Ang mga Lalaki ug mga Babaye diha sa Buhat sa Ginoo
Gikan sa pakigpulong sa usa ka debosyonal sa Brigham Young University nga gihatag niadtong Agosto 20, 2013. Alang sa kompleto nga teksto sa Iningles, bisitaha ang speeches.byu.edu.
Sa plano sa atong Langitnong Amahan nga naghatag og gahum sa priesthood, ang kalalakin-an ug kababayen-an dunay lainlain apan parehas nga bililhong tahas.
Mituo ako nga dunay mga kamatuoran nga kinahanglang masabtan sa mga babaye ug mga lalaki bahin sa mahinungdanong tahas sa mga babaye sa paglig-on ug pagtukod sa gingharian sa Dios dinhi sa kalibutan. Sa daghan kaayong paagi ang mga babaye mao ang focus sa Simbahan. Mao nga uban sa tabang sa Ginoo, gusto kong mopasidungog sa matinud-anong mga babaye ug sa batan-ong mga babaye sa Simbahan. Kaninyo minahal nga mga sister, bisan asa man kamo sa kalibutan nagpuyo, palihug hibaloi ang dakong pagbati ug pagsalig sa Unang Kapangulohan ug sa Napulog Duha ka mga Apostoles diha kaninyo.
Akong sugdan pinaagi sa pagpahinumdom bahin sa atong gibuhat dinhi sa kalibutan.
Pinalangga kita nga espiritung mga anak sa atong Langitnong Amahan. Nagpuyo kita uban Niya didto sa premortal nga dapit. Aron matuman ang misyon sa “pagpahinabo sa pagka-imortal ug kinabuhing dayon sa tawo” (Moises 1:39), ang Langitnong Amahan mihimo og plano aron matabangan ang Iyang mga anak nga makab-ot ang ilang pinaka-potensyal. Ang plano sa atong Amahan magpahinabo sa pagkapukan sa tawo ug mabulag gikan Kaniya sulod sa usa ka panahon pinaagi sa pagkatawo dinhi sa mortalidad, makabaton og lawas, ug maanaa sa usa ka panahon sa pagsulay. Iyang giplano nga dunay ipadala nga usa ka Manluluwas aron motubos sa katawhan gikan sa Pagkapukan. Ang Pag-ula sa atong Ginoo nga si Jesukristo naghatag og paagi pinaagi sa mga ordinansa sa ebanghelyo ug sa sagradong mga pakigsaad aron makabalik sa presensya sa Dios. Tungod kay magpuyo man kita sa mortal nga palibut nga puno sa peligro ug mga kahasol, ang Langitnong Amahan ug Iyang Anak nahibalo nga atong kinahanglanon ang gahum nga mas labaw kay sa atong kaugalingon. Nahibalo Sila nga atong kinahanglanon ang Ilang gahum. Ang ebanghelyo ug doktrina ni Kristo mohatag og gahum sa tanan niadtong kinsa modawat niini aron makab-ot ang kinabuhing dayon ug gahum aron makakaplag og kalipay niini nga panaw.
Dunay mga nagpangutana kon unsa ang tahas sa mga babaye sa plano sa Dios ug sa Simbahan. Kadaghan ko giinterbyu sa nasyonal ug internasyonal nga media sa pagsulti ninyo nga kadaghanan sa mga journalist nga akong nakaatubang dunay kaugalingong mga hunahuna bahin niini nga hilisgutan. Sulod sa mga katuigan daghang nangutana nga nag-ingon nga ang mga babaye sa Simbahan mga second-class citizen. Kini nga hunahuna layo ra sa tinuod.
Mosugyot ko og lima ka importanting punto aron inyong mahinuktukan kining importante nga hilisgutan.
1. Ang Dios Adunay Plano sa Pagtabang Kanato nga Makab-ot ang Kinabuhing Dayon
Ang atong Langitnong Amahan milalang sa mga babaye ug lalaki, kinsa Iyang espiritu nga mga anak. Nagpasabut kini nga ang pagkalalaki ug pagkababaye mahangturon. Siya dunay plano nga gihimo aron matabangan ang tanang mopili sa pagsunod Kaniya ug sa Iyang Anak, si Jesukristo, nga makaabut sa ilang destinasyon isip manununod sa kinabuhing dayon.
Kon ang umaabut natong kahimayaan mao ang Ilang importanting tumong ug tuyo ug kon Sila nahibalo sa tanan ug perpekto, sigon sa atong nahibaloan, nan mas nakahibalo Sila unsaon sa pag-andam, pagtudlo, ug paggiya kanato aron mas dako ang atong purohan nga mahimong takus sa kahimayaan.
Hapit tanan dunay pamilya o mga higala nga naapektuhan sa magkalahing problema sa komunidad. Ang paglantugi bahin sa mga problema sa kinatibuk-an dili makasulbad, gani, makamugna pa kini og panagbingkil. Dunay mga pangutana kon unsay baruganan sa Simbahan bahin sa sensitibong mga isyu nga lisud tubagon alang sa katagbawan sa tawo. Hinoon, kon atong pangitaon ang Ginoo pinaagi sa pag-ampo kon unsaon nga mobati kita ug unsay buhaton alang niini nga sitwasyon, ang pagdasig moabut: “Mituo ba kamo kang Jesukristo ug kamo ba misunod Kaniya ug sa Amahan?” Mituo ako nga hapit tanan sa Simbahan sa usa ka higayon o sa laing higayon makapangutana kon sila makahimo ba sa tanan nga ipabuhat kanila. Apan kon kita mituo gayud sa Ginoo, ang kasiguroan moabut: “Mituo ko kang Jesukristo, ug andam ko nga mobuhat bisan unsay Iyang ipabuhat nako.” Mao nga maningkamot kita. Pagkagamhanan sa mga pulong nga “Mituo ko kang Jesukristo”!
Ang atong mga pagpamatuod ug ang kalinaw sa atong hunahuna ug ang atong kaayohan magsugod sa kaandam nga motuo nga ang atong Amahan sa Langit mas nahibalo gayud.
2. Ang Simbahan Gidumala pinaagi sa mga Yawe sa Priesthood
Ang Simbahan ni Jesukristo sa mga Santos sa Ulahing mga Adlaw Simbahan sa Ginoo, ug ang Iyang Simbahan gidumala pinaagi sa awtoridad sa priesthood ug sa mga yawe sa priesthood. “Ang mga yawe sa priesthood mao ang katungod sa Dios nga gihatag ngadto sa mga lider sa priesthood sa pagtudlo, pagkontrolar, ug pagdumala kon unsaon sa paggamit ang Iyang priesthood dinhi sa kalibutan.”1
Kadtong adunay mga yawe sa priesthood—bisan siya usa ka deacon kinsa dunay mga yawe alang sa iyang korum o usa ka bishop kinsa dunay mga yawe alang sa iyang ward o ang Presidente sa Simbahan kinsa naggunit sa tanang yawe sa priesthood—sa tinuoray naghimong posible nga ang tanan kinsa matinud-anong naghago ubos sa ilang direksyon makagamit sa awtoridad sa priesthood ug makagamit sa gahum sa priesthood.
Ang tanang lalaki ug babaye nag-alagad ubos sa direksyon niadtong dunay mga yawe. Mao kini ang pamaagi sa Ginoo sa pagdumala sa Iyang Simbahan.
Duna koy sublion sa akong gisulti sa Abril 2013 nga kinatibuk-ang komperensya: “Sa plano sa atong Langitnong Amahan nga naghatag og gahum sa priesthood, ang kalalakin-an dunay responsibilidad sa pagpangalagad sa priesthood apan dili sila ang priesthood. Ang kalalakin-an ug kababayen-an dunay lainlain apan parehas nga bililhong tahas. Ingon nga ang babaye dili magsabak kon wala ang lalaki, ang lalaki dili hingpit nga makagamit sa gahum sa priesthood sa pagtukod og mahangturong pamilya kon wala ang babaye. … Sa mahangturong panglantaw, ang gahum sa pagpasanay ug ang gahum sa priesthood pagaambitan sa bana ug asawa.”2
Ngano nga mga lalaki man ang i-orden sa mga office sa priesthood ug dili mga babaye? Si Presidente Gordon B. Hinckley (1910–2008) mipasabut nga ang Ginoo, dili ang tawo, “ang miplano nga ang mga lalaki sa Iyang Simbahan ang makahupot sa priesthood” ug ang Ginoo usab ang mihatag sa mga babaye og “katakus aron makompleto kining talagsaon ug kahibulungang organisasyon, nga mao ang Simbahan ug gingharian sa Dios.”…3 Sa lintunganay, ang Ginoo wala mopadayag kon ngano nga Iyang giorganisar ang Iyang Simbahan sumala sa Iyang pag-organisar niini.
Dili nato kalimtan nga gibana-bana nga katunga sa tanang pagtulun-an dinhi sa Simbahan gilihok sa mga sister. Kadaghanan sa mga pagpangulo gilihok sa atong mga sister. Daghan sa mga oportunidad sa pagserbisyo ug mga kalihokan giplano ug gidumala sa mga babaye. Ang tambag ug uban pang partisipasyon sa mga babaye diha sa ward ug stake council ug diha sa mga general council sa punoang buhatan sa Simbahan naghatag sa gikinahanglang panglantaw, kaalam, ug kabalanse.
Gikinahanglan nga ang mga lalaki kinsa nagtahud sa mga babaye ug sa anaa nilang lahi nga espirituhanong mga gasa ug ang mga babaye kinsa nagtahud sa mga yawe sa priesthood nga gihuptan sa mga lalaki ang mangayo sa tibuok nga panalangin sa langit sa bisan unsang buluhaton sa Simbahan.
3. Ang mga Lalaki ug mga Babaye Parehas nga Importante
Ang mga lalaki ug mga babaye parehas sa mga mata sa Dios ug sa mga mata sa Simbahan, apan ang pagkaparehas wala magpasabut nga managsama ra sila. Ang mga responsibilidad ug balaang gasa sa mga lalaki ug mga babaye managlahi sa ilang matang apan dili sa importansya o sa impluwensya niini. Ang doktrina sa atong Simbahan nagbutang sa mga babaye nga parehas ra apan lahi gihapon sa mga lalaki. Wala isipa sa Dios nga ang lalaki mas importante kay sa babaye o ang babaye mas importante kay sa lalaki. Mipahayag si Presidente Hinckley ngadto sa mga babaye nga ang “Mahangturon natong Amahan … wala mag-isip nga mas ubos kamo kay sa talagsaong katahum sa Iyang mga nilalang.”4
Ang mga lalaki ug mga babaye managlahi og gasa, managlahi og kalig-on, ug managlahi og panglantaw ug mga hilig. Usa kana sa importanting mga hinungdan nganong nagkinahanglan kita sa usag usa. Nagkinahanglan og usa ka lalaki ug usa ka babaye aron makahimo og pamilya, ug nagkinahanglan ug mga lalaki ug mga babaye aron mahimo ang buhat sa Ginoo. Ang bana ug asawa sa matarung nga paagi magtambayayong sa kalampusan sa usag usa. Atong bantayan nga dili kita makabalda sa mga plano ug katuyoan sa atong Langitnong Amahan sa atong kinabuhi.
4. Ang Tanan Mapanalanginan pinaagi sa Gahum sa Priesthood
Kon ang mga lalaki ug mga babaye mangadto sa templo, mahatagan sila sa pareho nga gahum, nga mao ang gahum sa priesthood. Samtang ang awtoridad sa priesthood gidumala pinaagi sa mga yawe sa priesthood, ug ang mga yawe sa priesthood huptan lamang sa takus nga mga lalaki, ang paggamit sa gahum ug mga panalangin sa priesthood anaa alang sa tanang anak sa Dios.
Ang atong Amahan sa Langit manggihatagon sa Iyang gahum. Ang tanang lalaki ug babaye makagamit niini nga gahum alang sa tabang diha sa kaugalingon nilang kinabuhi. Ang tanan nga mihimo og sagradong mga pakigsaad sa Ginoo ug kadtong mitahud sa mga pakigsaad mahimong makadawat og personal nga pagpadayag, nga mapanalanginan pinaagi sa pagpangalagad sa mga anghel, nga makigsulti sa Dios, nga makadawat sa kahingpitan sa ebanghelyo, ug, sa katapusan, mahimong mga manununod kauban ni Jesukristo sa tanan nga anaa sa atong Amahan.
5. Kinahanglan Kitang Mahibalo ug Mopamatuod sa Doktrina
Gikinahanglan nato nga ang mga babaye sa Simbahan mahibalo sa doktrina ni Kristo ug mopamatuod sa Pagpahiuli sa tanang paagi kutob sa inyong mahimo. Wala pa sukad sa kasaysayan sa yuta ang ingon niini ka labawng komplikado nga panahon. Si Satanas ug ang iyang mga kaubanan nagtrabaho aron mahingpit ang ilang punduhanan sa mga hinagiban alang sa milenyo, ug batid na sila sa pagpangdaot sa pagtuo ug pagsalig ngadto sa Dios ug sa Ginoo nga si Jesukristo sa tawhanong pamilya.
Kitang tanan—mga lalaki, mga babaye, mga young adult, mga batan-on, ug mga batang lalaki ug babaye—anaa kanato ang Ginoo ug ang Iyang Simbahan aron panalipdan, protektahan, ug ipakatap sa tibuok kalibutan. Nagkinahanglan pa kita og dugang nga lahi, impluwensyal nga mga tingog ug pagtuo sa mga babaye. Gikinahanglan namo nga kamo makakat-on sa doktrina ug makasabut sa unsay atong gituohan aron kamo makahatag sa inyong mga pagpamatuod bahin sa kamatuoran sa tanang butang—bisan kon kana nga pagpamatuod ihatag man diha sa usa ka campfire sa Young Women camp, sa miting sa pagpamatuod, sa blog, o sa Facebook. Kamo lang ang makapakita sa kalibutan kon unsa diay ang kinaiya ug gituohan niining mga kababayen-an sa Dios nga nagahimo og mga pakigsaad.
Mga sister, ang inyong luna sa pag-impluwensya usa ka lahi nga luna—luna nga dili masundog sa mga lalaki. Walay makahimo sa pagpanalipod sa atong Manluluwas sa mas labaw nga pag-aghat o gahum kay kaninyo, anak nga mga babaye sa Dios,—kamo nga adunay kalig-on sa kahiladman ug pagsalig. Ang impluwensya sa tingog sa usa ka nakabig nga babaye dili masukod, ug ang Simbahan mas nagkinahanglan sa inyong mga tingog karon kay sa kaniadto.
Akong ibilin kaninyo ang akong pagsaksi ug pagpamatuod nga ania kita sa panahon diin kinahanglan kitang maghiusa sa pagbarug. Maghiusa kita—mga lalaki ug mga babaye, mga kabatan-onan, mga batang lalaki ug babaye. Kinahanglang atong barugan ang plano sa atong Langitnong Amahan. Kinahanglan nga Siya atong panalipdan. Siya ginasalikway na. Dili mahimong mag-urong lang kita isip mga miyembro sa Simbahan ni Jesukristo sa mga Santos sa Ulahing mga Adlaw ug tugutan nga mahitabo kini nga wala ang atong kaisug sa pagpadungog sa atong mga tingog.
Hinaut nga ang Dios mopanalangin kaninyo og kaisug sa pagtuon ug mahibalo sa yanong mga kamatuoran sa ebanghelyo ug dayon mopakigbahin niini sa matag kahigayunan nga inyong makuha.