Mianhi Mi aron sa Pagkuha sa Among mga Regalo

Walter Emilio Posada Rodriguez, Colombia

Sa dihang sakop pa ko sa among district presidency, mitabang ko sa paghan-ay og kalihokan diin ang mga miyembro sa among district modonar og mga dulaan ngadto sa kabus nga mga bata sa siyudad sa Soacha, Colombia. Talagsaon ang pagsanong sa tanang mga miyembro. Dili tanang regalo bag-o, apan kadaghanan mga maayo.

Sa dihang nahuman na namo og karga ang mga regalo sa bus nga modala namo sa siyudad, usa ka batang babaye miduol nako nga adunay plastik nga bola nga ginamit na pag-ayo ug nagarasan. Gidawat ko ang bola, naghunahuna kon si kinsa kaha ang nag-donar niining bati nga bola. Uban sa pagtamay ako kining giitsa ilawom sa lingkuranan.

Sa dihang miabut mi, ang among mga kabatan-onan misugod sa pagkanta sa mga himno sa Pasko. Ang ilang musika, uban sa ilang mga kalo sa Pasko, nakadani sa daghang mga bata. Sa dihang nagsugod nami sa paghatag sa mga regalo, kadtong mga bata didto nanawag sa ubang mga bata. Sa wala madugay nahurot na namo paghatag among mga regalo.

Sa dihang mobiya na unta mi, nakakita ko og batang lalaki mga otso anyos nga nagdagan paingon namo, naggunit sa iyang manghud nga lalaki. Dihang miabut sila, ang magulang miingon, “Mianhi mi aron sa pagkuha sa among mga regalo.” Ang iyang kainosente nakapahilom nako ug nakatandog sa akong kasingkasing.

Akong gipasabut kaniya nga nahurot na ang mga regalo. Siya mitubag, “Dili igsapayan kon wala koy regalo, apan kinahanglan aduna ang akong manghod.”

Dayon nakahunahuna ko sa bola ilawom sa akong lingkuranan. Akong gisultihan ang mga bata nga naa pa koy usa ka regalo pero dili kini nindot.

“Dili igsapayan kon unsa ni,” siya miingon. “Mao na kadto ang regalo.”

Misaka ko sa bus ug gikuha ang bola. Sa dihang gihatag ko kini sa batang lalaki, hingpit iyang kalipay. Naglukso uban sa pasalamat, siya miingon, “Bola! Kana mao ang regalo nga akong gipangayo sa batang Kristo nga ihatag kanako.” Siya mipadayon nga malipayong nagsayaw-sayaw samtang siya ug iyang igsoon mipauli uban sa ilang regalo.

Hilom kong nagbarug ug nakahilak samtang usa ka mainit nga pagbati sa kalinaw ug pasalamat milukop kanako. Ang kabalaka ug dili hinakog nga pag-atiman sa magulang nga lalaki ngadto sa iyang manghod nakatandog kanako, ug hilom kong naglaum nga unta sama ko kamadasigon sa magulang nga lalaki sa pagpanalangin sa iyang manghod.

Samtang malipayong naglakaw ang mga batang lalaki, napahinumduman ko sa gugma sa Manluluwas alang kanato. Wala gani Niya kalimti ang batang lalaki nga nagpuyo sa bukid kinsa nangayo og simpleng bola alang sa Pasko.