Africa
Kontinente sa Dakong Paglaum
Ang hugot nga pagtuo ug pagkamasulundon sa mga Santos sa Ulahing mga Adlaw sa Africa ug Madagascar nahimong ehemplo alang sa mga miyembro sa Simbahan bisan asa.
Sayon ra higugmaon ang mga tawo sa Africa,”1 miingon si Elder Jeffrey R. Holland sa Korum sa Napulog Duha ka mga Apostoles sa Freetown, Sierra Leone, atol sa usa ka buluhaton nga naglakip sa pagbisita sa Liberia ug Ghana.
Siya miingon nga ang hugot nga pagtuo ug pagkamasulundon sa mga Santos sa Ulahing mga Adlaw sa Africa, tungod sa ilang gugma sa ebanghelyo, nahimong ehemplo alang sa tanan nga mga miyembro sa Simbahan.
Makadayeg kini, miingon si Elder Holland, “nga makita kon unsa ka makahuluganon ang ebanghelyo ngadto kanila, nga makita kon unsa ang ilang nahimo niini, kon sa unsang paagi giamuma nila kini, nga makita ang ilang pagkamatinud-anon sa ikapulo ug sa pagserbisyo, sa pag-adto sa templo—naghunahuna ko nga ang templo mao ang pinakataas nga tumong—ug dayon makita sila nga nagpadako sa ilang mga anak diha sa Simbahan ug sa pagpamisyon sa ilang mga anak. Kini maanindot nga ebidensya sa ilang pagkamatinud-anon.”2
Samtang Nagsud-ong Kamo
Si Elder Holland nakamatikod nga, gawas sa South Africa (diin usa ka stake giorganisar niadtong 1970), ang Simbahan wala pa kaabut og 30 ka tuig sa Africa. Tungod niini, ang Simbahan dinhi “naestablisar samtang nagsud-ong kamo, paspas nga naestablisar,” ug “ang Africa usa sa espesyal nga dapit nga inyong makita ang himaya sa Ginoo, ang katingala ug milagro sa Pagpahiuli, inyong masaksihan nga naglambo.”3
Siya miingon nga kanunay niyang mahinumduman didto sa Accra, Ghana, kauban si President Gordon B. Hinckley (1910–2008), sa dihang iyang gipahibalo nga ang templo pagatukuron didto. “[Ang mga tawo] mibarug ug miabiba, mihilak ug misayaw, naggunitay sa usag usa, ug mihilak. Sa kana nga paagi, ang espiritu nabati gihapon. Ingon ana nako kahigugma ang taga-Africa—ang ilang dili matupngan nga kalipay sa ebanghelyo. Kadaghanan nila wala kaayoy materyal nga mga butang, apan sa dihang ilang nasayran ang ebanghelyo, gihangup dayon nila kini. … Ug ila kining gibuhat hangtud karon.”4
Mga Panagna Natuman
Ang ubang mga propeta ug mga apostoles nga nagtuman sa ilang mga buluhaton sa Africa naghulagway sa kontinente nga usa ka dapit diin ang mga panagna sa Ginoo literal nga natuman.
“Ang mga tawo sa Africa mabination ug mapailubon,” miingon si Elder Richard G. Scott sa Korum sa Napulog Duha ka mga Apostoles human makighimamat sa mga miyembro sa Simbahan sa Mozambique ug Nigeria. “Dili dako ang ilang kinitaan o mga kapanguhaan nga makapahimo kanila sa pagpalit og daghang mga butang, kinahanglan kini nilang paningkamutan. Sila maglakaw og lagyo nga distansya sa pagtuman og usa ka butang nga gidasig sa Espiritu Santo nga ilang buhaton sa pagpalambo sa buhat.”5
Si Elder Scott mitimaan nga niadtong 1999, sa dihang iyang gipahinungod ang Mozambique sa pagsangyaw sa ebanghelyo, adunay mga 40 lang ka miyembro didto, ug ang nasud bahin sa South Africa Johannesburg Mission. Sa iyang ikaduha nga pagbisita, niadtong Enero 2011, ang Simbahan sa Mozambique mitubo og sobra sa 5,000 ka mga miyembro sa duha ka district ug 19 ka branch sa tibuok nasud. Ang Mozambique mao usab ang ulohang buhatan sa Mozambique Maputo Mission, nga naglakip sa nasud sa Angola.6
Bag-o pa apan Naglambo
“Bag-o pa lang ang Simbahan dinhi,”7 miingon si Elder Russell M. Nelson, sa Korum sa Napulog Duha ka mga Apostoles samtang nagbisita sa Madagascar, Malawi, ug Kenya. “Saksi kami nga ang Ginoo naglihok niining talagsaong kontinente sa Africa sa pagpanalangin sa mga katawhan … uban sa kamatuoran, sa kahayag sa ebanghelyo, [lakip] sa mga ordinansa sa kaluwasan ug kahimayaan.”8 Siya miingon nga nalipay gyud siya sa kalig-on sa lokal nga pagpangulo sa Simbahan sa Africa: “Dili ko kahulagway kaninyo kon unsa ka dako among pasalamat niining [lokal] nga mga lider, nga naghatag sa ilang panahon ug talento sa pagserbisyo sa Ginoo sa pagpanalangin sa kinabuhi niining mga tawhana.”9
Si Elder Nelson “positibo kaayo” sa kaugmaon sa Simbahan ug sa mga tawo sa Africa ug sa Madagascar tungod kay ang ilang hugot nga pagtuo mas dako kay sa ilang mga hagit. “Kamo sa tinuoray mga anak sa Dios, mga anak sa Israel nga nakigsaad sa Dios, andam sa pagsugat ni Ginoong Jesukristo ug sa Dios, atong Amahan sa Kahangturan, ug mopuyo sa Ilang presensya uban sa [inyong] mga pamilya,”10 siya miingon sa usa ka miting sa Madagascar. Si Elder Nelson mipahayag usab, “Kining mga tawhana adunay dakong potensyal. Sila adunay hugot nga pagtuo. Sila nahigugma sa Ginoo, ug sila aduna sa tanang gikinahanglan aron sa paglig-on sa mga tawo.”11
Atol sa usa ka interbyu sa Nairobi, Kenya, si Elder Nelson mikomentaryo, “Kita adunay mga chapel sa Santos sa Ulahing mga Adlaw. Kita adunay stake dinhi [sa] Nairobi. Kita nag-stake conference karon. Makalipay ang pakighimamat sa mga tawo. Sobra sa liboan ka mga tawo nga nagpundok, [ug sila] may balaang pagtahud [ug adunay] nindot kaayo nga choir, [usa ka] maayo kaayo nga stake presidency, [ug usa ka] patriarch diha sa atubangan. Unsaon nako paghulagway ang akong hilabihang kalipay sa pagkakita niining kalamboan?”12
Bisan pa sa Kalisdanan
Si Elder Holland miingon nga ang Simbahan sa Africa naglambo bisan pa sa mga hagit. Sama pananglit, siya miingon, “Samtang dihay usa ka bayolenting gubat sa sibil sa Côte d’Ivoire [Ivory Coast], ang mga Santos sa Ulahing mga Adlaw … nagpadayon sa pag-adto sa templo. Kini dakong pasidungog ngadto kanila. Nagbarug ko sa kahingangha.”13
Namulong sa Sierra Leone ug sa Liberia, si Elder Holland miingon, “Tungod kay sa bag-o pa lang nilang milabay nga mga panahon nakasinati sila og kabayolenti, gubat, ug kabangis, usa kini sa mga rason nga ang ebanghelyo nakatandog kaayo kanila. Ilang nakita ang dili angay nga mamahimo sa kinabuhi, ug karon uban sa mga misyonaryo ug mga miyembro nga nagpamatuod, ilang nakita kon unsay angay kini mamahimo. Ang Langit nakapahimo sa ilang [mga pagsulay] nga usa ka panalangin, ug ilang gihaw-as ang ilang kaugalingon gikan sa kasamok sa politika ug sa sibil nga kagubot.”14
Dugang pa, si Elder Holland mipasabut nga ang pagtubo sa Simbahan sa Zimbabwe mipadayon bisan pa sa mga kalisdanan sa bag-ohayng mga katuigan: “Ang Simbahan milambo. Kita midaghan, kita adunay mga stake, kita adunay mga misyon. Mao kana ang nahitabo sa tibuok Africa.”15
Pagsangyaw sa Ebanghelyo
Usa sa yawe sa kalampusan sa Simbahan sa Africa, miingon si Elder Holland, mao nga “kita wala moapil sa dagko nga mga isyu sa politika ug komunidad. Kita nagsangyaw sa ebanghelyo. Kita naghunahuna sa kaangayan, ug kita naghunahuna sa mga oportunidad ug kaangayan sa katawhan. Apan kita naghunahuna nga [ang mga tubag makita diha sa ebanghelyo], busa nagsangyaw lang kita sa ebanghelyo. Ug kini nahitabo sa bisan asang dapit ug kini nahitabo sa Africa, nga ang mga tawo nakaangkon niana nga ideya, panalangin, ug kahayag sa ilang kinabuhi, ug sa kalit lang nausab ang mga butang ug napanalanginan ang ilang mga kinabuhi.”16
Ang Saad sa Ginoo
Gikutlo ni Elder Holland ang Manluluwas, kinsa miingon, “Ang mga naulahi mahiuna, ug ang mga nahiuna mangulahi” (Mateo 20:16).
“Sa pipila ka paagi,” siya miingon, “ang ebanghelyo ulahi nga nasangyaw sa Africa, sa labing minos gihimo nato sumala sa panahon sa Ginoo —ug sumala gyud sa panahon sa Ginoo, dali kong mimatuod. Bag-ohay lang nga ang mga taga-Africa nagsugod nga aduna nay mga misyon ug mga misyonaryo, mga panalangin sa priesthood, ug daghan pa. Kini dako nga kontinente, ug daghan pa kita og mabuhat. Nagtuo ko nga ang kalamboan nga atong nakita sa Africa kabahin sa katumanan sa saad sa Ginoo. Ang mga Santos sa Ulahing mga Adlaw nga taga-Africa adunay hugot nga pagtuo. Sila naglihok. Sila nakabuntog sa mga hagit sa pagdawat ebanghelyo ug sa pagpaklaro niini sa ilang mga kinabuhi.”17