Mensahe sa Visiting Teaching
Ang Balaan nga Misyon ni Jesukristo: Ang Bugtong Anak
Mainampoong tun-i kini nga materyal ug tinguhaa nga masayran kon unsa ang ipakigbahin. Sa unsang paagi ang pagsabut sa kinabuhi ug misyon sa Manluluwas makadugang sa inyong pagtuo diha Kaniya ug makapanalangin niadtong inyong giamuma pinaagi sa visiting teaching? Alang sa dugang nga impormasyon, adto sa reliefsociety.lds.org.
Hugot nga Pagtuo, Pamilya, Kahupayan
Ang atong Manluluwas, si Jesukristo, gitawag nga Bugtong Anak tungod kay Siya lang ang tawo dinhi sa yuta nga natawo sa usa ka mortal nga inahan ug imortal nga Amahan. Napanunod Niya ang balaanong gahum gikan sa Dios, Iyang Amahan. Gikan sa Iyang inahan, si Maria, Iyang napanunod ang mortalidad ug Siya mahimong gutumon, uhawon, maluya, masakitan, ug mamatay.1
Tungod kay si Jesukristo mao ang Bugtong Anak sa Amahan, Siya makahimo nga mamatay ug mabanhaw. Ang mga kasulatan nagtudlo nga “pinaagi sa pag-ula ni Kristo,” kita “makabaton og pagkabanhaw” (Jacob 4:11). Kita usab makakat-on nga ang tanan “unta mabanhaw ngadto sa pagka-imortal ngadto sa kinabuhing dayon” kon kita “motuo” (D&P 29:43).
Kon kita hingpit nga makasabut sa kahulugan nga si Jesus mao ang Bugtong Anak sa Amahan, ang atong pagtuo diha kang Kristo molambo. Si Elder D. Todd Christofferson sa Korum sa Napulog Duha ka mga Apostoles miingon, “Ang hugot nga pagtuo diha ni Jesukristo mao ang kombiksyon ug kasiguradoan sa (1) Iyang kahimtang isip Bugtong Anak sa Dios, (2) Iyang mahangturong Pag-ula, ug (3) Iyang literal nga Pagkabanhaw.”2 Ang mga propeta karon mipamatuod: “[Si Jesukristo] mao … ang Bugtong Anak diha sa unod, ang Manunubos sa kalibutan.”3
Gikan sa mga Kasulatan
Gikan sa Atong Kasaysayan
Diha sa Bag-ong Tugon makabasa kita og mga babaye, ginganlan ug wala manganli, kinsa migamit og hugot nga pagtuo diha kang Jesukristo, nakat-on ug nagpakabuhi sa Iyang mga pagtulun-an, ug mipamatuod sa Iyang pangalagad, mga milagro, ug kaharianon. Kini nga mga babaye nahimong ehemplo nga mga disipulo ug importanting mga saksi sa buhat sa kaluwasan.
Sama pananglit, si Marta lig-ong mipamatuod sa kabalaan sa Manluluwas sa dihang Siya miingon ngadto Kaniya, “Ako nagatuo nga ikaw mao ang Kristo, ang Anak sa Dios, ang moanhi sa kalibutan” (Juan 11:27).
Ang pipila sa labing una nga mga saksi sa kabalaan sa Manluluwas mao ang Iyang inahan, si Maria, ug iyang ig-agaw nga si Elisabet. Sa wala madugay human si anghel Gabriel mibisita ni Maria, siya mibisita kang Elisabet. Sa dihang nadungog ni Elisabet ang timbaya ni Maria, siya “napuno sa Espiritu Santo” (Lucas 1:41) ug mipamatuod nga si Maria mahimong inahan sa Anak sa Dios.