« មករកព្រះគ្រីស្ទ »
យុវជននៃបព្វជិតភាពអើរ៉ុន ឆ្នាំនេះបាវចនាម៉្ញូឆលរបស់យើង បំផុសគំនិតអ្នកឲ្យគិតអំពីទំនាក់ទំនងរបស់អ្នកជាមួយព្រះយេស៊ូវគ្រីស្ទ ព្រះអង្គសង្គ្រោះ និងព្រះប្រោសលោះរបស់យើង ហើយនឹងរបៀបដែលអ្នកអាចប្រែក្លាយដូចជាទ្រង់ ។ បាវចនារបស់យើងគឺ « ចូរមករកព្រះគ្រីស្ទ ហើយឲ្យបានល្អឥតខ្ចោះនៅក្នុងទ្រង់ ហើយចូរលះបង់ចោលនូវអស់ទាំងអំពើដ៏ឥតបរិសុទ្ធចុះ » ( មរ៉ូណៃ 10:32 ) ។
នេះគឺជាការអញ្ជើញដ៏ពិសិដ្ឋមួយ ដើម្បីខិតទៅជិតនឹងព្រះរាជបុត្រានៃព្រះ ។ តាមរយៈដង្វាយធួនរបស់ទ្រង់ នោះយើងអាចទទួលបានអំណាចនៃការបម្រើ ដើម្បីលះបង់ចោលនូវអស់ទាំងអំពើដ៏ឥតបរិសុទ្ធក្នុងជីវិតរបស់យើង ហើយដើម្បីដឹងអំពីក្ដីស្រឡាញ់ដ៏គ្មានទីបំផុតរបស់ទ្រង់ ។នៅពេលយើងធ្វើដូច្នោះ នោះយើងនឹងរកឃើញសេចក្ដីសុខសាន្ដ និងសុភមង្គលពិត ។
នៅពេលអ្នកធ្វើតាមការអញ្ជើញឲ្យមករកព្រះគ្រីស្ទ នោះអ្នកនឹងមកដើម្បីយល់ដឹងអំពីកាតព្វកិច្ចពិសិដ្ឋរបស់អ្នក ដើម្បី « អញ្ជើញមនុស្សទាំងអស់មករកព្រះគ្រីស្ទ » ( គ&ស 20:59 ) ផងដែរ ។ ដួងចិត្តរបស់អ្នកនឹងពេញដោយបំណងប្រាថ្នាមួយ ដើម្បីដឹកនាំអ្នកដទៃមករកទ្រង់ ដើម្បីពួកគេអាចទទួលបានពរជ័យដូចគ្នាដែលអ្នកបានទទួល ហើយបន្ដទទួល ។
មានយុវជនម្នាក់ ឈ្មោះ ម៉ៃឃល បានបំពេញកាតព្វកិច្ចរបស់គាត់ តាមរយៈការជួយដល់ ចូស ជាមិត្តម្នាក់មកពីសាលារៀន ។
ថ្ងៃមួយ ចូស បានសួរគាត់ថា « ម៉ៃឃល តើហេតុអ្វីបានជាអ្នកសប្បាយជានិច្ចដូច្នេះ ? »
ម៉ៃឃល បាននិយាយថា « វាដោយសារតែខ្ញុំធ្វើការបម្រើ » ។
« ហេតុអ្វីបានជាអ្នកធ្វើការបម្រើ ? »
ចម្លើយគឺថា « ដោយសារខ្ញុំកាន់បព្វជិតភាព ហើយវាជាកាតព្វកិច្ចរបស់ខ្ញុំ » ។
ចូស បាននិយាយថា « ខ្ញុំចង់ដឹងបន្ថែមទៀតអំពីបព្វជិតភាព » ។
ម៉ៃឃល បានអញ្ជើញ ចូស ឲ្យមកចូលរួមសកម្មភាពក្នុងសាសនាចក្រ ហើយក្រោយមក មកក្នុងការប្រជុំរបស់សាសនាចក្រ ។ ទីបំផុត ចូស និង គ្រួសាររបស់គាត់ ត្រូវបានបង្រៀនដោយអ្នកផ្សព្វផ្សាយសាសនា ហើយបានទទួលបុណ្យជ្រមុជទឹក ។ ចូស បាននិយាយថា « កិច្ចការផ្សព្វផ្សាយសាសនា គឺជាមូលដ្ឋាននៃសាសនាចក្ររបស់យើង ។ បើសិនជាយើងនឹងទៀងត្រង់ ហើយសុចរិតក្នុងការទំនាក់ទំនងប្រចាំថ្ងៃរបស់យើង នោះអ្នកទាំងឡាយដែលនៅជុំវិញយើង នឹងកត់សម្គាល់ ហើយសួរយើងដូចជាខ្ញុំត្រូវបានគេសួរដែរ ។ ម៉ៃឃល គឺជាឧបករណ៍មួយនៅក្នុងផែនការដ៏មហិមារបស់ព្រះ » ។
នៅពេលអ្នកខិតទៅជិតនឹងព្រះអម្ចាស់ នោះអ្នកនឹងមានបំណងប្រាថ្នាមួយ ដើម្បីបម្រើអ្នកដទៃ ដូចជាម៉ៃឃលបានធ្វើ ។ ហើយនៅពេលអ្នកធ្វើ នោះអ្នកនឹងរកឃើញនូវការសន្យានេះ មកពីប្រធាន ហ៊ែនរី ប៊ី អាវរិង ជាទីប្រឹក្សាទីមួយ នៅក្នុងគណៈប្រធានទីមួយ ជាការពិតថា ៖ « នៅពេលអ្នកដាក់ដួងចិត្តរបស់អ្នកអញ្ជើញដល់មនុស្សដទៃឲ្យមករកព្រះគ្រីស្ទ នោះដួងចិត្តអ្នកនឹងបានផ្លាស់ប្ដូរ ។ អ្នកនឹងធ្វើកិច្ចការរបស់ទ្រង់សម្រាប់ទ្រង់ ។ អ្នកនឹងឃើញថា ទ្រង់រក្សាការសន្យារបស់ទ្រង់ ដើម្បីរួមតែមួយនឹងអ្នក នៅក្នុងការបម្រើរបស់អ្នក ។ អ្នកនឹងបានស្គាល់ទ្រង់ ។ ពេលនោះ អ្នកនឹងមកដើម្បីប្រែក្លាយដូចជាទ្រង់ ហើយ ‹ បានល្អឥតខ្ចោះនៅក្នុងទ្រង់ › ។2
នេះគឺជាបេះដូងនៃបាវចនារបស់ឆ្នាំនេះ ។