AngPag-indeks Mahinungdanon
Ang pag-indeks makadugang sa mga rekord nga magamit diha sa internet aron ang mga miyembro makapangita ug makadala sa mga family name ngadto sa templo.
Usa ka gamay nga pahinumdom sa keyboard mabasa, “Kini nga computer gitagana alang ni Samuel sa alas 5:00 sa buntag.” Agi og tubag sa hagit sa iyang stake president nga ang stake maka-indeks og usa ka milyon nga mga ngalan, ang 14 anyos nga si Samuel B. sa Utah misugod sa pagmata sa alas 5:00 sa buntag aron maka-indeks sa dili pa moeskwela. Adunay usa lang ka computer sa panimalay ug unom ka managsoon ang mogamit para sa homework, kinahanglang isakripisyo ni Samuel ang pagtulog aron makahigayon sa paggamit sa computer.
Apan ang kadasig ni Samuel nakatakod sa iyang pamilya. Sa wala madugay ang iyang igsoong lalaki nga si Nathan misakripisyo sa panahon sa pag-basketball ug ang iyang igsoong babaye si Ivyllyn misakripisyo sa panahon sa pagbasa aron maka-indeks. “Nahagit ko sa pag-indeks sama sa akong mga anak,” miingon ang amahan ni Samuel. “Hangtud silang tanan miapil, abi nako lisud ang pag-indeks. Ila kong gitudloan nga kini sayon ug makalingaw.” Pagkasunod nga Bisperas sa Bag-ong Tuig, ang mga bata nagdali-dali sa paghuman sa ilang tinuig nga tumong sa pag-indeks sa dili pa ang tungang gabii.
Liboan ka milya ang gilay-on, ang pamilyang Lanuza sa Guatemala adunay samang kadasig. Kini nga pamilya sa siyam—lima ka anak, si Mama, Papa, si Lola, ug Lolo —naggamit og usa lang ka computer. Ang mga bata naggamit pa sa computer alang sa homework, si Mama aron sa paghuman sa iyang pag-eskwela sa unibersidad, ug si Papa sa pagtrabaho, ang computer kanunay gyud nga gigamit, ug ang kada sakop sa pamilya magpuli-puli sa pag-indeks. Hiusahon, ang pamilya naka-indeks og sobra sa 37,000 ka mga rekord niadtong 2011.
Kining mga bataa ug ang ilang mga pamilya misanong sa hagit ni Elder David A. Bednar sa Korum sa Napulog Duha ka mga Apostoles ngadto sa mga kabatan-onan sa Simbahan niadtong Oktubre 2011:
“Daghan ninyo tingali naghunahuna nga ang buhat sa family history alang lang sa mga edaran. Apan wala koy nasayran nga gilimitahan ang edad nga gihulagway diha sa kasulatan o sa lagda nga gipahibalo sa mga lider sa Simbahan nga naglimitar niining importante nga serbisyo ngadto lang sa mga edaran. …
“Akong dapiton ang kabatan-onan sa Simbahan sa pagkat-on ug pagsinati sa Espiritu ni Elijah.”1
Dali ug Sayon nga Family History
Ang pag-indeks mao ang sayon nga paagi sa tanan aron makasugod sa family history ug sa pagsinati sa Espiritu ni Elijah. Ang mga gobyerno ug mga simbahan adunay rekord sa mga tawo ug mga pamilya sa daghang mga siglo, apan kining mga rekord lisud ma-access ug nagkinahanglan og taas nga panahon aron mahan-ay kini. Sa una, ang mga tawo kinsa nahilayo sa ilang mga yuta nga natawhan kinahanglan nga mobiyahe didto ug mosiksik sa mga rekord, walay kasiguradoan nga makakita sila bisan usa ka family name.
Ang pagsugod sa pag-indeks sa FamilySearch niadtong 2006 mipadali sa pagsiksik sa family history. Ang mga pangalan sa una nga gikinamot pagsulat ug gitipigan sa layo nga mga taguanan gi-transcribed (gi-indeks) ug karon diha-diha dayon masiksik gamit ang computer. Aron mahimo kini, ang boluntaryo nga mga tig-indeks mo-download sa ilang mga computer sa panimalay og “batch” nga mga rekord nga adunay mga 10 ngadto sa 50 ka mga ngalan. Ilang i-type ang mga pangalan, petsa, ug uban pang impormasyon ngadto sa FamilySearch database, sa ingon nakamugna og mga elektronic indeks nga masiksik.
Sa wala pa ang pag-indeks sa FamilySearch, molungtad og daghang katuigan sa pagmugna og indeks nga masiksik bisan usa lang ka han-ay sa mga rekord gamit ang teknik sa una sa pag-extract sa mga ngalan. Si Michael Judson, usa ka indexing manager sa FamilySearch, miingon nga miabut og 11 ka tuig sa pag-indeks sa Freedman Bank Records (rekord sa nagantihan og kagawasan nga mga ulipon sa Estados Unidos nga naghimo og bank account). Karon siya makabanabana nga molungtad lang kini og mga bulan.
Ang mga boluntaryo sa tibuok kalibutan naka-indeks og sobra sa usa ka bilyon nga mga rekord sukad niadtong 2006, apan aduna pay daghang buluhaton. Binilyon ka mga rekord ang nagpaabut nga i-indeks sa Granite Mountain Record Vault sa Siyudad sa Salt Lake, Utah. Ug dugang pa niana aduna pay mga rekord nga anaa sa ubang mga archive sa tibuok kalibutan, diin ang Family History Department naglitrato niini sa gipaspasaon nga mga 35 ka milyon ka digital nga imahe kada bulan.
Piho nga mga Sitwasyon, Piho nga mga Panalangin
Ang Unang Kapangulohan mipahayag, “Ang mga miyembro giawhag sa pag-apil sa FamilySearch indexing nga mahinungdanon sa family history ug sa buhat sa templo.”2 Ang mga miyembro sa tibuok kalibutan nagsunod niini nga tambag ug napanalangin og maayo.
Ang mga Santos sa Ukraine nagkugi sa paghimo sa elektronik nga mga indeks aron mapadali ang pagsiksik sa family history sa Eastern Europe. Ang pamilyang Rudenko sa Kyiv nagpakita og epektibong ehemplo. Ilang gisakripisyohan ang pagbayad og Internet aron sila ug ang ilang mga anak maka-indeks og mga pangalan. Ibutang ni Sister Rudenko ang laptop diha sa lamesa sa kusina aron maka-indeks siya kon aduna siyay bakante nga oras sa adlaw. Mag-type siya gamit ang usa ka kamot samtang naggunit sa gamayng bata sa pikas kamot. Ang ilang 16 anyos nga anak nga lalaki ug 12 anyos nga anak nga babaye nahimong regular nga tig-indeks, ug usahay ang pamilya mobisita sa mga archive sa gobyerno aron sa pagsiksik sa mga family name. Ang pamilyang Rudenko kanunay nga mosumiter og mga ngalan ngadto sa templo ug nagpahigayon sa mga ordinansa alang niadtong mga ngalan, usahay kadaghan nga moadto sa templo sa usa ka semana.
Si Sister Rudenko naghisgot sa mga panalangin nga iyang nadawat tungod sa buhat sa family history: “Ako nagtuo nga ang pag-indeks ug ang buhat sa family history moprotekta kanato. Gisaaran ko sa akong patriyarkal nga panalangin nga ang paghimo niini nga buhat moprotekta nako ug sa akong mga anak. Ang ilang mga hunahuna limpyo, ug sila makasugakod sa dautang mga impluwensya sa kalibutan. … [Ang akong mga anak] makaangkon og gahum sa Dios tungod niini nga buhat.”
Daghang mga miyembro nakadiskobre nga ang pag-indeks nakahatag og makahuluganong oportunidad sa pagserbisyo, dili igsapayan ang kahanas o sitwasyon. Si Malinda Perry sa Utah, USA, naaksidente sa sakyanan sa dihang siya 24 anyos nga nakaparalisar niya gikan sa liog paubos. Samtang nag-adjust siya sa iyang bag-ong estilo sa kinabuhi, si Sister Perry nag-ampo sa mga paagi nga siya makaserbisyo. Iyang nadawat ang tubag sa dihang si Rayleen Anderson gikan sa Relief Society presidency sa stake mibisita niya ug mitudlo niya unsaon sa pag-indeks. Karon si Sister Perry naggahin og panahon diha sa computer kada adlaw nga nag-tape og tukog sa iyang tudlo, aron maka-type siya. Maka-indeks siya og usa ka batch sa mga ngalan kada adlaw.
“Imbis nga mag-focus ko sa akong kaugalingon, sama kaniadto, akong giusab akong focus ngadto sa pagserbisyo sa uban,” miingon si Sister Perry. “Gihigugma nako ang Ginoo, ug ganahan nako ipakigbahin ang Iyang mga panalangin ngadto sa uban pinaagi sa pag-indeks.”
Samtang naminaw sa usa ka pasundayag sa family history, si David Pickup ang stake president sa Chorley, England, nadasig nga ang pag-indeks makatabang sa mga miyembro sa iyang stake nga mas madasig sa pag-adto sa templo. Apan siya naghunahuna, sa unsang paagi ang komon nga pag-type sa datos makadala sa katawhan ngadto sa templo?
Siya mihukom nga mosulay sa pag-indeks ug iyang nakaplagan nga kini mas nakapabati niya sa Espiritu ni Elijah sa iyang kinabuhi. Alang kaniya, ang pag-indeks usa ka buhat nga“makapaamgo”. “Dili mo mag-indeks nga maghunahuna lang sa mga ngalan nga gi-indeks apan sa imo mismong mga family name,” siya miingon.
Si President Pickup mihagit sa mga miyembro sa iyang stake sa paggamit sa pag-indeks isip paagi sa pag-apil sa buhat sa family history. Sulod sa mubong panahon, siya ug ang ubang mga lider sa stake nakabantay sa talagsaong pagdaghan sa mga tawo nga takus alang sa rekomend sa templo ug nanambong og miting sa sakrament. Ilang nabantayan nga ang mga miyembro kinsa miapil sa pag-indeks nakapalambo og tinguha sa pagdala sa ilang mga family name ngadto sa templo.
Ang dise siyete anyos nga si Mackenzie H. kinasingkasing nga misanong sa hagit ni President Pickup ug misugod sa pag-indeks, ug iyang gitabangan ang iyang mga igsoon, mga ginikanan ug apohan nga mobuhat usab. Sa wala pay duha ka tuig, si Mackenzie naka-indeks og sobra ka 44,000 nga mga ngalan. Mas importante, si Mackenzie ug ang iyang pamilya nadasig sa pagpangita sa kaugalingon nilang family name, ug gidala kini sa templo, ug gipahigayon ang makaluwas nga mga ordinansa.
Ang pag-indeks nakatabang sa mga miyembro sa stake sa Chorley kay ilang mas nabati ang Espiritu sa ilang kinabuhi ug nakahatag nila sa mga himan nga ilang gikinahanglan sa pagdala sa ilang mga family name ngadto sa templo. “Dili kinahanglan nga kamo takus nga mosulod sa templo aron maka-indeks,” miingon si President Pickup, “apan kon mag-indeks mo, kini makapaamgo kaninyo, ug kamo gusto nga mahimong takus aron makasulod sa templo ug maganahan mong moadto sa templo, ug maganahan mong mobuhat sa mga buluhaton alang sa inyong katigulangan. … Ako nasayud niini kay kini nahitabo nako.”
Ang Pag-indeks Nakatabang sa Tanan
Ang Ginoo misaad, “Tan-awa, ako modali sa akong buluhaton diha sa iyang angay nga panahon” (D&P 88:73). Ang pag-indeks usa sa paagi nga gituman sa Ginoo kana nga saad. Posible nga siksikon sa tawo ang ila lang katigulangan ug pasagdan ang uban nga mangita sa ilang katigulangan, apan ang indexing nakatabang ug nakapapaspas sa pagsiksik sa family history sa tanan. “Gihatagan kita sa Ginoo sa teknolohiya para sa dakong kalamboan sa pagpangita sa mga ngalan,” miingon si Brother Judson. “Wala lang mo nagtrabaho sa inyong kaugalingong family history karon; ang pag-indeks usa ka hiniusang mga paningkamot aron sa pagtabang sa tanang anak sa Langitnong Amahan.”