Dikoni Vou
“Ia ko ira sa vakabauta na ilesilesi vakabete oqo, era sa vakabauti au, sa kaya na Turaga” (V&V 84:35).
Sa itavi cecere na vota na sakaramede. Vakacava ke na vakaleqa o koya?
E tucake tu o Benji ena mata ni iloilo, ka vakadodonutaka tiko na nona neketai. E mokoti koya vinaka toka na nona sote vulavula kei na tarausese karakarawa buto. Ka seru vinaka toka na uluna. Sa ituvaki vinaka sara tu ga mena tabaki me dikoni. Ia na cava ga e lomataqaya tiko kina?
A taura na nona ivolanikalou o Benji ka curu yani ki tuba. A saga me kakua ni vakasamataka na veika duidui ena yaco nikua e valenilotu. Sa qai tiko vata kaya na ilesilesi vou ni matabete ka lomaleqa tiko kina o koya ni dau vakasamataka: o ya na votai ni sakaramede. Vakacava beka ke na cakava e dua na cala ena imatai ni gauna ena macawa ka tu mai? A saga talega me guilecava oqori ni sa biubiu mai vale.
Me vaka ga sa dau yaco tu a vakayacori vakavinaka na soqoni ni sakaramede. Ia ni oti o ya, a gole yani o Benji vata kei nona matavuvale ena valenivolavola nei Bisopi. Oqo e duidui sara. Ena gauna oqo e dodonu me tiko o koya ena kena dola na soqoni ni Lalai.
A dabe sobu o Benji, ka ratou sa tabaka na buradelana o tamana, o bisopi, o peresitedi ni Cauravou, kei rau na daunivakasala ni matabisopi. A vakatikora vua o tamana na Matabete i Eroni. Ena gauna ni veimasulaki, a takali tani na rise ni ketei Benji. Sa yaco vua na vakacegu kei na marau.
A tucake o Benji ka lulu yani vei ira kece. A qai mokoti tinana kei tuakana o Jay, kei ganena lailai o Mirasol.
Ni oti sa gole yani o koya ki na Matawilivola ni Sigatabu. E dina ga ni sega ni tautauvata kei na Lalai na kalasi vou, era rogorogo vata ga. Na lesoni a baleta na masu. Taumada a levu sara na nona lesoni baleta na masu ena Lalai. E yalovakacegu kina o Benji. E rairai sega sara ni dredre na itutu ni dikoni.
“Ena totoka sara,” a kaya o Jay vei Benji ni oti na lotu. “Au na masulaka na sakaramede, o iko mo qai vota yani.”
Sa yaco tale me rise na ketena. “Io, totoka,” a kaya vakamalua. Sa dau lomaleqataka tu ga vakalevu o Benji na kena votai yani na sakaramede!
Ena bogi o ya a raici tamana o Benji ni wiliwili toka ena idabedabe. “Vakacava beka keu calata e dua ka qai sega ni kania na sakaramede?” a taroga. “Vakacava keu tacaqe?” Sa raica tu vakamatata o koya ena nona vakasama, ni sa cabolo na tere ki ra ka veiqerayaki na bilo ni wai.
A boboka na tabai Benji o tabana. “Au nanuma sara na imatai ni gauna au a vota yani na sakaramede. Au a rairai taqaya sara beka vakalevu ni vakatauvatani kei iko ena gauna oqo.
A sauriva ena kurabui o Benji. “O iko? O iko o sega ni rerevaka e dua na ka!”
A dredre o tamana. “E levu sara na gauna au a rere kina. O kila beka na ka a vukei au meu kua kina ni taqaya?”
A vakasama vakalailai o Benji. “Masu?”
A dredre o tamana. “Donu vinaka. Masu. A qai masulaki au o tamaqu. O vinakataka mo masulaki?”
A deguvacu vakatotolo o Benji. “Io! Au taleitaka vakalevu o ya.”
E ratou a soqoni vata yani ki na lomanivale na matavuvale. A tabaka na buradelai Benji o tamana. Ni sa vosa o tamana, sa vakila o Beniji ni sa tonawanawa mai na matana. “Mo nanuma tiko,” sa cavuta oqo o tamana ena masu, “ko sa mai ciqoma na matabete mai na dua na cakacaka vakalotu. Sa solia vei keda na Tamada Vakalomalagi na matabete meda laki veiqaravi yani vei ira na tamata. Kevaka mo na vakayacora oqo ena inaki taucoko ni yalomu, ko na kune kalougata ena ka oqo kei na veika kecega.”
Ena macawa taucoko sa masulaka tu ga o Benji me vukei. Ena Sigatabu e tarava, a laki tomani ira sara na dikoni ena yatu e liu ni valenilotu. A vakarorogo vagumatua sara ni sa masulaka tiko o Jay na madrai.
Vakasauri ga sa taqaya tale mai o koya. Ena rawa beka ni cakava oqo? Sa ka bibi dina sara! Sa qai nanuma o koya na yalayala ena masu nei tamana. Sa mani takali yani na lomaleqa o ya ni sa sobuti koya na Yalotabu.
A taura cake na tere ka kalawa nuidei yani ki na iyatu se lesi vua. Vakamalua sara, a dedeka yani na tere vei koya na marama ena imatai ni iyatu.
A dredre mai na marama o ya. A dredre lesu yani o Benji, ni kila sa qarava tiko na Turaga.
Droini mai vei Adam Koford