Mahimo Ni Nako!

Roy Atkin, California, USA

Gabii kadto atol sa panahon sa pasko, ug baga na ang snow diha sa yuta. Sulod sa daghang mga bulan ang akong kompanyon ug ako milahutay sa bugnawng panahon sa Germany, nanuktok sa mga pultahan, ug nagtunol og mga Basahon ni Mormon. Bisan pa niadto, 15 ka tuig human natapos ang Ikaduhang Gubat sa Kalibutan, daghang mga German ang mabinantayon sa mga Amerikano.

Apan niadtong gabhiuna si Ingeborg Bienmuller pagabunyagan. Sa taas nga biyahe sa bus padulong sa base sa United States Air Force, siya hilom lang. Akong namatikdan ang iyang kaguol.

Samtang nagkaduol mi sa hununganan sa bus, si Ingeborg milingi namo ug miingon, “Kahibalo ba mo kon unsa ni kalisud alang nako? Gipatay sa Alyadong puwersa ang akong bana, ug daghan sa akong mga paryente ang namatay sa mga pagbomba.”

Iyang gihikap ang iyang paa. “Naigo ko sa usa ka metal gikan sa bomba. Dili na gyud maayo akong paa. Wala ko masayud kon makaako ba ko sa pagsulod didto.”

Hilom kaming nanglingkod samtang namalandong sa iyang gisulti ug ang bus mihunong. Dili komportable nga naglingkod si Ingeborg. Mikuba ang akong kasingkasing. Nag-ampo ko nga dili siya moatras tungod sa kahadlok.

Mibarug siya sa iyang gilingkuran ug mideklarar, “Gihatagan ko sa Langitnong Amahan og pagpamatuod sa katinuod sa Pagpahiuli. Nasayud ko nga ang Basahon ni Mormon tinuod. Mahimo ni nako! Elder Atkin, abagi ko sa paglakaw.”

Nalakaw namo ang taas nga dalan padulong sa gate, lalum ang gininhawa ni Ingeborg samtang among nalabyan ang mga gwardiya. Nag-ilis mi sa among puti nga sinina ug nakit-an ang pool sa base. Ang pool nahimong sagrado nga dapit, ug mibati kami og kalinaw. Ang kahadlok nga anaa sa dagway ni Ingeborg napulihan og kalipay sa dihang siya misulod sa pool ug nabunyagan isip miyembro sa Simbahan.

“Sa gabii nga gihatagan ko sa mga elder sa Basahon ni Mormon, naghinam-hinam ko,” miingon siya namo samtang nagsakay mi pauli. “Wala ko mohunong sa pagbasa hangtud naabut ko sa Mosiah 18, diin gidapit ni Alma ang mga tawo nga magpabunyag: ‘Tan-awa, ania ang mga katubigan sa Mormon … ug karon, ingon nga kamo mga matinguhaon sa pag-ipon ngadto sa panon sa Dios, ug pagatawgon nga iyang mga katawhan, … unsay anaa kaninyo batok sa pagpabunyag?’” Mosiah 18:8, 10.

Siya hinayng mipadayon, “Nakatulog ko paghuman og basa niadtong mga pulong, ug nagdamgo. Nagbarug ko duol sa nindot nga katubigan sama sa Katubigan sa Mormon. Sa pikas bahin sa tubig ang mga tawo nagbarug nga nakaputi—akong pamilya! Ang akong bana, kinsa gipatay panahon sa gubat, nagpahiyom ug nag-agni kanako nga magpabunyag.”

Kadtong gabhiona si Sister Bienmuller nahimong miyembro sa Würzburg Branch ug usa sa daghan nga taga-Germany kinsa nakabuntog sa ilang kahadlok ug namiyembro sa Simbahan.