“Ta eo In ba n̄an ro rejjab membōr ro rej kajjitōk etke jet membōr an Kabun̄ in rejjab mour kōn jon̄ok ko?”

Enaaj kar em̧m̧an eļan̄n̄e aolep ro uwaan Kabun̄ in raar ujlepļo̧k mour ko aer ñan ko̧jpeļ eo. Rejjab lan̄lōn̄ wōt kōn eļapļo̧k kōjeram̧m̧an ko ilo mour ko aer bōtaab barāinwōt rej waanjon̄ak ko rem̧m̧an n̄an ro ipeļaakier. Bōtaab jej wabanban, kōn menin jenaaj aolep likjab ilo jet jekjek ko. Un eo eļaptata me jet rej ļapļo̧k aer mour kōn ko̧jpeļ eo ej bwe kajjojo iaad ilo jet ļōmņak ko roktak ilo bwebwenato ko ad im ilo kajoor im naan in kam̧ool ko ad. Kajjojo iaad ewōr ad mālijon̄ ko roktak jān doon im kein bōk jipan̄ ko roktak jān doon im armej ro rej jipan̄ kōj.

Ro rejjab membōr remaron̄ jab meļeļe naan eo āinwōt “oktak” im “naan in kam̧ool,” bōtaab renaaj meļeļe bwe kajjojo armej emaron̄ kālet ewi wāween an mour. Komaron̄ kōmeļeļeik bwe Jemedwōj Ilan̄ eaar karōk bwe en āindein. Eaar letok n̄an kōj anemkwoj in kālet bwe jān maron̄ eddōkļo̧k ilo jetōb kōn kālet jim̧we. Bōtaab Jemedwōj Ilan̄ eaar barāinwōt jeļā bwe aolep—ijello̧kin wōt Jisōs Kraist—naaj kar kōm̧m̧ani bōd ko, kōn menin Eaar letok juon Rilo̧mo̧o̧r n̄an kōj. Kōn wōt Pinmuur eo, jemaron̄ ukweļo̧k, jeorļo̧k bōd, katak jān bōd ko ad, im wōnm̧aaņļo̧k ilo mour.

Komaron̄ barāinwōt kōmeļeļe bwe jejjab ekajete ro me rej jab ļoor jon̄ok ko an Kabun̄ in. Ijello̧kin, jej kajieon̄ jipan̄ er, meļeļe kake er, im kijenmij ippāer. Ilo ad jab kaanlo̧ke jerawiwi, jejjab liakeļo̧k rijerawiwi (lale Jon 8:11). Ukweļo̧k ej peļļo̧k wōt, n̄an aolepādwōj.

Etale jeje ko rekwojarjar

Uwaak eo n̄an kajjitōk eo maron̄ loe ilo jeje ko rekwojarjar. N̄e armej ro rejjab kōjparok kien ko, jej aikuj jab ekajete er (lale Matu 7:1). Rom 3:23 ej ba, “Bwe otemjej raar jero̧wiwi im rej likjab jān aiboojoj an Anij.” Mekarta, em̧ool bwe membōr ro an Kabun̄ in rej aikuj kajieon̄ pokake.

Madison M., iiō 13, Texas, USA

Katakin kōn Pinmuur eo

N̄e armej rej ba men ko āinwōt in, ijello̧kin pukōt bōd eo ippān juon membōr eo me ejjab ļoor kien ko, ij kōjerbale āinwōt juon iien em̧m̧an n̄an katakin kōn Pinmuur eo. Ij jiron̄ er bwe ejjab kōnke jej Mormon ejjab meļeļe in bwe jeweppān im bwe ewōr ippād Pinmuur eo kōn menin jemaron̄ ukweļo̧k jān jerawiwi ko ad im kajim̧we bōd ko. Menin ekkā an kōpeļļo̧k kōjām eo n̄an elōn̄ ļo̧k kajjitōk ko.

Jayde H., iiō 16, Oregon, USA

Kabun̄ in ej Katakin Kōj n̄an Kōm̧m̧an Em̧m̧an

Āinwōt bar ro jet, ro uwaan Kabun̄ in rej ioon apan̄ ko im kapo ko. Aolepādwōj ewōr ad m̧ōjņo̧ ko, bōtaab ejjab meļeļe in bwe Kabun̄ in ejjab m̧ool. En̄in ej Kabun̄ eo an Jisōs Kraist, eo ej jipan̄ armej n̄an jeļā ko̧jpeļ eo em̧ool im n̄an bōk mour āinwōt Anij. Ej armej in lal men eo me ej jab pokake kien ko (lale Mosaia 3:19), im ejjab ruōn Kabun̄ in. Kabun̄ in ej Katakin Kōj n̄an Kōm̧m̧an Em̧m̧an. Bōtaab aolepādwōj ewōr ad kālet.

Lavinia S., iiō 19, Bulacan, Philippines

Jon̄ok ko Rej n̄an M̧ōņōņō eo Ad

Kajjitōk in elap aō meļeļe kake kōnke ijeļā kōn armej ro raar kōm̧m̧ani kālet ko aer kar kōttoļo̧k er jān ko̧jpeļ eo. Irooj ej letok n̄an kōj kien ko n̄an m̧ōņōņō eo ad im n̄an kakūrm̧ool mour in jab wabanban im mour indeeo an armej (lale Moses 1:39). Irooj ej kōņaan bwe jān bar ro̧o̧l n̄an E; ijo wōt ke, E kōņaan bwe jān kōm̧m̧ani kālet ko ad make. En̄in ej unin an jet armej jab mour kōn jon̄ok ko ad. Jon̄ok ko rej jipan̄ n̄a kōnke ijeļā bwe Jemedwōj Ilan̄ eaar litok n̄an n̄a bwe in maron̄ bar ro̧o̧l im mour Ippān im m̧ōņōņō. Rej kein kam̧ool kōn iakwe eo An n̄an n̄a.

Morgane D., iiō 18, Languedoc-Roussillon, France

Erom juon Waanjon̄ak

Kabun̄ in ej aorōk n̄an jipan̄ kōj kakūrm̧ool kien ko an Jemedwōj Ilan̄ im n̄an mour Ippān bar juon alen. Bōtaab ejjab kōnke jet rej uwaan Kabun̄ in ejjab meļeļe in bwe ļeo ak lio reban jet armej ro rōmman iien otemjej. Kalimjōk laļ in ad rainin, eobrak kōn nana im menin kajjōjō, men̄e laļ in ej obrak kōn armej ro me raar jokālet n̄an ļoor Jisōs Kraist ilo mour eo m̧okta. Ij ļōmņak men eo em̧m̧an tata jemaron̄ kōm̧m̧ane ej n̄an kōm̧m̧an waanjon̄ak n̄an ro m̧ōttad.

Kaden S., iiō 15, Utah, USA

Jar kōn Er im Loļo̧k Er

Membōr ro me rejjab mour kōn jon̄ok ko ad emaron̄ in jab wōr juon aer naan in kam̧ool ej io̧klo̧k wōt Jisōs Kraist. Jej aikuj jar kōn er, bwe renaaj pukōt tōl eo an Jetōb im bwe renaaj maron̄ in bōk naan in kam̧ool eo aer make. Jej aikuj loļo̧k armej rein im jipan̄ er n̄an itok n̄an Kraist.

Andrea C., iiō 13, Lima, Peru

Mour kōn Jon̄ok ko Ad

Āinwōt bar jabdewōt doulul ak kabun̄, ewōr jet armej ro me eļapļo̧k aer wujlepļo̧k ak edikļo̧k aer wujlepļo̧k. Jej aikuj in mour kōn jon̄ak ko jon̄an wōt ad maron̄ im kōjatdikdik im jar bwe ro jet renaaj barāinwōt kōm̧m̧ane.

Maren S., iiō 16, Arizona, USA