Au a Tiko mai Vale

Steven Sainsbury, California, Amerika

Ena vuku ni dua na cakacaka vakaveiqaravi, au a lako kina ki Rwanda kei iratou e vica tale na vuniwai meu veivuke ena gagadre eso ni veiqaravi vakavuniwai. Ni oti e rua na macawa, ni sa voleka ni oti na ilakolako, sa tekivu yaco mai na vakanananu i vale. Au sa nanumi iratou dina sara ga na noqu matavuvale, na noqu idavodavo dakoba, kei na noqu vale.

Ena iotioti ni noqu Sigatabu mai Aferika, a rawa vei au meu moica na ituvatuva ni noqu veiqaravi me rawa kina niu laki lotu. E dina ni se bera ni kilai sara vakamatanitu mai Rwanda na Lotu, a rawa niu raica ena mataveilawa ni Lotu e dua na gauna ni soqoni kei na vanua meu lako kina.

Ia sa dua na idusidusi: “Lakova sobu na gaunisala vatu mai na vale ni Veiqaravi. Vaqara e dua na matamata e dola tu. Qai sirova sobu na ikabakaba.”

Niu muria na idusidusi oqori, sa tekivu meu rogoca na domo ni dua na serenilotu matalia. Au sirova yani na ikabakaba, qai tekivu me rogoca mai na daligaqu na qaqa ni “Na Yavu Tudei” (Sere ni Lotu, naba 43). E laki cava na ikabakaba ena dua na vale lailai, ka ra veitalanoa voli ena kena mata ni katuba levu eso na tamata matadredredre. E dina niu vulagi ena ivavakoso oqo, au vakila vakatotolo sara niu dua vei ira. Era lako mai na tagane kei na yalewa ni Rwanda me ra lululu vei au, ia ni vakakina, sa talave tani mai dakuqu e dua na icolacola levu ni galili—au sa yaco ki vale!

Niu curuma yani na vale oqori, au a tiko kina ena dua na soqoni tolu na auwa ka sega ni duidui mai na kena ena neitou tabanalevu mai California. Era dau vota na sakaramede na taura tu na Matabete i Eroni, a yavutaki na vosa vua na iVakabula, ia na lesoni mada ga ena Wilivola ni Sigatabu e tautauvata kei na kena e vakavuvulitaki mai na neitou tabanalevu ena macawa oya.

Ka bibi duadua, ni a veitokani voli na Yalo ni Turaga ena veisoqoni oqori. E matata, ni a matadredre tiko ni veivakadonui na Turaga vei ira na tamata vinaka oqo ni ra tovolea tiko ena nodra igu me ra qaravi Koya. Au qai kila ena yabaki sa oti, e vica walega na kai Rwanda era dau mai lotu eke. Ia au wilika ni sivia na 100 era tiko ena soqoni oya, na kena veimama o ira na gone lalai matadredredre.

Ia oqo ni sa dolavi o Rwanda ki na cakacaka ni kaulotu, au vakabauta ni na vuavuai vinaka na nodra veiqaravi na daukaulotu ni na vakadinadinataka na Yalo vei ira e lewelevu cake na dauvakadikeva na lotu mai Rwanda ni Lotu vakalesui mai sai koya na matanitu ni Kalou e vuravura taucoko—ena veivanua kecega, vei ira na tamata kecega, kei ira na luve ni Kalou kecega. Au sa vakavinavinaka kina vakalevu ki na Lotu, se ena baravi e loma kei California se muria sobu e dua na gaunisala vatu e lomai Aferika.