Dolavi Tale na Valenivulagi ena Valetabu na Mexico City

Ena vula ni oti na kena dolavi tale, e sivia ni 30,000 na vulagi era sikova na Valenivulagi ni Valetabu na Mexico City, ka se qai oti na kena vakavoui ka vakalevutaki ena loma ni rua na yabaki. Na veika kece e vakaraitaki tu kina ena vosa vaka-Sipeni okati kina na veika vakaitukutuku taumada ka caka vakatabakidua me baleti ira na kai Mexico. Na vale vakavoui oqo sa imatai talega ni valenivulagi me caka kina e dua na vanua ni sarasara ka caka vakatabakidua me vakavuvulitaki kina na ivakavuvuli ni kosipeli vei ira na gonelalai.

Na valenivulagi oqo e ikatolu ni ka levu duadua ena 17 na mataqali vale vakaoqori, e vuqa vei ira e tiko volekata e dua na valetabu se dua na vanua ni itukutuku makawa ni Lotu. Sa tara tiko ena gauna oqo e dua na valenivulagi volekata na valetabu e tara tiko mai Roma, Itali, ka kune na veivalenivulagi mai Igiladi, Niu Siladi, Awai, kei na va na yasana e Amerika. Na veivalenivulagi, era caka me ra kidavaki kina na Yalododonu Edaidai bulabula kei ira era luluqa tu vakalotu ka vakakina vei ira ena veivakabauta tale eso, e sega walega ni vakaveikilaitaki ira na tamata ki na Lotu ia e vukei ira talega me ra kila na kena vakabauta ka vakauqeta na gagadre me ra vulica eso tale na ka me baleta na iVakabula kei na Vakalesuimai ni kosipeli. E vakarautaki talega kina na itukutuku me vaqaqacotaka na matavuvale.

O Mexico e dua na ikelekele ena Lotu, ka sivia na 1.2 na milioni na lewenilotu, sivia na 200 na iteki, ka 12 na valetabu.