Visiting Teaching Amandzɛɛbɔ, Ayɛwoho 2013

Erekyerɛkyerɛ na Irusũa Asɛmpa no

Mpaabɔ muara, sũa adzesuadze yi na, dɛ mbrɛ ɔsɛ no, enye nkyerɛmbaa a esera hɔn no mpɛnsapɛnsa mu. Ma nsɛmbisa no mboa wo ma edze ahyɛ wo nkyerɛmbaa no dzen, na ɔma Relief Society ndzi adɔntsen wɔ ɔwoara w’abrabɔ mu. Ho nsɛm mbordo no, kɔreliefsociety.lds.org.

Gyedzi, Ebusua, Mboa

Nna Jesus Christ yɛ kyerɛkyerɛnyi mapã. Ɔyɛɛ fasusu maa hɛn ber a “Ɔkyerɛkyerɛɛ mbaa a wɔwɔ dɔm mu na ankorankor, wɔ kwan mu na wɔ mpoano, nye hɔn efiefie so mu. Ɔkyerɛɛ hɔn ɔdɔ-ayɛmuyie na ɔsãa hɔn na hɔn ebusuafo yarba.”¹

Ɔkyerɛkyerɛɛ Martha na Mary na “ɔtoo nsa frɛɛ hɔn dɛ wɔmbɛyɛ N’esũafo na wombenya nkwagye mu kyɛfa, ‘dza oye a’[Luke 10:42] wɔrenngye [hɔn] nsamu.”²

Hɛn nda a odzi-ekyir kyerɛwsɛm mu no, Ewuradze hyɛ hɛn dɛ “[yɛm]fa ahenman ne nkyerɛkyerɛ no nkyerɛkyerɛ [hɛn]ho nkorkor” (N & A 88:77). Ɔfa yɛrekyerɛkyerɛ na yerusũa nkyerɛkyerɛ no, Cheryl A. Esplin, ɔpamfo a otsĩa ebien wɔ Wiadze Mfɛndzanan Primary Presidency mu no, kãa dɛ, “Irusũa na atse asɛmpa nkyerɛkyerɛ no ase emudzi mu no, gye abrabɔ mu mber nyina, na ɔba “nsensaneeba tsia nsensaneeba, ahyɛdze tsia ahyɛdze, ha kakra, hɔ kakra’ (2 Nephi 28:30).”³

Ber a yesũa, yesũa adze, na yɛbɔ mpaa, yɛdze Sunsum Krɔnkrɔn No tum no bɛkyerɛkyerɛ, Ɔno na ɔdze hɛn asɛm no kɔ “adasamba, mbanyin [nye mbaa] hɔn akoma mu” (2 Nephi 33:1).

Fi Kyerɛwsɛm no mu

Alma 17:2–3;31.5;Nkyerɛkyerɛ na Ahyɛmudzi 42:12–13;84:85

Fi Hɛn Abakɔsɛm mu

Hɛn nkɔnhyɛfo a woetwa mu kɔ akaa hɛn dɛ yɛyɛ mbaa yi, yɛwɔ asodzi tsitsir dɛ akyerɛkyerɛfo wɔ fie nye Asɔr mu. Fankwa 1979 mu no, President Spencer W. Kimball (1895–1985) serɛɛ hɛn dɛ yɛmbɛyɛ “nkyerɛmbaa a yenyim kyerɛwsɛm no.” Ɔkãa dɛ:”Hom mbɛyɛ kyerɛwsɛm mu abemfo—nnyɛ dɛ hom bogu binom enyim ase, mbom hom bepegya hɔn!” Ne nyina ekyir no, woana na ohia kɛse ma no dɛ ‘ɔbɔkora’ asɛmpa mu nokwar no do (ama wɔadan no hia ber mu no) kyɛn mbaa nye abatan a wɔhwɛ mbofra do na wɔkyerɛkyerɛ hɔn kɛse no?”⁴

Hɛn nyina yɛyɛ akyerɛkyerɛfo na esũafo. Sɛ yɛkyerɛkyerɛ fi kyerɛwsɛm nye nkɔnhyɛfo atseasefo hɔn nsɛm mu a, yebotum aboa binom ma wɔaba Christ nkyɛn. Ber a yɛdze hɛnho hyɛ adzesũa mu, bisa nsɛmbisa a ɔboa na yetsie no, yebotum enya nyiano a obehyia hɛn ankorkor ehiadze no.

Ebɛnadze na Mubotum Ayɛ?

Ebɛn ahoboa na mereyɛ ama mabɛyɛ kyerɛkyerɛnyi papa?
Ana menye nkyerɛmbaa a mohwɛ hɔn do no kyɛ me dasegye a?

© 2013 odzi wɔ Intellectual Reserve, Inc. Wɔakora ho tumdzi nyina. Wotsintimii wɔ USA. Ngyirisi kasa ho mpendo: 6/13. Nkyereasee ho mpendo: 6/13. Visiting Teaching Amandzɛɛbɔ, July 2013, ne Nkyerɛasee. Fante. 10667 502