Ang Basahon ni Mormon, ang Pagpundok sa Israel, ug ang Ikaduhang Pag-anhi

Ni Elder Russell M. Nelson

Sa Korum sa Napulog Duha ka mga Apostoles

Gikan sa pakigpulong nga gihatag atol sa seminar alang sa bag-ong mga presidente sa misyon sa Provo Missionary Training Center niadtong Hunyo 26, 2013.

Ang pag-abut sa Basahon ni Mormon mao ang usa ka makita nga timailhan sa kalibutan nga ang Ginoo misugod pagpundok sa Israel ug pagtuman sa mga pakigsaad nga Iyang gihimo ngadto ni Abraham, Isaac ug Jacob.

Large group of sister missionaries standing on stairs holding up signs showing what language they speak.

Ang Kapitulo 5 sa Isangyaw ang Akong Ebanghelyo: Usa ka Giya ngadto sa Misyonaryo nga Pangalagad hingpit nga gigahin ngadto sa Basahon ni Mormon. Kini nga kapitulo nagtudlo nga ang Basahon ni Mormon:

Mao ang sukaranan sa atong relihiyon.
Nagpamatuod ni Jesukristo.
Nagsuporta sa Biblia.
Motubag sa mga pangutana sa kalag.
Nagdasig sa mga tawo sa pagpaduol sa Dios.

Kining tanang pamahayag tinuod gayud, apan kini nahimo gikan sa atong panglantaw isip mortal nga binuhat. Unsa kaha ang panglantaw sa atong Amahan sa Langit ug sa Iyang Hinigugmang Anak, si Jesukristo, diha sa Basahon ni Mormon?

Ang Ilang panglantaw siguradong naumol sa duha ka dugay na nga mga saad nga Ilang gihimo ngadto sa tanang katawhan. Kining duha ka mga saad may kalambigitan, nadokumentuhan, padayong gipatuman, ug gani pagatumanon pa. Ang una mao ang Ilang saad kaniadto sa pagpundok sa nagkatibulaag nga Israel. Ang ikaduha mao ang Ilang dugay na nga mga saad sa Ikaduhang Pag-anhi sa Ginoo.

Ang Pakigsaad ni Abraham ug sa Balay ni Israel

Ang dispensasyon ni Abraham, ang Dios mihimo og pakigsaad uban ni Amahang Abraham nga pinaagi niini nga kaliwatan, mga tawo sa tanan nga mga nasud mapanalanginan. Laing importante nga bahin niana nga saad gihimo usab. Kini nga mga saad, unang gihatag ngadto ni Abraham ug sa wala madugay ngadto ni Isaac ug Jacob, naglakip sa:

Usa ka dako nga kaliwatan.¹
Ang kabilin sa piho nga mga yuta.²
Ang binhi ni Abraham nga naghupot sa priesthood ngadto sa tanan nga mga nasud, aron ang tanan unta mapanalanginan pinaagi sa kaliwatan ni Abraham.³
Kadtong dili kaliwat gikan ni Abraham kinsa modawat sa ebanghelyo mahimong binhi ni Abraham pinaagi sa pagsagop.⁴
Ang Manluluwas sa kalibutan moabut pinaagi sa kaliwatan ni Abraham.⁵

Daghan sa kaliwatan ni Abraham—sa mga tribo sa karaang Israel—sa katapusan misalikway sa mga pagtulun-an sa Ginoo ug mipatay sa mga propeta. Ang mga napulo ka mga tribo gidala nga bihag ngadto sa Asiria. Gikan didto nawala sila sa mga rekord sa mga katawhan, apan wala mawala sa Ginoo. Duha ka mga tribo nagpabilin sulod sa mubo nga panahon, apan tungod sa ilang pagsukol sila nabihag ngadto sa Babelon. Sa dihang mibalik na sila, sila gipaboran sa Ginoo, apan misalikway sila pag-usab Kaniya!

Ang Pagkatibulaag ug Pagkapundok sa Israel

Usa ka mahigugmaon apan nagmasulub-on nga Amahan mipatibulaag sa Israel sa layo ug halapad, apan misaad Siya nga moabut ang adlaw nga ang nagkatibulaag nga Israel pagapundukon balik ngadto sa panon. Kini nga saad sama ka klaro sa saad sa pagkatibulaag sa Israel.⁶ Si Isaias, pananglit, nakakita nga sa ulahing mga adlaw ang Ginoo mopadala og “matulin nga sinugo” ngadto niining mga tawo, kinsa mga “binutad ug mahinlo” (Isaias 18:2, 7).

Sama sa gipanagna, tanan nga mga butang ipahiuli niini nga dispensasyon. Busa, ang dugay nang gihulat nga pagpundok sa nagkatibulaag nga Israel kinahanglan gayud nga moabut isip kabahin niana nga pagpahiuli.⁷ Sa pagpundok sa Israel kabahin sa ikaduhang saad tungod kay ang pagpundok gikinahanglan nga pasiuna sa Ikaduhang Pag-anhi sa Ginoo.⁸ Pag-usab, kana nga langitnong panglantaw klaro kaayo.

Kini nga konsepto sa pagpundok mao ang usa sa mga importanting pagtulun-an sa Ang Simbahan ni Jesukristo sa mga Santos sa Ulahing mga Adlaw. Ang Ginoo mipahayag, “Ako mohatag nganha kaninyo og usa ka timailhan … nga ako mopundok, gikan sa ilang dugay nga pagkatibulaag, sa akong mga katawhan, O balay ni Israel, ug motukod pag-usab taliwala kanila sa akong Zion” (3 Nephi 21:1).

Ang pag-abut sa Basahon ni Mormon mao ang makita nga timailhan sa kalibutan nga ang Ginoo misugod sa pagpundok sa Israel ug pagtuman sa mga pakigsaad nga Siya mihimo ngadto ni Abraham, Isaac ug Jacob.⁹ Wala lamang nato itudlo kini nga konsepto, apan kita usab makaapil niini! Miapil kita samtang nagtabang kita sa pagpundok sa mga pinili sa Ginoo sa duha ka bahin sa tabil.

Sa kalooy, ang pagdapit sa “pagduol ngadto kang Kristo” (Jacob 1:7)¹⁰ mahimo usab nga ihatag ngadto niadtong kinsa namatay nga walay kahibalo sa ebanghelyo.¹¹ Kabahin sa pagpangandam alang niadtong kinsa nagpuyo sa pikas nga bahin sa tabil nagkinahanglan og yutan-ong paningkamot niadtong kinsa nagpuyo dinhi nga bahin sa tabil. Kita magtipon og mga pedigree chart, maghimo og family group sheet, ug maghimo og halili [vicarous] nga buhat sa templo sa pagpundok sa mga tawo ngadto sa Ginoo ug ngadto sa ilang mga pamilya.¹²

Kining dispensasyon sa kahingpitan sa panahon nakita sa Dios isip panahon sa pagpundok, sa langit ug dinhi sa yuta. Ang Apostol nga si Pedro nasayud nga human sa usa ka panahon sa apostasiya, ang usa ka pagpahiuli moabut. Siya namahayag:

“Busa paghinulsol kamo, ug pamalik na kamo kaniya, aron mapala ang inyong mga sala, aron ang mga panahon sa kahayahay magaabut gikan sa atubangan sa Ginoo; …

“Siya nga pagahawiran una sa langit hangtud sa panahon sa pagtuman na sa tanang gisulti sa Dios pinaagi sa ba-ba sa iyang mga balaang propeta sukad pa sa karaang kapanahonan” (Mga Buhat 3:19, 21).

Sa atong panahon, sila si Pedro, Santiago ug Juan gipadala sa Ginoo uban sa “mga yawe sa [Iyang] mga gingharian, ug usa ka dispensasyon sa ebanghelyo alang sa katapusan nga higayon; ug alang sa kahingpitan sa panahon,” diin Siya “mopundok ngadto sa usa sa tanan nga mga butang, nga anaa sa langit, ug anaa sa yuta” (D&P 27:13).¹³

Daghang mga aspeto sa pakigsaad ni Abraham natuman na. Ang Manluluwas sa kalibutan sa pagkatinuod moabut pinaagi sa kaliwatan ni Abraham, pinaagi sa anak ni Jacob nga si Juda. Ang yuta gigahin alang sa kabilin sa dugay nang panahon. Usa ka mapa sa LDS nga edisyon sa Biblia nagpakita kon sa unsang paagi nga ang yuta napanunod pinaagi sa mga tribo gibahin taliwala sa mga kaliwat ni Reuben, Simeon, Juda, Issachar, Zabulun, Dan, Neptali, Gad, Aser, si Benjamin ug ni Joseph (gibahin tali sa iyang anak nga lalaki, si Ephraim ug Manases).¹⁴ Agig dugang sa kabilin ni Joseph diha sa Balaan nga Yuta, nakat-unan nato gikan sa Basahon ni Mormon nga ang yuta gigahin alang sa usa ka salin sa balay ni Jose mao ang America nga bahin sa kalibutan.¹⁵

Ang dakong saad nga ang tanang nasud mapanalanginan pinaagi sa kaliwatan ni Abraham, Isaac, ug Jacob kinahanglan pa nga matuman. Apan kini nga saad sa pagpundok, nga gihisgutan sa tanang mga kasulatan, matuman sama ka sigurado sa mga panagna sa pagkatibulaag sa Israel.¹⁶

Church members and missionaries of the Abuakwa Branch in Africa.

Ang Pagpundok isip Pasiuna ngadto sa Ikaduhang Pag-anhi

Nganong importante kaayo kini nga saad sa pagpundok? Tungod kay ang pagpundok sa Israel gikinahanglan sa pag-andam sa kalibutan alang sa Ikaduhang Pag-anhi! Ug ang Basahon ni Mormon mao ang instrumento sa Dios nga gikinahanglan sa pagtuman niining duha ka balaang mga tumong.¹⁷

Ang Basahon ni Mormon usa ka gasa gikan sa Dios sa tibuok kalibutan. Mao kini ang bugtong nga basahon nga gipamatuod sa Ginoo nga tinuod.¹⁸ Kini usa ka gasa gikan ni Nephi, Jacob, Mormon, Moroni, ug ang dinasig ug namartir nga tighubad, si Propeta Joseph Smith. Ang Basahon ni Mormon mao ang tuyo nga gitumong ngadto sa salin sa balay ni Israel.¹⁹

Kabahin sa Ikaduhang Pag-anhi, kita nasayud nga kini mao ang “hapit na moabut, ug diha sa usa ka panahon nga moabut” (D&P 63:53). Ug kon ang Manluluwas moanhi pag-usab, dili gayud kini matago.²⁰ Sa kasamtangan, ang dakong buhat kinahanglan gayud pagahimoon sa pagpundok sa Israel ug sa pag-andam sa kalibutan sa mahimayaong Ikaduhang Pag-anhi.

Ang Pagpundok sa Israel Niini nga Dispensasyon

Salamat sa Basahon ni Mormon, nasayud kita kon kanus-a kining gisaad nga pagpundok mahitabo: “Busa, ang atong amahan wala mamulong sa atong binhi lamang, apan ngadto usab sa tanan nga balay ni Israel, nagtudlo sa pakigsaad diin kinahanglan matuman sa ulahing mga adlaw; diin nga pakigsaad gihimo sa Ginoo ngadto sa atong amahan si Abraham, nag-ingon: Sa imong binhi ang tanan nga mga kaliwatan sa yuta mapanalanginan” (1 Nephi 15:18; empasis gidugang).

Unom ka gatus ka tuig sa wala pa matawo si Jesus didto sa Bethlehem, ang mga propeta nahibalo nga ang pagpundok sa Israel mahitabo “sa ulahing mga adlaw.”

Sa mga Santos sa ulahing mga adlaw, ang napasidunggan nga ngalan nga Abraham importante. Matag miyembro sa Simbahan masumpay ngadto ni Abraham.²¹ Ang Ginoo mimatuod sa pakigsaad ni Abraham sa atong panahon pinaagi ni Propeta Joseph Smith.²² Diha sa templo atong madawat ang atong labing taas nga panalangin, sama sa gisaad ngadto sa mga binhi ni Abraham, Isaac ug Jacob.²³

Kinahanglan kitang makaangkon nianang langitnong panglantaw. Kinahanglan kitang masayud sa pakigsaad ni Abraham ug makasabut sa atong responsibilidad sa pagtabang sa pagpahinabo sa gisaad nga pagpundok sa Israel. Kinahanglan natong masayran nganong kita dunay kahigayunan sa pagdawat og patriyarkal nga panalangin ug makahibalo sa atong koneksyon ngadto sa karaang mga patriyarka. Kinahanglan kitang masayud nga ang anak ni Jacob nga si Joseph nahimo nga anak nga may katungod sa pagkatawo human mawala ni Reuben ang iyang katungod sa pagkatawo.²⁴ Si Joseph ug ang iyang mga anak, si Ephraim ug Manases, nahimo nga binhi sa paggiya sa pagpundok sa Israel.²⁵ Ang ubang mga tribo mosunod.

Hunahunaa kadtong langitnong mga mensahero kinsa nagdala og bililhong mga yawe sa priesthood ngadto sa gipahiuli nga Simbahan sa Ginoo. Niadtong Abril 3, 1836, human ang Ginoo midawat sa Kirtland Temple, miabut si Moises, kinsa mipahiuli sa “mga yawe sa pagpundok sa Israel” (D&P 110:11). Human niini, “Si Elias mipakita, ug mitugyan sa kapaigoan sa ebanghelyo ni Abraham, miingon nga diha kanamo ug sa among binhi sa tanan nga mga kaliwatan nga mosunod kanamo pagapanalanginan” (D&P 110:12). Sa ingon ang pakigsaad ni Abraham gibag-o isip kabahin sa Pagpahiuli! Dayon miabut si Elias, kinsa mipahiuli sa mga yawe sa pagbugkos, sumala sa gipanagna ni Malaquias.²⁶ Gikinahanglan kadto nga mga yawe aron sa pagbugkos sa mga pamilya sa napundok nga Israel ug makahimo nila nga matagamtaman ang labing mahinungdanon sa tanan nga mga panalangin, ang kinabuhing dayon.

Unsa ang panglantaw sa Amahan ug sa Anak kabahin sa Basahon ni Mormon? Ila kining nakita isip ebidensya sa propetikanhon nga tawag ni Joseph Smith. Ila kining nakita isip instrumento diin ang mga tawo magkat-on pa mahitungod ni Jesukristo, motuo sa Iyang ebanghelyo, ug moapil sa Iyang Simbahan. Ila kining nakita isip mga teksto sa pagklaro sa atong koneksyon uban sa balay ni Israel sa biblia. Ang Basahon ni Mormon mipahayag nga ang sinugdanan sa pagpundok²⁷ ug mao ang instrumento sa Dios sa pagpahinabo niana nga panagpundok. Kon wala ang Basahon ni Mormon, walay pagpundok sa Israel.²⁸

Ang Basahon ni Mormon naglangkob sa kahingpitan sa ebanghelyo. Kon wala ang Basahon ni Mormon, gamay ra kitag mahibaloan mahitungod sa Pag-ula ni Jesukristo.²⁹ Tungod kay kini nagtudlo sa Pag-ula, ang Basahon ni Mormon nagtabang nato sa paghinulsol, paghimo ug paghupot og sagradong mga pakigsaad, ug makadawat sa mga ordinansa sa kaluwasan ug kahimayaan. Kini modala nato ngadto sa templo, diin kita mahimong sarang alang sa kinabuhing dayon.

Dinhi sa yuta makabaton kita nianang langitnong panglantaw sa tanan natong gibuhat. Uban niana nga panglantaw, atong makita nga ang misyonaryo nga buhat importante kaayo alang sa pagpundok sa Israel. Sa daghang mga nasud, ang atong mga misyonaryo nagsiksik alang sa mga nagkatibulaag nga Israel.

Ang Zion anaa kon ang matarung nga mga Santos nagpundok.³⁰ Publikasyon, komunikasyon, ug mga kongregasyon naghatag hapit tanan nga mga miyembro sa Simbahan og access sa doktrina, mga yawe, mga ordinansa, ug mga panalangin sa ebanghelyo, bisan asa pa sila. Para sayon sa mga Santos sa tibuok kalibutan, 143 ka mga templo anaa, ug daghan pa ang umaabut.³¹

Ang mga Santos sa matag yuta makabaton og managsama nga pag-angkon sa mga panalangin sa Ginoo. Espirituhanong seguridad kanunay magdepende unsaon nato sa pagpuyo, dili diin kita nagpuyo.

Ang pagpundok sa Israel dili mao ang katapusan. Kini mao lamang ang sinugdanan. Ang tumong nga atong gitinguha paglahutay naglakip sa mga ordinansa sa endowment ug pagbugkos diha sa templo. Naglakip kini sa atong pagsulod sa relasyon sa pakigsaad sa Dios pinaagi sa kaliwat o sa pagsagop ug dayon magpuyo uban Kaniya ug sa atong mga pamilya sa kahangturan. Mao kana ang himaya sa Dios—kinabuhing dayon alang sa Iyang mga anak.³²

Ang atong mahigugmaong Amahan sa Langit gusto gayud nga ang Iyang mga anak makabalik ngadto Kaniya, dili sa pagpamugos apan pinaagi sa tagsa-tagsa nga mga pagpili ug sa personal nga pagpangandam. Ug Siya gusto nga sila mabugkos isip mahangturong mga pamilya.

Mao kana ang panglantaw sa atong Langitnong Amahan. Mao kana ang panglantaw sa Hinigugma nga Anak. Ug kini mahimong mao usab ang atong panglantaw.