Pagbarug sa Balaan nga mga Dapit
Ang mga magasin sa Simbahan karong tuiga midapit sa mga kabatan-onan sa tibuok kalibutan sa pagpadala og mga litrato nga nagpakita giunsa nila sa pagbarug sa balaan nga mga dapit. Tan-awa ang pipila ka litrato nga gipadala ug tan-awa unsay gibuhat sa kabatan-onan sa pagsunod sa 2013 nga tema sa Mutual.
1 Kon ako moapil sa maayo nga mga kalihokan, ilabi na sa akong pamilya, nagbarug ko sa balaan nga mga dapit.
LaRae R., edad 16, British Columbia, Canada
2 Nagbarug ko sa balaan nga mga dapit kon gihatagan nako og bili ang butang nga dunay mahangturong bili kay sa mga butang sa kalibutan.
Kirck M., edad 18, Negros Occidental, Philippines
3 Alang nako, ang pagbarug sa balaan nga dapit nagpasabut sa pagserbisyo. Ang akong paborito nga paagi sa pagserbisyo mao ang pagserbisyo sa templo. Mobati ako og lig-on nga espiritu kon ako nagbuhat sa buluhaton sa Ginoo diha sa balay sa Ginoo.
Kiana B., edad 15, Utah, USA
4 Nagbarug ko tapad sa bunyaganan diin ako nabunyagan. Akong gikonsiderar kini nga bunyaganan nga balaan nga dapit tungod kay dinhi naghimo ang mga tawo og pakigsaad uban sa Dios ug gibag-o.
Joe Smith E., edad 17, Akwa Ibom, Nigeria
5 Matag higayon nga moadto ko sa bukid ug mahimulag ko sa kalibutan, nakaamgo ko nga kini mahimo nga balaan ug malinawon nga mga dapit.
Emma P., edad 17, Oregon, USA
6 Ganahan ko sa gawas, ug matag higayon nga ako naa sa usa ka dapit nga sama niini (Delicate Arch sa Moab, Utah), mobati ko nga duol sa akong Langitnong Amahan. Nakakita sa talagsaon nga mga butang nga gilalang sa Langitnong Amahan alang nato makatabang nako nga mobati sa Espiritu.
John T., edad 18, Utah, USA
7 Ang akong panimalay balaan, sagrado nga dapit tungod kay akong gibati ang kalipay ug kalinaw. Ug kon mobasa ko sa Basahon ni Mormon, mobati ko og kalinaw pinaagi sa Espiritu Santo.
Melisa D., edad 13, Kosovo
8 Kini ang usa ka litrato gikan sa New Beginnings. Alang nako, ang building sa simbahan usa ka balaan nga dapit diin ako makakat-on sa mga mithi sa Young Women ug sa mga baruganan sa ebanghelyo. Sa simbahan, mapalig-on usab nako ang panaghigalaay sa batan-ong mga babaye kinsa susama nako og pagtuo.
Luize S., edad 12, Rio Grande do Sul, Brazil
9 Nagbarug ako sa balaan nga dapit kon ako motabang sa mga tawo ug maglingaw-lingaw uban sa buotang mga higala.
James R., edad 17, North Carolina, USA
10 Nagbarug ako sa balaan nga dapit kon ako uban sa mga higala kinsa nagsunod sa ebanghelyo. Sila makatabang nako nga maduol sa atong Langitnong Amahan ug mas mahiuyon sa Espiritu Santo.
Jonathan N., edad 17, Buenos Aires, Argentina
11 Nagbarug ako sa balaan nga mga dapit kon mopatukar ako sa piano atol sa miting sa sakrament. Ang mga melodiya ug pulong sa mga himno makalig-on sa akong pagtuo ug pagpamatuod.
Chelsea A., edad 13, Banten, Indonesia
12 Nagbarug ko sa balaan nga mga dapit kon ako mogiya sa mga kanta atol sa miting sa sakrament tungod kay ako matandog sa nindot nga pagkanta sa kongregasyon.
Geovani W., edad 15, Banten, Indonesia
13 Nagbarug ko sa balaan nga mga dapit kon ako motudlo sa akong korum ma-Dominggo. Ganahan ko nga mopakigbahin sa ebanghelyo.
Ramón M., edad 16, California, USA