Visiting Teaching Amandzɛɛbɔ, Ɔberɛfɛw 2013
Bra, Bɔdɔm Hɛn
Wo gyinabew biara mu no, w’ankorankor abakɔsɛm, anaa wo dasegye mu ahoɔdzen tse biara no, kwan da hɔ ma wo wɔ Asɔr yi mu.
Banyin bi na ɔsoodaa dɛ ɔwɔ asado kɛse bi a wiadze yi mu asɔrasɔr som horow nyina aboa ano wɔ. Ohun dɛ asɔrsom kor biara wɔ dza a oye pii na ɔyɛ mfaso so.
Ohyia awɔrfo enyikafo bi a wogyinaa hɔ ma Jesus Christ n’Asɔr a ɔwɔ hɔ ma Nda a Odzi Ekyir Ahotseweefo na obisaa dɛ: “Ebɛnadze na hom hwehwɛ fi hom asɔrmba no hɔ?”
Wobuaa dɛ, “Yɛnnhwehwɛ hwee. Mbom Ewuradze ebisa dɛ yɛntsew dza yɛwɔ nyina ho mma No.
Awarfo no kɔr do kyerɛkyerɛɛ faa Asɔr ɔfrɛ, fie akyerɛkyerɛ nye visiting teaching, etuhoakyɛ asɛmpasomafo som, dapɛn dapɛn ebusua ewimbir fie nhyiamu, temple ndwuma, yieyɛ na ɔdodow ayamuyie som, nye asodzi dɛ ebɛkyerɛkyerɛ ho.
“Ana hom ma hom nkorɔfo akatua wɔ dza wɔyɛ nyinara ho a?” banyin no bisae.
“O, oho,” awarfo no kyerɛkyerɛɛ mu. “Wɔdze hɔn mber kyɛ kwa.”
“Dɛmara so na,” awarfo no sɔɔw do, “bosoom esia biara no hɛn Asɔrmba hwer dapɛn ewiei kor a wɔdze kɔ anaa wɔhwɛ wiadze mfɛndzanan ehyiadzi dɔnhwer 10.”
“Dɔnhwer du a nkorɔfo rekasa a?” ɔyɛɛ banyin no ahobow.
“Hɔn dapɛn dapɛn asɔrsom so ɛ? Odzi mber ahen?
“Dɔnhwer ebiasa, Kwesida biara!”
Banyin no see, “Meewu o.” “Ɔyɛ nokwar dɛ hom asɔrmba yɛ dza hom akã yinom a?”
“Ɔno na binom so. Yɛmmbɔɔ ebusua abakɔsɛm, mbabun asesebɔ, som soronko, kyerɛwsɛm adzesũa, banodzifo ntsetsee, mbabun dwumadzi, anapa-tutu seminary, Asɔr adan nsiesie, na ampara, Ewuradze N’apɔwmudzen mbra no, bosoom bosoom akɔnkye a wɔdze boa abɔbɔfo, nye ebupɛn du no so mpo do.”
Banyin no kãa dɛ, “Afei m’adwen efura. Dɛn ntsi na obi bɛpɛ dɛ ɔbɔdɔm asɔr a ɔtse dɛm?”
Awɔrfo no yerɛw hɔn ano na wɔkãa dɛ, “Yɛdwen dɛ nkyɛ irimmbisa da.”
Dɛn Ntsi na Obi Bɔdɔm Asɔr a Ɔtse Dɛm?
Wiadze mu nyina ber a asɔrasɔr pii hɔn asɔrmba no hɔn dodow retsew koraa no, Jesus Christ n’Asɔr a ɔwɔ hɔ ma Nda a Odzi Ekyir Ahotseweefo no—wɔnndɔɔsõ dze, sɛ edze toto nkaafo pii ho a—naaso ɔkã asɔr a ɔrenyin ntsɛmtsɛm wɔ wiadze yi mu ho. Fankwa 2013 no nna Asɔr no wɔ asɔrmba bɔbor ɔpepe 15 wɔ wiadze nyina mu.
Siantsir pii wɔ hɔ, mbom ma menkã kumaa ɛ?
Agyenkwa no n’Asɔr
Odzi kan, Jesus Christ Ɔno ankasa na Ɔdze Asɔr yi saan ananmu bae hɛn mber yi. Ha na ibohu tumdzi a wɔdze dzi dwuma wɔ Ne dzin mu—wɔdze nnuma kɔ bɔnfakyɛ mu, dze Sunsum Krɔnkrɔn akyɛdze ma, na wɔdze sɔw ano wɔ asaase do na sor.1
Hɔn a wɔbɔdɔm Asɔr yi no dɔ Jesus Christ Agyenkwa no, na wɔdɔ pɛ dɛ wɔkã No do. Wodzi dɛw wɔ nyimdzee no dɛ Nyankopɔn kasa kyerɛ adasamba bio. Sɛ wɔgye asɔfodzi krɔnkrɔn ayɛdze no na wɔnye Nyankopɔn dzi ahyɛmu a, wotum tse No tum nkã wɔ hɔn abrabɔ mu.2 Sɛ wɔhɛn temple krɔnkrɔn mu a, wɔtse nkã dɛ wɔwɔ N’enyim. Sɛ wɔkenkan kyerɛwsɛm krɔnkrɔn no3 na wɔdze No nkɔnhyɛfo no hɔn nkyerɛkyerɛ bɔ bra a, wɔtwe bɛn Agyenkwa no a wɔdɔ no mbordo.
Gyedzi a Odzi Dwuma
Siantsir kor so nye dɛ Asɔr ma papayɛ ho akwanya.
Oye dɛ ebɛgye Nyame edzi, mbom nkorɔfo dodowara pɛ dɛ wɔyɛ ma ɔbor dɛ wɔritsie nkenyan nsɛmpa anaa wɔroso hɔn sor adan ho daa ara.4 Wɔpɛ dɛ wɔdze hɔn gyedzi no dzi dwuma. Wɔpɛ dɛ wɔbobɔw hɔn tam na wɔdze hɔn ho hyɛ dwuma kɛse yi mu.
Na wɔbɔdɔm hɛn a dza ɔba nye dɛ—wonya akwanya pii a ɔsakyer hɔn akyɛdze, tsema, na mber ma ɔbɛyɛ ndwuma pa. Osiandɛ yennyi apaamu asɔfo a wɔgye akatua wɔ hɛn mboanofo a wɔwɔ wiadze nyina mu ntsi, hɛn asɔrmba no ankasa na wɔyɛ som edwuma no. Wɔnam nkenyan do dze frɛ hɔn. Ɔtɔfabi a yɛdze hɛnho ma; ɔtɔfabi a wɔyɛ “ma” hɛn. Yennhu edwumayɛ dɛ adzesoa, mbom dɛ kwan a yebotum edzi hɛn ahyɛmu a yɛyɛ no enyigye mu no do yie, dɛ yɛbɔsom Nyankopɔn na Ne mba.
Nhyira a Ɔsom Bo
Siantsir a otsĩa ebaasa a ɔma nkorɔfo bɔdɔm Asɔr no nye dɛ erenantsew osuanyiyɛ anamɔn mu no gya hɛn kɔ nhyira a ɔsom bo mu.
Yehu enuma dɛ hɛn osuanyiyɛ akwantu no n’ahyɛse. Hɛn daa daa nantsew a yɛnye Jesus Christ no gya hɛn kɔ abrabɔ yi mu asomdwee na botae nye dɛwdzi kɛse na onnyiewiei nkwagye wɔ wiadze a ɔbɛba no mu.
Hɔn a wodzi anamɔnkwan yi do nokwar mu no kwetsir amona mu hwe, awerɛhow, nye abrabɔ mu mfehoekyir pii.
Sunsum mu abɔbɔfo na akoma mu anokwafo benya nyimdzee mu ehutudze kɛse wɔ ha.
Hɔn a wohu amandze anaa wodzi awerɛhow no benya ayarsã wɔ ha.
Hɔn a wɔsoa bɔn adzesoadze no benya bɔnfakyɛ, ahotɔ, nye ahomgye.
Ma Hɔn a Wogyaa Kɔ no
Nokwar no nhwehwɛɛ no egya nkorɔfo ɔpepe aba Jesus Christ n’Asɔr a ɔwɔ hɔ ma Nda a Odzi Ekyir Ahotseweefo no. Naaso, binom wɔ hɔ a wogyaa Asɔr no a nna wɔdɔ no na wɔkɔ.
Obi bebisa dɛ, “Sɛ asɛmpa no yɛ ahomka dɛm a, dɛn ntsi na obi begyaa akɔ?
Ɔtɔfabi a yɛdwen dɛ osiandɛ obi afom hɔn, anaa hɔn enyiahaw anaa bɔn ho a. Nokwar, ɔnnyɛ dɛmara nko. Ampaara, ɔnnyɛ siantsir kor noara na ɔbɛfa gyinabew horow no nyina ho.
Hɛn asɔrmba adɔfo mu binom dze nsɛmbisa no dzi aper mfe pii mu dɛ ana wɔntwe hɔn ho mfi Asɔr no mu a.
Asɔr yi mu a wodzi nyimpa ne pɛ nyi kɛse no, a aberantsɛba a obisaa nsɛmbisa na ɔhwehwɛɛ mbuae dze asananan mu bae no, yɛdze obu ma hɔn a wɔrohwehwɛ nokwar no nokwar muara no. Obotum ebubu hɛn akoma sɛ hɔn akwantu no gya hɔn fi Asɔr a yɛdɔ no mu kɔ a, nye nokwar a yeebohu no, mbom yebu hɔn kyɛfa dɛ wɔsom Otumfo Nyankopɔn wɔ kwan a hɔn tsibowa kã kyerɛ hɔn, na yɛgye ndzinoa kor noara bi ma hɛn ho.5
Nsɛmbisa a Wonnyii Ano
Binom dze nsɛmbisa a wonnyii ano dzi aper, ɔfa ndzɛmba a wɔayɛ anaa wɔakã no deda no ho. Yɛgye to mu wɔ bagua mu dɛ wɔ Asɔr n’abakɔsɛm bɛyɛ mfe 200 mu—a yenya dza woesisi a ofi sor a ɔyɛ nkenyan, na enyimnyam ntoado no—ndzɛmba so a wɔakã na wɔayɛ mu binom botum ama nkorɔfo enya ho nsɛmbisa.
Ɔtɔfabi a nsɛmbisa no ba osiandɛ yennyi nsɛm no ho nkaabɔ nyina na dza yehia ara nye abotar kakra. Sɛ ekyir no nokwar no nyina da edzi a, ndzɛmba a nna ahyɛse no ntseasee nnyi mu no, wobesiesie ma yenya etsidaa.
Ɔtɔfabi a “dza osii” ne nkyerɛase ankasa no nya adwenkyerɛ nsonsonee bi. Asɛmbisa a ogya binom ekyingye no botum, wɔayɛ ho nhwehwɛmu yie ekyir no, ekenyan binom hɔn gyedzi.
Nkorɔfo a Wonndzi Mu Mfomdo
Na, menkã no pefee dɛ, mber bi ɔabɛsen a asɔrmba anaa Asɔr banodzifo no ayɛ mfomdo. Wobotum akã nsɛm anaa wɔayɛ dza ɔnye hɛn su, fapem, anaa nkyerɛkyerɛ no bɔ ebira.
Mususu dɛ Asɔr no bedzi mu sɛ nyimpa a wodzi mu nko na wɔyɛ mu dwuma a. Nyankopɔn dzi mu, na Ne nkyerɛkyerɛ ho tsew. Mbom Ɔyɛ edwuma dua hɛn—Ne mba a yenndzi mu do—na nyimpa a wonndzi mu no yɛ mfomdo.
Mormon Nwoma dzin krataafa mu no yɛkenkan dɛ, “Na afei sɛ mfom bi wɔ mu a nna ofi nyimpa; dɛm ntsi mma hom nnkasa nntsia ndzɛmba a Nyame ayɛ, amma woeennya hom ho nkekaa wɔ Christ n’atsembu egua no enyim.”6
Iyi na wɔayɛ aber biara na ɔbɛyɛ so kɛpem emudzi da no ber a Christ Ɔno ankasa bedzi hen wɔ asaase yi do.
Ɔyɛ yaw dɛ binom efintsiw osian nkorɔfo mfomdo ntsi. Naaso iyi ekyir no, onnyiewiei nokwar asɛmpa nsananan mu no a ɔwɔ Jesus Christ n’Asɔr a ɔwɔ hɔ ma Nda a Odzi Ekyir Ahotseweefo no ho nngu fĩ, no do nntsew, anaa ɔnnsɛɛ.
Dɛ meyɛ Ewuradze Jesus Christ No Somafo na obi a medze m’enyi ehu Asɔr yi n’abagufo na dwumadzi no, megye dase ahobrɛase mu dɛ adwenpɔw tsitsir biara nnyi hɔ a ɔfa Asɔr yi anaa asɔrmba ho a wɔbɔ a, wɔnnhwehwɛ hɛn Onnyiewiei Egya Ne nkenyan, kwankyerɛ na ngye-ntomu. Iyi nye Jesus Christ n’ Asɔr no. Nyame remma kwan ma N’Asɔr no mman mmfi no kwan a wɔahyehyɛ ho anaa ne ndaamba krɔnkrɔn ne mãhyɛ no nnwie nkõgu mu.
Kwan Da Hɔ ma Wo
Hɔn a hom atsew hom ho efi Asɔr no ho, mekã kyerɛ hom dɛ, m’anyɛnkofo adɔfo, kwan da ho da hɔ ma hom wɔ ha.
Hom mbra na hom mfa hom talent, akyɛdze, na ahoɔdzen mbɛkã hɛndze ho. No nsunsuando bowie yie ama hɛn nyina.
Binom botum ebisa dɛ, “Na m’ekyingye nsɛm so ɛ?”
Ɔyɛ ntɔyɛɛ dɛ yɛwɔ nsɛmbisa—nokwar nsɛmbisa aba ketseketse ataa afefɛw ma oenyin abɛyɛ ntseasee odupɔn. Asɔrmba mu kumabaa bi na, mber bi mu no, wɔammfa nsɛmbisa etsitsir binom enndzi aper. Asɔr no botae kor nye dɛ ɔbɛnyɛn na wɔahwɛ gyedzi aba do—wɔ ɔtɔfabi a ekyingye anhwea a enyidahɔ nnyi mu mpo. Gyedzi nye yebenya enyidado wɔ ndzɛmba a enyi nntua ho na ɔyɛ nokwar ho.7
Dɛm ntsi, m’enuanom na nkyerɛmbaa adɔfo—m’anyɛnkofo adɔfo—meserɛ, hom ndzi kan ngye hom ekyingye ho kyim ana hom agye hom gyedzi ho kyim.8 Onnyi dɛ yɛma ekyingye to hɛn adaduamu dabiarada na oyi hɛn fi ɔdɔ, asomdwee nye akyɛdze a ofi sor a odua gyedzi wɔ Ewuradze Jesus Christ mu ba no ho.
Binom botum akã dɛ, “Emi dze menye nkorɔfo a wɔwɔ Asɔr mo no nnkɔdo.”
Sɛ ibotum ehu hɛn akoma mu a, nkyɛ ibohu dɛ enye hɛn kɔdo kyɛn mbrɛ isusu. Ɔbɛyɛ wo ahobow dɛ ibohu dɛ yɛnye wo wɔ ahwehwɛdze na aperdzi na enyidado a ɔtse dɛ wodze no. W’ekyir anaa wo ntsetsee bɛyɛ dɛ mbrɛ ɔyɛ soronko fi dza edwen fa Nda a Odzi Ekyir Ahotseweefo dodow ho, mbom ɔno botum abɛyɛ nhyira. Enuanom na nkyerɛmbaa, anyɛnkofo adɔfo, yehia hom akyɛdze na nhunmu soronko no. Nkorɔfo na nyimpa horow a wɔwɔ wiadze nyina mu no yɛ ahoɔdzen ma Asɔr yi.
Binom botum akã dɛ, “Monndwen dɛ mubotum dze hom gyinapɛn no abɔ bra.”
Ɔno nye siantsir mpo a fa bra! Wɔahyehyɛ Asɔr no dɛ ɔbɛmee hɔn a wonndzi mu, wɔreper no, na wɔatɔ bahaw no. Nkorɔfo a wɔhyɛ mu no pɛ dɛ wɔdze hɔn akoma nyina sie mbrasɛm no, sɛ mpo wonndzi do konyim nnwiei a.
Binom botum akã dɛ, “Minyim hom Asɔrba bi a ɔyɛ onyisomkyerɛnyi. Munnkotum adɔm asɔr a obi a ɔtse dɛm yɛ asɔrba da.”
Sɛ efrɛ onyisomkyerɛnyi dɛ obi a onntum nndzi dza ɔgye dzi no emudzi mu a, nna hɛn nyina yɛyɛ enyisomkyerɛfo. Hɛn mu biara nntse dɛ Christ a mbrɛ yenyim dɛ yɛwɔ dɛ yɛyɛ no. Mbom enyiberdo ara yɛpɛ dɛ yedzi hɛn esintɔ na bɔn a yɛtɔ yɛ no do konyim Yɛdze hɛn akoma na hɛn kra nyina pɛ dɛ yedua Jesus Christ No Werdambɔ no mboa do bɛyɛ papa.
Sɛ iyinom nye wo pɛ a, nna wo gyinabew, anaa w’ankasa w’abakɔsɛm, anaa wo dasegye mu ahoɔdzen mfa ho, kwan da hɔ ma wo wɔ Asɔr yi mu. Bra, bɔdɔm hɛn!
Bra, Bɔdɔm Hɛn!
Hɛn esintɔ nyina ekyir no, mowɔ awerɛhyɛmu dɛ ibohu wɔ Asɔrmba yi mu no akra a wɔyɛ fɛw pii a wiadze yi wɔ dze ma. Jesus Christ n’Asɔr no twe hɔn a wɔyɛ ayamuyie na wɔwɔ tsema, anokwafo na hɔn a wɔpɛ edwumayɛ.
Sɛ w’enyi da kwan dɛ ibohu nkorɔfo a wodzi mu wɔ ha a, ɔbɛyɛ wo abagura. Mbom sɛ erohwehwɛ Christ ne nkyerɛkyerɛ a ho tsew a, Nyame N’asɛm a “ɔyɛ ɔkra a oepira edur,”9 nye Sunsum Krɔnkrɔn ne nhyɛdo a ɔtsew ho no a, nna ha na ibohu wɔ. Mber yi a gyedzi repa yi—mber yi a dodow tse dɛ wɔnye sor nkitahodzi ntamu atwe no—ha na ibohu nkorɔfo a wɔreper edua Nyame som na hɔn mfɛfo, tse dɛ ɔwo hɔn som do ehu na wɔatwe abɛn hɔn Agyenkwa. Bra, bɔdɔm hɛn!
Ana Hom So Hom Pɛ Dɛ Hom Kɔ a?
Makaa ber bi wɔ Agyenkwa n’abrabɔ mu ber a n’esuafo pii saan ekyir no.10 Jesus see Ne asomafo duebien no dɛ:
“Ana hom so hom pɛ dɛ hom kɔ a?
“Simon Peter buaa no dɛ, Ewuradze, woana hɔ na yɛbɔkɔ? Ɔwo na ewɔ onnyiewiei nkwa ho nsɛm.”11
Odu mber bi a hɛn so bɔwɔ dɛ yɛma nsɛmbisa kor noara ho mbuae. Ana hɛn so bɛpɛ dɛ yɛbɔkɔ a? Anaa hɛn so, tse dɛ Peter, bosuo onnyiewiei nkwa ho nsɛm mu dzen?
Sɛ erohwehwɛ nokwar, ntseasee, na kwan a edze wo gyedzi bedzi dwuma a, sɛ erohwehwɛ bea a ebɛkã ho a: Bra, bɔdɔm hɛn!
Sɛ efi gyedzi a mpɛn bi efuae no a: San bra bio. Bra bɔdɔm hɛn!
Sɛ ɔyɛ wo dɛ ma erepa aba a: Twentweɔn kakra. Kwan da ha ma wo.
Mototɔ serɛ hom nyina a hom retsie anaa hom rekenkan nsɛm yinom: Hom Mbra, mbɔdɔm hɛn. Hom ntsie Christ Ne frɛ bɔkɔɔ no. Hom mfa hom mbeamudua na hom nkã No do.12
Bra, bɔdɔm hɛn! Ha no ibohu dza ɔsom bo a wonntwa bo.
Megye dase dɛ ha na ibohu onnyiewiei nkwa ho nsɛm, ɔpon nhyira ho anohoba, na anamɔn kwan a ogya kwa asomdwee na enyigye ho.
Mobɔ mpaa dɛ wankasa wo nokwar ho nhwehwɛmu no dze ɔpɛ bɛba w’akoma mu ma aba abɔdɔm hɛn. Wɔ Jesus Christ ne dzin krɔnkrɔn no mu, amen.
© 2013 Intellectual Reserve, Inc. Wɔakora ho tumdzi nyina. USA na wotsintsimii. English approval: 6/13. Translation approval: 6/13. Translation of ne Nkyerɛasee Visiting Teaching Message, November 2013. Fante. 10671 502 ne nkyerɛasee