itavi vakailiuliu vakayalo ena nomu vuvale. Solia na nomu veitokoni taucoko kei na veivakayaloqaqataki ki na lotu vakamatavuvale, masu vakamatavuvale, kei na vuli ivolatabu vakamatavuvale. Cakava na nomu itavi me vakadeitaki kina ni tiko na Yalotabu ena nomu vuvale. Oqori ena vaqaqacotaka na tamamu ena nona itavi ka vakarautaki iko mo na tama ena dua na siga. Kevaka e sega ni dua na tama ena nomu vuvale, ena gadrevi vakalevu cake sara na nomu itavi ni veiqaravi ki na nomu matavuvale.
Nomu Kuoramu
E tiko talega na nomu itavi mo veiqaravi ena nomu kuoramu.
Sa tete tiko ki vuravura raraba na matabete. E vuqa vei kemuni o ni sa rogoca tiko na kaci nei Peresitedi Monson ki na veivueti. Sa levu cake sara na Matabete i Eroni bulabula vakalotu nikua mai na veigauna kecega ena itukutuku ni Lotu. Ia era tiko talega o ira era sega ni bulabula tu ka ra gadrevi kemuni.
Ena June sa oti, ni tauyavutaki e dua na tabana vou mai Bangalore e Idia, na cauravou duadua ga ka tiko ena soqoni ni matabete e dua na dikoni tabaki ka yacana o Gladwin.
Eratou sa mani tekivu vaqiriti ira na cauravou luluqa vakalotu o Gladwin, kei rau na Peresitedi ni Cauravou kei na peresitedi ni tabana ka veisiko yani ki na nodra veivale. Sega ni dede sa tekivu lako tale mai ki lotu e dua na ikarua ni cauravou o Samuel.
Ena veimacawa erau dau qiriti ira era sega ni dau lako mai ki na soqoni ni kuoramu o Gladwin kei Samuel ka wasea na veika erau dau vulica. Era dau qiriti ira talega se sikovi ira ena nodra siganisucu. Sa yaco me ra sa nodrau itokani yadudua mai na cauravou luluqa vakalotu ka ra ciqoma na veisureti me ra lako mai ki na itaviqaravi ni kuoramu, tiko ena soqoni ni kuoramu, ka yaco sara me ra tekivu dui cakava ga na nodra veiqaravi. Nikua era sa bulabula kece tu vakalotu na cauravou ena tabana.
E vakavuvulitaka na ivolanikalou me ra dabe ena veimatabose na veikuoramu ni Matabete i Eroni ka veivakatatataki cake—se ra tara cake ka veivaqaqacotaki—vakataki ira.9 O na veivakatatataki cake ena nomu vakavuvulitaka na dina vakosipeli, wasea na veika vakayalo eda sotava, ka wasea na ivakadinadina. Na nodra lewenivuli na itabagone e vakayaloqaqataka na mataqali veimaliwai vakaoqo ena veisoqoni ni kuoramu, ia ena yaco walega oqo ni ra vakila na lewe ni kuoramu ni ra lomani ka rokovi. Na veivakalialiai kei na veisagai e sega ni kena vanua na soqoni ni kuoramu—vakauasivi ni wasei raraba kina na veika eda nanuma. Sa dodonu me ra liutaka na mataveiliutaki ni kuoramu na kena vakadeitaki me vanua taqomaki me ra vakaitavi kece kina na lewe ni kuoramu.
E vakasalataka na iApositolo o Paula, “Me kakua ni lako mai na gusumudou e dua na vosa velavela, o koya ga sa vinaka me ia kina na veivakatatataki, me vaka sa rauta me yaco kina na vinaka vei ira era sa rogoca.”10
Na matabete e sega ni dau vakayagataka na vosa sabalia se vosa ca. Era sega ni dau veivakalailaitaki ka vakamosia na yalona e dua. Era dau tara cake na bula ka veivaqaqacotaki vei ira na tani. Oqo e dua na sala rawarawa ka qaqa ni veiqaravi.
E Veigauna Kece
Na cakacaka ni veiqaravi e sega ni yala walega ki na cakacaka vakalotu se veisiko ni veituberi vakavuvale se cakacaka vakaveiqaravi ka dau yaco ena veigauna eso. Eda tagane ni matabete ena veigauna kecega—sega ni Sigatabu walega se sega ni gauna ga eda vakasote vulavula tu kina kei na neketai. Sa noda itavi me da veiqaravi ena veivanua eda tu kina. Na veiqaravi e sega ni dua ga na ka eda dau cakava—e vakamacalataka o cei o keda.
Veiqaravi e veisiga kece. E tu wavokiti iko na kena madigi. Raici ira mada. Kerea na Turaga me vukei iko mo kilai ira. O na raica ni vuqa vei ira era cakacaka lalai ena yalodina ka ra vukei kina eso me ra dau muri Jisu Karisito.11
Ni o segata mo bula kilikili kaya na Yalotabu, o na raica ka kila na vakanananu kei na nanuma ni lomamu ni vakauqeti iko mo veiqaravi. Ni o cakacakataka na veivakauqeti oqo, o na rawata vakalevu cake, ka na tubu cake ka rabailevu na nomu madigi kei na nomu kaukauwa mo veiqaravi.
Kemuni na taciqu gone, au vakadinadinataka ni sa soli vei kemuni na dodonu kei na kaukauwa ni Matabete i Eroni vakasakiti mo ni veiqaravi kina ena yaca ni Kalou.
Au vakadinadinataka ni o kitaka vakakina, o na iyaya ni cakacaka e ligana na Kalou me ra vukei kina na tani. Ena vutuniyau vakalevu cake na nomu bula ka vakaibalebale. O na kunea vakalevu cake na igu mo vorata na ca. O na kunea na marau dina—na kena era dau kila ga o ira era dau muri Jisu Karisito dina.
Mo ni sotava na reki ni kena vakataucokotaki na nomuni itavi tabu ni veiqaravi, sa noqu masu ena yaca i Jisu Karisito, emeni.