Labaw pa sa Bata-bata

Naghunahuna ka ba nga ikaw nagkuyog-kuyog lang sa home teaching? Hunahunaa pag-usab.

“Nasayud ko kon unsaon nga mahimong higala ug ingon man usab usa ka home teacher. Ganahan ko nga makita unsa ang akong mahimo sa pagtabang sa uban.”

Paghulagway pinaagi ni Sal Velluto

Nakita ninyo kini sa mga nobela o sine makadaghan. Dunay dako, makahadlok nga problema nga nagpaabut sama sa usa ka ngitngit nga dag-um sa unahan. Daw dili kapugngan ang katalagman. Dayon moabut ang bayani nga mobuntog sa mga babag ug mohimo og kaayohan.

Ang mao nga mga bayani sa kasagaran giubanan sa usa ka bata-bata. Kini nga karakter kasagaran dunay pipila ka mga kahanas, apan kasagaran anaa aron sa pagtabang sa bayani kon kini anaa sa kakuyaw.

Isip usa ka junior nga kompanyon sa home teaching, tingali makatintal sa paghunahuna sa inyong kaugalingon nga bata-bata sa panagkompanyon. Human sa tanan, ang inyong hamtong nga kauban dugay-dugay na ug dunay daghang kasinatian kay kaninyo. Busa siya lang ang bahala sa paghimo og kaayuhan, eksakto ba?

Dili kaayo.

Kon bahin kini sa home teaching, walay superhero (ang inyong mas magulang nga kompanyon) ug ang iyang bata-bata (kamo)—duha lang ka mga superhero kinsa tinuoray nga makapausab sa kalibutan.

Bisan kinsa kamo ug unsay inyong kaagi, anaa kaninyo unsay makahimo og dakong kalainan sa mga kinabuhi niadtong inyong gibisitahan.

Walay Labaw ka Mahinungdanon nga Tawag

Si President Ezra Taft Benson (1899–1994) miingon, “Walay mas labaw ka mahinungdanon nga calling sa Simbahan kay sa usa ka home teacher.”¹

Daghan ang mahimo sa home teacher kay sa pagpakigbahin lamang sa espirituhanon nga mensahe. Sila motabang sa matag pamilya nga masayud nga sila dunay mga higala nga ilang matawag.

Si President Thomas S. Monson miingon, “Ang usa ka higala makahimo og labaw pa kay sa usa ka pagbisita sa matag bulan. … Ang usa ka higala nagpakabana. Naghigugma ang usa ka higala. Ang usa ka higala maminaw. Ug ang usa ka higala motabang.”²

Ang suod nga panaghigalaay, siyempre, mahimo bisan unsay edad.

Pagserbisyo isip usa ka Higala

Si Sean C., 16 anyos nga gikan sa southern Utah, USA, nasayud kon unsaon nga mahimong usa ka higala ug ingon man usab usa ka home teacher. Si Sean dunay daghang ganahan nga buhaton lakip sa pag-rodeo, pakiglayog [wrestling], pagbantay sa mga baka, ug pag-ayo og sakyanan. Ganahan usab siyang mougmad og panaghigalaay sa mga tawo nga iyang gi-home teach.

“Ganahan kong makigsulti og mga tawo ug motan-aw unsay akong mahimo sa pagtabang nila,” Miingon si Sean.

Ang iyang kauban sa home teaching mao ang bishop sa ilang ward. Sa usa ka panimalay nga ilang gibisitahan, ang asawa miyembro sa Simbahan ug ang bana dili. Naamigo ni Sean ang bana, nga si Floyd, sa ilang unang pagbisita. Sa dihang si Floyd miistorya mahitungod sa iyang Jeep, nainteresado dayon si Sean.“Komportable dayon kami sa usag usa,” miingon si Sean.

Sa tuig nga gibisitahan ni Sean ug sa bishop si Floyd ug ang iyang asawa, napalig-on ni Sean ang panaghigalaay—lakip sa pagtabang ni Floyd sa pag-ayo sa makina matag karon ug unya.

Usa sa paborito nga kasulatan ni Sean mao ang pagserbisyo: “Kon kamo anaa sa pag-alagad sa inyong mga isigkatawo kamo anaa lamang sa pag-alagad sa inyong Dios” (Mosiah 2:17).

Gipasabut ni Sean, “Ang tanan kinahanglang mangita og paagi sa pagserbisyo.”

Ang Inyong Espirituhanong mga Gasa

Kitang tanan dunay espirituhanong mga gasa ug talento. Agig dugang, kita adunay talagsaong mga interes ug mga hilig. Ang matag usa nato dunay butang nga espesyal nga ikahatag nga walay laing tawo nga makahimo sa samang paagi.

“Ang kada tawo lahi ug adunay usa ka lahi nga kontribusyon nga mahimo,” gitudlo ni President Henry B. Eyring, Unang Magtatambag sa Unang Kapangulohan. “Walay usa nga nadestino nga mapakyas.”³ Ang home teaching mahimong oportunidad alang ninyo sa paggamit niana nga mga gasa aron kahatagan og kaayohan ang uban.

Sama pananglit, kon turno na ninyo sa pagpakigbahin og espirituhanong mensahe, mahimo ninyong ikonsiderar ang pag-ampo daan sa unsay inyong isulti nga labing makatabang sa mga tawo nga inyong bisitahan.

Kasagaran, kamo adunay personal nga kasinatian uban sa gihatag nga hilisgutan nga inyong hisgutan sa pamilya. Ipadan-ag ang inyong kahayag Ipakigbahin unsay inyong nahibaloan.

Makakita usab kamo og mas maayo ug makahuluganong mga paagi sa pagserbisyo sa mga pamilya nga inyong bisitahan. Hunahunaa, pananglit, nga usa ka tawo sa usa sa inyong gibisitahan nga panimalay gustong makat-on sa gitara. Naatol pud nga kamo dugay nang tigtukar og gitara. Niini nga sitwasyon, ang pipila ka mga tip sa musika makatabang sama sa pagpala sa snow sa ilang agianan sa sakyanan o pagpul-ong sa ilang mga kahoy.

Kon mahitungod sa home teaching, ang inyong senior nga kompanyon tingali usa gayud ka espirituhanong tawo. Apan sabta kini. Kamo usa ka anak sa Dios ug takus nga makabuhat sa inyong responsibilidad isip home teacher.

Kanunay kamo dunay butang nga ikadugang.

Mubo nga mga sulat

1. Ezra Taft Benson, “To the Home Teachers of the Church,” Ensign, Mayo 1987, 50.

2. Thomas S. Monson, “Home Teaching—a Divine Service,” Ensign, Nob. 1997, 47.

3. Henry B. Eyring, “Tabangi Sila nga Motaas ang Panglantaw,” Liahona, Nob. 2012, 60.

4. Linda K. Burton, “Pagpaniid Una, Dayon Pagserbisyo,” Liahona, Nob. 2012, 78.

Apil sa Pag-istoryahanay

Sa tibuok Disyembre, ang inyong mga leksyon sa Dominggo mag-focus sa pagtukod sa gingharian sa Dios. Ang home teaching usa ka paagi sa pagbuhat niini, apan ang tanan makatukod sa gingharian sa Dios pinaagi sa inadlaw nga mga buhat sa pagserbisyo. Samtang kamo mag-ampo alang sa uban, ang Espiritu makapahunahuna og butang nga inyong mahimo. Hinumdumi kining tambag gikan ni Sister Linda K. Burton, Relief Society general president: “Pagpaniid una, dayon serbisyo.”⁴ Sa unsang paagi kamo nakakita og mga paagi sa pagpaniid ug pagserbisyo sa pagtukod sa gingharian sa Dios? Pag-andam sa pagpakigbahin sa inyong mga kasinatian sa inyong ward, uban sa inyong pamilya, o sa ubang kabatan-onan.