Mensahe sa Unang Kapangulohan
Ang Lig-ong Pagkahimutang nga Angkla
Dili pa lang dugay misakay ko sa dakong barko subay sa nindot kaayong baybayon sa Alaska, USA. Samtang ang kapitan nangandam nga i-angkurahi ang barko para sa tibuok gabii diha sa usa ka hilit nga luok nga dalisay, mabinantayon niyang gikalkulo ang dapit ug ang kahimtang, sama kon kanus-a ang taub ug hunas, gilawmon sa tubig, ug distansya gikan sa delikadong mga parte sa luok. Sa dihang natagbaw na siya, iyang gihulog ang angkla aron ang barko magpabilin nga luwas ug lig-ong pagkaangkla, nakahatag og oportunidad sa mga pasahero nga mahingangha sa talagsaong kaanyag sa mga gilalang sa Dios.
Samtang nagtan-aw ko sa baybay, naamguhan nako nga ang barko halos dili mamatikdan nga napadpad sa hinay nga hangin ug sulog sa tubig. Bisan pa niana, ang barko lig-ong nagpabilin ug kanunayng anaa lang sa gitakda nga lugar sumala sa katas-on sa pisi ug kalig-on sa angkla.
Wala tipigi sa kapitan ang angkla diha sa barko, andam lamang nga ipaubos kon dunay nagsingabut nga unos. Wala, iyang giangkla ang barko isip panagang ug pagpugong sa barko nga dili moadto sa dili luwas nga mga dapit o hinay-hinay nga masangad samtang ang mga pasahero ug crew mibati nga luwas.
Samtang namalandong ko niining talan-awon, naghunahuna ko nga kon kini dili oportunidad para sa usa ka sambingay, wala ko mag-piloto sa eroplano.
Nganong Nagkinahanglan Kita og mga Angkla
Ang katuyoan sa angkla mao ang pagsiguro nga ang barko luwas sa gitinguha nga dapit o sa pagkontrolar sa barko atol sa dili maayo nga panahon. Hinoon, aron matuman kining mahinungdanong mga katuyoan, ang pagbaton og angkla dili paigo. Ang angkla kinahanglan nga lig-on, kasaligan, ug gamiton sa hustong panahon ug dapit.
Ang mga indibidwal ug pamilya nagkinahanglan usab og mga angkla.
Ang kalisdanan mahimong moabut isip dako nga unos nga mopadpad nato sa sayop nga direksyon ug mohulga nga maigo kita sa mga bato. Apan usahay kita maanaa usab sa kakuyaw kon ang tanan makita nga daw luwas—hinay ang hangin ug hapsay ang tubig. Sa pagkatinuod, mahimong kita anaa sa labing dakong kakuyaw kon kita napadpad ug hinay-hinayng naglihok nga hapit dili gyud kita makamatikod niini.
Ang Ebanghelyo Mao ang Atong Angkla
Ang mga angkla kinahanglang solido, lig-on ug maayong pagkamentinar aron andam kon gikinahanglan. Dugang pa, kinahanglang nahigut kini sa pundasyon nga makasagubang sa pwersa nga angay buntugon.
Siyempre, ang ebanghelyo ni Jesukristo mao ang angkla. Kini giandam sa Tiglalang sa kalibutan alang sa balaang katuyoan ug gidesinyo nga makahatag og kasiguroan ug giya ngadto sa Iyang mga anak.
Unsa man diay ang ebanghelyo, gawas nga plano sa pagtubos sa Iyang mga anak ug pagdala nila balik sa Iyang presensya?
Nasayud nga natural lang nga ang kinaiyahan sa tanang butang mahisalaag, kinahanglan nga lig-on natong ipahimutang ang atong mga angkla diha sa pundasyon sa kamatuoran sa ebanghelyo. Kinahanglang dili kini ipaubos ngadto sa mga balas sa garbo o wala katugkad sa atong konbiksyon.
Karong bulana kita adunay oportunidad nga makadungog sa mga sulugoon sa Dios diha sa kinatibuk-ang komperensya sa Simbahan. Ang ilang mga pulong, inubanan sa mga kasulatan ug mga aghat sa Espiritu, makahatag og lig-on ug siguradong pundasyon sa mahangturong mga mithi ug mga baruganan diin atong mahigut ang atong angkla aron kita magpabiling lig-on ug sigurado taliwala sa mga kalisud ug pagsulay sa kinabuhi.
Ang karaang propeta nga si Helaman mitudlo, “Diha sa lig-on nga sukaranan sa atong Manunubos kinsa mao si Kristo, ang Anak sa Dios, nga kamo kinahanglan gayud motukod sa inyong tukuranan; nga sa panahon nga ang yawa mopadala sa iyang mapintas nga mga hangin, oo, ang iyang mga panâ diha sa alimpulos, oo, sa diha nga ang tanan niya nga ulan nga yelo ug ang iyang mapintas nga unos mohampak diha kaninyo, kini walay gahum ibabaw kaninyo sa pagbitad kaninyo ngadto sa bung-aw sa pagkauyamot ug walay katapusan nga pagkaalaot, tungod sa lig-on nga sukaranan diin kamo natukod nga mao ang tinuod nga tukuranan, usa ka tukuranan diin kon ang mga tawo magtukod dili sila mapukan.” (Helaman 5:12).
Ang Kamahinungdanon sa Lig-ong Pagkaangkla
Ang kinabuhi adunay paagi sa pagsulay sa atong mga angkla ug nagtintal kanato nga mapadpad. Bisan pa niana, kon ang atong mga angkla hustong napahimutang diha sa bato sa atong Manunubos, kini mokupot— bisan unsa kakusog sa hangin, sa kalawmon sa taub, o sa katas-on sa mga balud.
Siyempre, ang barko wala gidesinyo nga magbilin diha sa pantalan apan sa pagpasaka sa angkla ug molawig sa kadagatan sa kinabuhi. Apan kana sambingay na usab para sa laing higayon.
Sa pagkakaron, nahupay ko sa pagkasayud nga ang angkla sa ebanghelyo ug ang sukaranan sa atong Manunubos makahimo nato nga makanunayon ug lig-on.
Ang ingon nga angkla makapugong kanato gikan sa pagkapadpad ngadto sa kakuyaw ug kadaut. Kini maghatag kanato og nindot nga oportunidad nga makatagamtam sa dili matupngan nga katahum sa kanunayng nag-usab ug hamili nga talan-awon sa kinabuhi.
Ang kinabuhi matahum ug bililhon. Ang hangin, bagyo, ug kusog nga mga sulog mahimong makapadpad nato ngadto sa makita o di makita nga mga kakuyaw, apan ang mensahe sa ebanghelyo ug ang balaang gahum niini makapahimo nato nga magpabilin diha sa dalan balik ngadto sa luwas nga dungguanan sa atong Langitnong Amahan.
Busa kita, dili lang maminaw sa pakigpulong sa kinatibuk-ang komperensya sa Abril apan mogamit sa mga mensahe niini isip lig-ong angkla sa atong inadlaw-adlaw nga kinabuhi.
Unta ang Dios mopanalangin ug mogiya kanato niining mahinungdanon nga paningkamot!
Pagtudlo Niini nga Mensahe
Ikonsiderar sa paghisgot sa kaimportante sa mga angkla sumala sa kahimtang sa pamilya ni Lehi nga naglawig paingon sa yuta nga saad (tan-awa sa 1 Nephi 18). Tingali inyong ipasabut ang 1 Nephi 18:11–15, panahon dihang si Nephi gigapos, ang Liahona dili na molihok, ug ang barko gipadpad sa dagkong mga unos. Unsa ang mga sangputanan nga atong atubangon kon kita dili maayong pagkaangkla diha sa ebanghelyo? Mahimo usab ninyong ipasabut ang 1 Nephi 18:21–22 ug hisguti kon sa unsang paagi kita makakaplag og kaluwasan pinaagi sa pagdangop ngadto sa Manluluwas.