Feia Apî
E nehenehe anei Ta’u e Horo‘a i te hoê Buka a Moromona ?
Te ora nei te taata papa‘i i Washington, te mau Hau Amui no Marite
I te matahiti matamua a haere ai au i te haapiiraa tuarua, ua ani mai to matou orometua haapiiraa evanelia i ta matou piha haapiiraa ia horo‘a i te tahi mau Buka a Moromona i te tahi mau hoa melo ore. Noa’tu pai e mea mamahu roa vau, ua farii au i te titauraa.
Piti mahana to’u imiraa i te itoito, e ua tae râ ia’u i te horo‘a i te buka i to’u hoa Britny i te taime tamaaraa i te avatea ma te faaite atu i te tahi tuhaa rii no to’u iteraa papû. Ua haamauruuru mai o Britny ia’u no te buka.
E i te hoperaa o te haapiiraa i tera matahiti, ua faaruʻe Britny i to matou vahi, aita râ maua i moʻe roa. Ua paraparau mai ona no ta’na fare haapiiraa apî, e fatata pauroa to’na mau hoa e melo no te Ekalesia ana‘e, aita râ oia i paraparau noa mai no te mau mea pae varua ia’u.
Ua taui râ te reira na mua a‘e au i haere ai i ta’u misioni. Ua farii au i te hoê parau no ô mai ia Britny no te parau mai e, e parau apî rahi ta’na na’u : e bapetizohia oia, e ua hinaaro oia e haamauruuru ia’u no te riroraa ei hoa no’na e no te faaiteraa i te hoê hi‘oraa maitai.
Ua rave te Atua i te hoê tamaroa mamahu 15 matahiti, aita hoʻi to’na ite i te pae no te ohipa misionare, e ua arata‘i ia’na no te faaite i te evanelia i te hoê taata, Ta’na i ite, e farii mai i te reira. Ua ite au e, na roto i te faarooraa i te Varua, e nehenehe ta tatou paatoa e ite mai i te taata e ati nei ia tatou o te tia‘i nei no te haapii mai no ni‘a i te evanelia tei faaho‘i-faahou-hia mai. Ua ite au e, noa’tu e, hoê noa taata ta tatou e hopoi mai i te Fatu ra, « auê hoʻi to [tatou] oaoa rahi i piha‘i iho ia’na i roto i te basileia o [to tatou] Metua! » (PH&PF 18:15).