Wala Na Maadik: Ang Akong Pakigbisog sa Pagbuntog sa Pornograpiya
Isip usa ka batan-ong babaye, wala ko magdahum nga ang pornograpiya mahimo nakong problema.
Gihulagway ni Jim Madsen
Wala gyud ko maghunahuna nga ang pornograpiya mahimong problema sa batan-ong babaye. Nasayop ako sa nag-edad pa ako og 16. Nakakita ko og video sa pornograpiya, ug tungod kay ako nag-inusara ug kuryuso, gitan-aw nako kini. Human nianang unang higayon, gibati nako nga motan-aw pa og dugang kada adlaw. Naadik ko sa pornograpiya.
Dili maayo ang akong bation kon motan-aw ko og pornograpiya. Nasayud ko nga sayop kini, apan wala koy gibuhat sa pag-usab. Wala gyud ko magmalipayon, ug gibati nako nga hugaw ug natakdan sa kahugaw ni Satanas. Sa gihapon nangita ko og paagi nga motan-aw niini aron akong matagbaw ang akong kahinam. Ang akong pagkaadik misangpot og dugang pang sayop nga mga binuhatan.Namakak ko sa tanan: sa akong igsoong lalaki, sa akong inahan, ug ang grabe sa tanan, sa Ginoo ug sa akong kaugalingon. Sultihan nako ang akong kaugalingon nga ang usa ka dugang nga salida dili makadaot nako, usa ka dugang nga imoral nga istorya dili ingon niana kadautan.
Miadto gihapon ko sa simbahan, Mutual, ug seminary, apan wala koy eksakto nga kinaiya o Espiritu uban nako. Masuk-anon ko, mao nga wala koy nasabtan sa mga leksyon. Mihunong ko sa pagbayad sa akong ikapulo, pag-ampo, ug pagbasa sa mga kasulatan. Mibati ko nga sad-an, apan dili gihapon ako makahunong. Nagkagrabe ko kada adlaw.
Sa katapusan, ang akong pag-access sa pornograpiya nalimitahan. Sa sinugdanan mibati ko nga nahikawan nga walay pornograpiya, apan nakaamgo ko nausab ang sitwasyon sa mas maayo. Ang akong buluhaton lahi. Wala ko motan-aw og pornograpiya kada adlaw. Anaa gihapon ang kahinam sa pagtan-aw niini, pero mas makahimo na ko sa pagpakigbatok niini. Sa katapusan, human sa duha ka tuig nga pagkaadik sa pornograpiya, nagsugod ko sa pag-ampo kanunay alang sa kalig-on ug mihunong sa pagtan-aw niini sa hingpit. Apan gibati gihapon nako nga hugaw sa sulod. Nasayud ko nga kinahanglang makigsulti ko sa bishop. Dili lang gyud ko makahimo niini.
Sa katapusan, human makadungog sa daghang mga tawo nga naghisgot kabahin sa proseso sa paghinulsol ug sa mga pagsulay nga ilang nabuntog, gibati nako nga kinahanglang makigkita ko sa akong bishop. Naamguhan usab nako nga wala nako ang usa ka panalangin sa Simbahan: ang akong patriyarkal nga panalangin.
Nakig-appointment ko sa akong bishop.
Gibati nako ang kaulaw nga naglakaw ngadto sa opisina sa bishop sa gabii sa akong interbyu. Nahadlok ko nga motan-aw lang siya nako ug mosulti nga wala na koy paglaum ug nga ako mikalot og lawom kaayo nga lungag nga dili na makagawas. Nahadlok ko nga mausab ang iyang pagtan-aw nako. Apan sa dihang gisultihan nako siya sa akong tibuok istorya, mahigugmaon siyang mipahiyom ug naminaw pag-ayo. Naghunahuna gayud siya nako. Human makig-istorya sa akong bishop ug naningkamot nga mag-usab, sa katapusan miingon siya nako nga ako limpyo.
Ang katuigan sa akong pagkaadik sa pornograpiya mao ang pinakalisud sa akong kinabuhi, apan nindot kaayo ang akong gibati nga mibiya sa opisina sa bishop ug mibati nga limpyo. Ingon og ang gibug-aton nga akong gipas-an sa daghang mga tuig nawala sa akong mga abaga. Nalipay ko nga makadawat sa akong patriyarkal nga panalangin ug takus nga moambit sa sakrament ug makabaton sa Espiritu pag-usab. Gibati nako nga usa ka bag-ong tawo. Ang mga tawo misulti nako kon unsa ko ka lahi ug nga dunay nagdan-ag nako nga lahi. Mas malipayon ko sa tanang panahon ug dunay mas maayo nga kinaiya sa tanang butang.
Nasayud ko nga uban sa tabang sa Ginoo makausab kita ug makabuntog sa pagkaadik. Ug dili kita mabalaka kabahin sa pagpakig-istorya sa bishop, tungod kay motabang siya nato kon kita maghinulsol aron atong mabati ang kalimpyo pag-usab pinaagi sa Pag-ula ni Jesukristo.