Mesaj Premye Prezidans lan, Out 2014
Rekòt Bondye
Yon madanm yo rele Christa t ap travay yon fwa pou yon ti konpayi semans. Li te renmen travay li. Sete yon sous gwo emèveyman pou l te wè chak ti semans tou piti li te vann te gen kapasite pou transfòme l vin tounen yon bagay mirakile—yon kawòt, yon chou, oswa menm yon gwo pye bwadchèn.
Christa te renmen chita sou konpitè a ap resevwa kòmand e reponn kesyon. Men yon jou, li te resevwa yon plent ki te etone li.
Kliyan an te di: “Semans yo pa mache. Sa gen de mwa depi m achte yo e yo toujou pa bay anyen.”
Christa te mande l: “Èske ou te plante yo nan bon tè e ba yo ase dlo ak solèy?”
Kliyan an te reponn: “Non, men m te fè pati pa m nan. M achte semans yo. Apre tou, nou ban m garanti ke y ap pouse.”
“Men èske w pa plante yo?”
“O non. Sa t ap vle di pou m al sal men mwen.”
Christa te panse sou sa epi l te deside ke li dwe ekri direksyon pou plante yo. Li te deside ke premye direksyon an se t ap: “Ou dwe suiv enstriksyon pou plante yo pou semans yo ka pouse. Ou pa ka depoze yo sou yon etajè epi pou w atann ke y ap pouse.”
Sa pat pran lontan pou yon lòt plent te etone li.
Yon kliyan te di: “Semans yo pa pwodui.”
Christa te reponn: “Èske w te plante yo nan bon tè? Èske w te ba yo kantite dlo ak kantite solèy apwopriye?”
Kliyan an te ensiste: “O, wi. M fè tout bagay sa yo—ekzakteman jan yo di sou anbalaj la. Men sa pa mache.”
“Èske ou pa wè anyen menm? Èske yo pa pouse”?
Kliyan an te di: “Anyen menm. M plante yo jan yo mande a. M te espere ke m t ap gen tomat pou m manje. Kounyeya m desi anpil.”
Christa reponn: “Tann. Èske w vle di m ke ou plante semans yo jodia?”
Kliyan an reponn: “Pa jwe non! M te plante yo sa gen yon semèn. M pa t ap tann pou m wè tomat nan premye jou a; m te gen pasyans. Kite m di ou, te gen anpil wouze ak tann ant lè m te plante yo a ak kounyeya.”
Christa te konnen ke l te dwe ajoute yon lòt direksyon: “Semans sa yo konfòm ak lwa biyoloji a. Si ou plante semans yo nan maten epi ou atann pou w manje tomat apre nan menm semèn nan, wa pral desi. Ou dwe gen pasyans epi tann pou travay lanati fèt devan ou.”
Tout bagay te anfòm jiskaske Christa te resevwa yon lòt plent.
Kliyan an te kòmanse: “M desi anpil de semans ou yo. M plante yo egzakteman jan yo rekòmande sou pake a. M ba yo dlo, m fè si ke yo pran solèy, e m tann jiskaske finalman yo te pwodui rekòt yo.
Christa di: “Sanble ke ou fè tout bagay dwat.”
Kliyan an te reponn: “Sa bon. Men se zoukini yo ban mwen!”
Christa di: “Kaye a montre mwen ke se semans sa yo ou te kòmande.”
“Men, m pa vle zoukini; m vle joumou!”
“M pa konprann.”
“M te plante semans yo nan kare joumou m nan—menm tè a ki te pwodui joumou ane pase a. M te pale avèk plant yo chak jou, m te di yo ki kalite bèl joumou y ap vin tounen. Men olye de gwo joumou jòn byen won, mwen jwenn zoukini vèt byen long. Yon pakèt!”
Lè sa a Christa te reyalize ke direksyon yo petèt pa sifi e li te nesesè pou l te deklare yon prensip: “Semans ou plante a ak tan plante a detèmine rekòt la.”
Lwa rekòt la
Apot Pòl te anseye lwa rekòt Bondye a:
“Pa twonpe tèt nou. Moun pa ka pase Bondye nan betiz. Sa yon moun simen, se sa li va rekòlte.
“Paske, moun ki simen sa ki fè kò l plezi, li gen pou l rekòlte lanmò; Men, moun ki simen sa ki fè Lespri a plezi, Lespri a va fè l rekòlte lavi ki pap janm fini an.
“Pa janm bouke fè byen; paske si nou pa dekouraje, na rekòlte lè lè a va rive” (Galat 6:7–9).
Nan dènye tan sa yo, Senyè a ba nou sajès ak konsèy adisyonèl pou lwa enchanjab sa a:
“Gen yon lalwa oubyen yon règ irevokab ki dekrete nan syèl la anvan fondasyon mond sa a, sou lalwa sa a tout benediksyon tabli—
“Epi lè nou resevwa nenpòt benediksyon nan men Bondye, se nan obeyisans lalwa sa a kote benediksyon an table a” (D&A 130:20–21).
Sa nou simen, se sa nou rekòlte.
Rekòt Bondye a enkwayableman gloriye. Pou moun ki onore li, benediksyon abondan vini nan “bon mezi, byen souke, byen foule, ak tout tiyon l” (Lik 6:38).
Tou kòm semans terès yo mande efò ak pasyans lan, se konsa sa ye tou pou anpil benediksyon k sot nan syèl la. Nou pa ka depoze relijyon nou sou yon etajè epi pou nou atann n ap rekòlte benediksyon espirityèl. Men si nou plante prensip levanjil yo epi nou nouri yo nan lavi fanmi nou chak jou, gen gwo pwobablite ke pitit nou yo ap grandi pou pwodui lafwa espirityèl ki gen gran valè pou yo ak pou jenerasyon k ap vini yo.
Repons Bondye pou priyè nou yo pa toujou vini imedyatman —pafwa se kòmsi yo pa vini ditou—men Bondye konnen sa ki pi bon pou pitit li. Asireman, yon jou nou pral wè pi klè; epi jou sa a nou pral rekonèt bonte ak jenewozite syèl la.
Antretan, objektif nou ak gwo lajwa nou se mache sou tras Mèt nou ak Sovè nou an epi pou n viv bon lavi rafine pou rekòt presye benediksyon san parèy yo pwomèt nou yo kapab reyalize.
Sa nou simen, se sa n ap rekòlte.
Sa se lwa syèl la.
Sa se lwa rekòt Bondye a.
© 2014 pa Intellectual Reserve, Inc. Tout dwa rezève. Enprime nan Etazini Damerik. Apwobasyon Anglè: 6/14. Apwobasyon tradiksyon: 6/14. Tradiksyon First Presidency Message, August 2014. Haitian. 10868 036
Ansèyman nan mesaj sa a
Diskite avèk moun w ap vizite yo sou fason lwa rekòt Bondye a aplike pou relasyon, konvèsyon ak temwayaj, oswa karyè ak objektif pou pran fòmasyon. Ou ka li ak konsidere ekriti ki pale de lwa sa yo, tankou Pwovèb 11:18; 2 Korentyen 9:6; ak Alma 32. Ankouraje yo pou yo repase bi anvan yo epi fikse nouvo bi pou atenn rezilta ki jis. Ede yo devlope yon plan pou aji tout tan pou yo ka atenn objektif alontèm yo genyen yo.