Tubag sa Iyang mga Pag-ampo

Lindsey Leavitt, Nevada, USA

Wala nako mabati ang diwa sa Pasko. Disyembre kadto sa akong senior nga tuig sa high school, ug mga application sa kolehiyo ug ang akong katapusang proyekto sa Laurel kinahanglang humanon. Ako naglaum nga makakita og kahigayunan sa pagserbisyo nga akong malista sa akong mga application sa kolehiyo ug magamit usab nga akong proyekto sa Laurel. Swerte kay ang akong adviser sa student council mihangyo sa akong higala nga si Jessica ug nako kon maka-organisar ba mi sa eskwelahan og pagpangolekta og mga dulaan para sa local charity.

Akong gitugyan ang kadaghanan sa buhat ngadto sa komite sa proyekto. Gipahimo nako sila og bulletin board nga adunay dako nga thermometer nga nagpakita sa gidaghanon sa mga dulaan nga gidonar. Abi namo nga igo na kadto nga pag-advertise, ug among gigahin among panahon sa tingpaniudto sa pagkolekta sa mga donasyon. Gamay ra ang mga dulaan nga gidonar, ug ang thermometer ubos gihapon.

Katingalahan, ang among adviser misugod sa paglain sa ubang mga dulaan. Sa dihang si Jessica ug ako nangutana kon unsa iyang plano niini, siya miingon nga usa ka magtutudlo bag-ohay lang nahiling nga adunay kanser. Human nanlimbasug sa pagtudlo samtang nagpatambal, nakahukom siya nga mopahulay una sa trabaho. Uban sa nagsingabut nga pasko ug nagsaka nga medikal nga bayranan, wala kaayo silay maandam sa Pasko. Ang among adviser misugyot nga among puston ang gilahi nga mga regalo para nila.

Natandog ko. Gilantaw nako ang akong proyekto sa pagserbisyo nga para lang sa akong kaugalingon, dili sa uban. Mihukom ko nga triplehon among tumong sa gidaghanon sa mga dulaan ug mosugod sa pagpangolekta og kwarta para niadtong magtutudlo ug sa iyang pamilya.

Si Jessica ug ako mibisita sa mga klasrom ug gipaila among kawsa. Ang tubag nindot kaayo. Ang mga magtutudlo, kawani, ug mga estudyante nanghatag og mga dulaan ug kwarta sa pagtabang sa pamilya. Sa wala madugay misobra ni sa among tumong, nga nakapatingala sa charity. Nakakolekta usab mi og sobra sa $1,000 para sa pamilya.

Samtang mainampingon namong giputos ang mga regalo nga among nakolekta ug napalit, nakaamgo ko nga ang akong nabatunan nga pagpamatuod sa pagserbisyo sama katalagsaon sa mga regalo nga among gipanghatag. Dili nako mapahayag ang kahinam nga akong nabati samtang sekreto kaming nagtan-aw sa pamilya sa ilang pagdiskobre sa mga regalo nga gibilin namo diha sa ilang balkon.

Pipila ka bulan ang milabay, si Jessica ug ako gihangyo sa pagtudlo og seminar kabahin sa mga proyekto sa pagserbisyo. Among gisaysay ang among nabuhat nga wala maghisgot sa ngalan sa magtutudlo. Usa ka batang babaye miisa sa iyang kamot ug mibarug. Mitulo ang iyang mga luha samtang namulong. Ang magtutudlo iyang uyoan, ug iyang gihulagway kon usa ka mahinungdanon ang among pagserbisyo ngadto sa iyang uyoan. Siya miingon nga kini tubag sa iyang mga pag-ampo.

Dako among kalipay niadto nga pasko nga kinasingkasing nga nagtinabangay sa pagserbisyo ug nasayud nga kami nakahimo og kalainan.