Te paraparau nei tatou no te Mesia
Te pota ofaʻI JADE
Te ora nei te taata papaʻi i Utaha, te mau Hau Amui no Marite.
A tavini ai au i ta’u misioni i Taiwan, ua haere maua to’u hoa i te fare manaha National Palace Museum i Taipei, e mahana faaineineraa te reira na maua. Te mea au roa a‘e i reira, o te hoê ïa hipa ano‘ihi tei topahia te i‘oa, te Jade Cabbage (te pota ofaʻi Jade). Ua hi‘o anaanatae roa te taata i te reira, no’u nei râ, e hoho‘a pota noa ïa tei taraihia i roto i te ofaʻi « Jade ». E mea nehenehe ihoa ïa, eita e nehenehe e parau, e aha ra pai to’na faahiahia taa ê.
I te otiraa ta maua mataʻitaʻiraa i te fare manaha, ua ani au i to’u hoa misionare, « E aha to oe mana‘o no ni‘a i te Pota ofaʻi Jade ? »
« Ua au roa vau i te reira ! »
« No te aha ? » Ua ani au. « E pota noa hoʻi ».
« Te faaoo ra paha oe ia’u ? » E auraa parau to teie Pota ofaʻi Jade i roto i to’u oraraa ! » ua pii hua mai oia.
« Tera pota ? »
« E ! Aita anei oe i faaroo i te aamu ? »
« Aita paha ».
E, faati‘a mai nei oia i te aamu. E ua tano roa ïa oia. Riro atoa mai nei te reira ei auraa parau no ta’u misioni e to’u oraraa.
No te haafaufaa i te ofaʻi Jade tarai, titauhia ia papû maitai te û o tera ofaʻi. E mea moni rahi te mau ohipa tarai i roto i te hoê ofaʻi jade aita to’na e vahi hape, no te mea e mea varavara roa ino te ofaʻi jade aita e vahi hape. E piti û to te Pota ofaʻi jade, matie i te hoê pae e uouo i te tahi, e e mea apoopoo e te taratara. Eita te taata tarai e haamauʻa i to’na taime i ni‘a i te hoê ofaʻi mai te reira te huru, e i te hoê râ mahana, ua tae mai te hoê taata ta te Tinito e parau nei, te orometua tarai ofaʻi.
Ahani e nehenehe ta teie ofaʻi jade e paraparau, aita paha e parau ta’na eita e parau atu i teie taata tarai apî. Te feruri nei au i te taata tarai, to’na raveraa i teie ofaʻi jade i roto i to’na rima.
« E aha ta oe e hinaaro ? » e ani atu te ofaʻi jade.
« Te imi ra vau i te ofaʻi jade no te tarai », ua pahono mai te taata tarai.
« A imi faahou â. Aita to’u e faufaa. E piti û taa ê to’u tei anoʻinoʻi, e eita e nehenehe e faataa i te reira. E mea apoopoo vau e te taratara. Aita to’u e faufaa. Eiaha e haamauʻa i to oe taime ».
« Auê oe e, e teie ofaʻi jade maamaa. A ti‘aturi mai ia’u. O vau te orometua tarai ofaʻi. E hamani au ia oe ei ohipa nehenehe roa ino ».
Te ohipa faahiahia i roto i te Pota ofaʻi Jade, oia hoʻi ïa, ua faa‘ohipa te tahi orometua tarai ofaʻi i te mau paruparu o teie ofaʻi jade—na û e piti, te mau apoopoo e te taratara—no te hamani i teie pota e au ihoa i te pota mau. O te tuhaa uouo tei riro mai ei tumu no te pota, e na te mau apoopoo e te taratara i faahohoa maitai i te mau rauʻere. Ahani aita teie mau vahi « paruparu » i ni‘a i teie ofaʻi jade, eita ïa te reira e au i te hoho‘a mau o te pota.
No te nehenehe mau o teie ohipa ano‘ihi, ua riro te reira ei tao‘a horo‘a i te fenua Taina e ua faaʻiteʻitehia te reira i roto i te fare o te mau taata rahi atoa na Asia e tae roa mai to’na tuuraahia i roto i te fare manaha no Taiwan.
Te faahaamanaʻo nei te reira i te Etera 12:27: « E ia tae mai te taata ia’u nei, e faa‘ite atu ai au ia ratou i to ratou paruparu… E au maitai to’u aroha i te mau taata atoa i faahaehaa ia ratou iho i mua ia’u ra ; ia faahaehaa hoʻi ratou ia ratou iho i mua ia’u, e ia faaroo ia’u, ei reira e faariro vau i te mea paruparu ei mea etaeta no ratou ».
No to’u iteraa i te Pota ofaʻi Jade, ua haamata teie irava i te anapanapa i te tahi maramarama apî. Ua riro tatou mai teie ofaʻi jade, areʻa râ, te tarai-noa-hia ra tatou i teie nei. Titau-roa-hia ia tatou ia ti‘aturi i te orometua tarai ofaʻi, o Iesu Mesia, te riro i te rave i to tatou mau paruparu ma te faariro ia ratou ei puai. I te tahi taime, no to tatou hi‘oraa papû ore rii, te faatumu nei tatou i ni‘a i to tatou mau vahi hapehape ei reira, e hepohepo roa ai no te mea e mana‘o tatou eita roa’tu tatou e tapae. Teie râ, te hi‘o nei to tatou Faaora, o Iesu Mesia, ia tatou, mai te taata ta tatou e nehenehe e riro mai. Ia faati‘a tatou i To’na Taraehara ia ohipa i roto i to tatou oraraa, e riro Oia i te taraitarai ia tatou ei ohipa faahiahia roa no te ora i te hoê mahana i mua i te aro o te Arii o te mau arii.