Te Rongorongo n Reirei ni Kakawari
Ana Mwakuri Iesu Kristo ae Tabu: Te Tia Karikibwai
Tataro mwaaka ni kamatebwaia te bwai n reirei aei ao ukoukora atakina bwa tera te bwai ae ko na tibauaia ma tarim aine ake ko kawariia. Atakin maiun ao ana mition te tia Kamaiu e na karikirakea am onimaki Irouna ao ni kakabwaiaia ake ko tararuaia? Ibukin rongorongona riki tabeua, nakon reliefsociety.lds.org.
Onimaki, Utu, Buoka
Iesu Kristo “e karika karawa ma aonaaba” (3 Nibwai 9:15). E karaoia rinanon mwaakan te nakoanibonga, iaan ana kaetieti Tamara are i Karawa (tara Moses 1:33).
“Ti riai ni kakaitau bwa te Tia Karikibwai ae wanawana e katamaroa te aonaaba ao ni kamaekaira ikai,” e taku Beretitenti Thomas S. Monson, “… bwa ti na rinanon te tai ni kataaki, te tai ae ti na kaotira bwa ti tau ibukin bwai ake e a tia ni katauraoi te Atua ibukira bwa ti na karekei.”1 Ngkana ti kabongana ara rinerine n ongeaba n ana tua te Atua ao n rairinanora, ti a kororaoi n oki ni maeka ma Ngaia.
Man te Karikibwai, e taku Beretitenti Dieter F. Uchtdorf, Kauoman ni Kauntira n te Moan Beretitentii:
“Boni Ngaira bukin karikan te aonaaba Irouna! …
“Aei te kibuntaeka ae kaitara ibukiia aomata: ni kabotauaki ma te Atua, te aomata bon akea bongana; irarikin anne iai arora iroun te Atua.”2 N ataakina bwa Iesu Kristo e karika aonaaba ibukira ibukina bwa iai nanon bwai ni kabane nakoira iroun te Tama are i Karawa ae kona ni buokira ni karikirakea ara tangira Ibukiia.
Man Koroboki aika tabu
Ioane 1:3; Ebera 1:1–2; Motiaea 3:8; Moses 1:30–33, 35–39; Abraham 3:24–25
Man Rongorongora
Ti a tia ni karikaki n aron katotongan te Atua (taraa Moses 2:26–27), ao iai ara konabwai n riki n ai aron te Atua ibukina bwa natina ngaira. Te Burabeti Iotebwa Timiti e kauringiia aine n te Botaki n Aine “ana maiuakina aroia n raka.”3 Ma te kaunganano anne e na riki bwa kanga aan te kateitei, n Ana Ekaretia Iesu Kristo ibukiia Aika Itiaki ni Boong aika Kaitira a tia n reiakinaki aine bwa a na maiuakina aia konabwai mai iroun te Atua man kakoroan bukin ana kantaninga te Atua ibukiia. “Ngkai a moanna n oota riki bwa antai raoi ngaiia—natin te Atua aine ma rikian aia konabwai n tangiriia ao n nabeakiniia—a roko n tian aia konabwai n aroia aine aika a tabu.”4
“Kam a katukaki ngkai n te tabo ike kam kona ni mwakuri iai ni kaineti ma ana namakin n nanoanga te Atua are e a tia n unikii i bwanibwanimi,” e taku te Burabeti Iotebwa Timiti. “Ngkana kam maiu ni kaineti ma reirei aikai ai kakannatora ao ai mimitongira!—ngkana kam maeuakina ana reirei ni kaineti ma ami konabwai, anera a naki kona n raroanako mairoumi ao ana riki bwa taan raraoni ngkami.”5
Tamnein Christus Iroun David Nystul; baekuraun iroun Hemera/Thinkstock