Thawj Pawg Thawj Tswj Hwm tsab Xov, Ib Hlis Ntuj 2015
Coj Raws Li cov Yaj Saub Hais
Kuv ua hauj lwm nyob hauv Teb Chaws Amelikas Pawg Tub Rog Caij Nkoj thaum muaj Kev Tsov Rog Thoob Ntiaj Teb thib Ob yuav luag tiav lawm. Kuv yog ib tug seaman, uas yog pawg qis tshaj plaws nyob hauv pawg tub rog caij nkoj. Ces tom qab ntawd kuv tsim nyog ua ib tug Seaman First Class, ces tom qab ntawd kuv tsim nyog ua ib tug Yeoman Third Class.
Kev Tsov Rog Thoob Ntiaj Teb thib Ob tiav lawm, ces lawv cia kuv tawm tsis ua tub rog ntxiv. Tiam sis kuv txiav txim siab tias yog kuv rov qab mus ua tub rog kuv xav ua ib tug nom tub rog. Kuv xav tias, “Yog tias kuv ua tau, kuv tsis xav ua mov rau sawv daws noj ntxiv, tsis xav ntxuav lub nkoj ntxiv.”
Tom qab lawv cia kuv tawm, kuv koom nrog lub Teb Chaws Amelikas Pawg Tub Rog Caij Nkoj uas Nyob Tos. Kuv mus kawm ua tub rog txhua hmo Monday. Kuv rau siab kawm ntawv kom kuv thiaj xeem tau ntawv zoo. Kuv twb ua txhua yam kev sib tw ntawm sab paj hlwb, sab nqaij daim tawv, thiab ntawm lub siab ntsws. Ces, thaum kawg kuv txais xov xwm zoo kawg hais tias: “Twb pom zoo kom muab koj tsa ua ib tug ensign nyob hauv lub Teb Chaws Amelikas Pawg Tub Rog Caij Nkoj uas Nyob Tos.”
Kuv zoo siab muab rau kuv tus poj niam, Frances, saib thiab hais tias, “Kuv twb ua! Kuv twb ua lawm!” Nws khawm kuv thiab hais tias, “Koj twb khwv heev koj thiaj ua tau.”
Tiam sis tom qab ntawd ib yam dab tsi txawm tshwm sim. Lawv hu kuv ua ib tug pab cuam nyob hauv kuv pawg ntseeg pawg npisov. Tus npisov pawg sab laj kev sib ntsib thiab kuv pawg tub rog kev sib ntsib yog tib hmo. Kuv twb paub hais tias yog ib qho teeb meem loj heev. Kuv paub hais tias kuv yuav tsis muaj sij hawm ua hauj lwm hauv Pawg Tub Rog uas Nyob Tos thiab kuv pawg npisov. Kuv yuav ua li cas? Kuv yuav tsum txiav txim siab.
Kuv twb thov Vajtswv. Ces kuv mus xyuas tus neeg uas yog kuv ceg txheem ntseeg tus thawj tswj hwm thaum kuv yog ib tug me nyuam tub, Txwj Laug Harold B. Lee (1899–1973), es nws yog ib tug hauv Pawg Kaum Ob tug Thwj Tim lawm. Kuv twb zaum ntawm nws lub rooj. Kuv qhia nws tias kuv saib qhov tsa kuv ua nom rau nqi heev. Kuv twb muab daim ntawv tsa kuv ua nom tub rog rau nws saib.
Tom qab nws xav txog qhov no ib pliag, nws hais rau kuv tias, “Tus Kwv Monson, koj yuav tsum ua li no. Koj cia li sau ntawv rau Bureau of Naval Affairs thiab qhia lawv tias vim koj yog ib tug hauv pawg npisov, koj thiaj txais tsis tau lawv txoj kev tsa koj ua nom hauv lub Teb Chaws Amelikas Pawg Tub Rog Caij Nkoj uas Nyob Tos.”
Kuv poob siab. Ces nws hais ntxiv tias, “Ces cia li sau ntawv rau tus thawj coj ntawm Pawg Tub Rog Caij Nkoj thib Kaum Ob nyob hauv San Francisco thiab qhia lawv tias koj xav tawm ntawm pawg tub rog uas nyob tos.”
Kuv hais tias, “Txwj Laug Lee, koj tsis to taub cov tub rog zoo li cas. Lawv yeej kam tsis tsa kuv ua nom yog tias kuv tsis kam ua li ntawd, tiam sis Pawg Tub Rog thib Kaum Ob yeej tsis cia kuv tawm mus. Vim ntshe lawv yuav ua rog nyob hauv Korea, ib tug tub rog uas tsis yog tus nom yeej yuav raug xa mus. Yog tias lawv xa kuv mus, kuv xav ua ib tug nom, tiam sis yog kuv tsis txais lawv txoj kev tsa ntshe tsis zoo li ntawd. Koj puas paub tseeb tias koj xav kom kuv txais lus ntuas no?”
Txwj Laug Lee tso nws txhais tes saum kuv xub pwg thiab zoo li kuv txiv hais tias, “Tus Kwv Monson, muaj kev ntseeg ntxiv. Tsis tsim nyog koj nyob hauv pawg tub rog.”
Kuv twb mus tsev. Kuv tso kuv daim ntawv rov qab hauv lub hnab ntawv nrog tsab ntawv uas kuv txais thiab sau tias kuv yuav tsis txais. Ces kuv sau ntawv rau Pawg Tub Rog Caij Nkoj thib Kaum Ob thiab thov kom lawv tso kuv tawm ntawm Pawg Tub Rog Caij Nkoj uas Nyob Tos.
Lub sij hawm uas lawv tso kuv tawm ntawm kuv Pawg Tub Rog Caij Nkoj uas Nyob Tos yog pawg kawg uas lawv tso tawm ua ntej Kev Tsov Rog hauv Kaub Lim Teb. Kuv pawg tub rog twb raug xa mus. Rau lub lim tiam tom qab kuv raug hu los ua ib tug pab cuam hauv pawg npisov, lawv hu kuv ua tus npisov rau kuv pawg ntseeg.
Ntshe kuv yuav tsis ua hauj lwm li no nyob hauv lub Koom Txoos hnub no yog tias kuv tsis tau mloog tus yaj saub lus, yog tias kuv tsis tau thov Vajtswv txog txoj kev txiav txim ntawd, yog tias kuv tsis tau ua raws li qhov tseeb no: tej lub sij hawm tib neeg xav tias Vajtswv lub tswv yim yog kev ruam.1 Tiam sis qhov tseem ceeb uas peb kawm tau nyob hauv lub ntiaj teb no yog qhov uas thaum Vajtswv hais lus thiab Nws cov me nyuam mloog lus, lawv yeej ua qhov yog.
Tib neeg hais tias peb zaj liv xwm nyob ntawm tej kev txiav txim me me, thiab peb lub neej yeej zoo ib yam. Tej yam uas peb xaiv yuav hloov peb lub neej tom ntej. Tiam sis Vajtswv tsis tso peb tseg cia peb txiav txim peb tus kheej xwb.
Yog tias nej xav pom lub ntuj ceeb tsheej ci ntsa iab, yog nej xav txais kev tshoov siab ntawm tus Vajtswv uas Muaj Hwj Chim Tag Nrho, yog nej xav paub tias nej Leej Txiv Saum Ntuj Ceeb Tsheej coj nej kev, ces cia li mloog Vajtswv cov yaj saub tej lus. Thaum nej ua raws li cov yaj saub, nej nyob hauv qhov chaw puaj phais.
(c) 2015 los ntawm Intellectual Reserve, Inc. Ceev txhua txoj cai. Luam tawm hauv Teb Chaws Amelikas. Pub txhais ua lus Akiv: 6/14. Pub txhais ua lus Hmoob: 6/14. Kev txhais lus First Presidency Message, January 2015. Hmong. 12581 295
Qhia los ntawm tsab Xov No
Tsis muaj mej zeej ntawm lub Koom Txoos coob uas txais tej lus ntuas kiag ntawm ib tug Thwj Tim, zoo li Thawj Tswj Hwm Monson. Tiam sis peb tseem yuav tau koob hmoov thaum peb ua raws li cov yaj saub thiab cov thwj tim tej lus qhia. Xav seb puas yuav nyeem Thawj Tswj Hwm Monson zaj lus hais los ntawm lub tuam rooj sab laj tas los (nco txog tej lus uas nws hais thaum qhib thiab xaus). Nrhiav tej lus qhia uas nws hais kom ua tej yam. Tej zaum koj xav sib tham nrog cov uas koj mus xyuas thiab xav txog tej yam nej ua tau kom ua raws li Thawj Tswj Hwm Monson tej lus ntuas.