Unsay Inyong Pilion?
Ni Elder Russell M. Nelson
Sa Korum sa Napulog Duha ka mga Apostoles
Gikan sa pakigpulong sa debosyonal sa Church Educational System, “Batan-on nga Bililhon: Unsay Inyong Pilion?” gihatag didto sa Brigham Young University–Hawaii niadtong Septyembre 6, 2013. Alang sa kompleto nga pakigpulong, adto sa cesdevotionals.lds.org.
Kamo mga sinugo sa inyong Langitnong Amahan sa pagtukod sa gingharian sa Dios dinhi sa yuta karon ug sa pag-andam og katawhan sa pagdawat sa Manluluwas.
Mga paghulagway pinaagi ni Brandon Dorman
Isip mga “batan-on nga bililhon,”1 kamo literal nga mga anak sa Dios, natawo niining panahon sa kasaysayan sa kalibutan alang sa mas sagrado nga katuyoan. Bisan og ang moral ug relihiyoso nga mga hiyas sa katilingban nagkawala sa kalibutan, ang mga kabatan-onan niini nga Simbahan mao ang sinaligan sa Ginoo ug banwag sa kahayag sa pagdani sa uban ngadto Kaniya. Ang inyong pagkatawo ug katuyoan talagsaon.
Unsa ang inyong pagkatawo? Mga anak kamo sa pakigsaad kadtong gihimo sa Dios uban ni Amahang Abraham sa dihang si Abraham gisaaran nga “sa imong kaliwat pagapanalanginan ang tanang kabanayan sa yuta (Mga Buhat 3:25; tan-awa usab sa 1 Nephi 15:18; 3 Nephi 20:25). “Mga anak usab kamo sa gisaad nga adlaw,”2 niining panahon sa kasaysayan sa kalibutan nga ang ebanghelyo isangyaw sa tibuok planeta.
Unsay inyong katuyoan? Kamo gi-orden nang daan didto sa premortal nga kalibutan sa paghupot sa priesthood (tan-awa sa Alma 13:2–3). Ug kamong mga sister gipili na sa wala pa ang katukuran sa kalibutan sa pagpanamkon ug pag-atiman sa mga anak sa Dios; sa pagbuhat sa ingon, inyong gihimaya ang Dios (tan-awa sa D&P 132:63). Kamo ba mga sister inyo bang gikonsiderar unsay gyuy gipasabut nga kauban sa Dios nga tiglalang?
Kada usa ninyo batan-ong lalaki ug babaye gisugo sa inyong Langitnong Amahan sa pagtukod sa gingharian sa Dios dinhi sa yuta karon ug mag-andam og mga tawo nga modawat sa Manluluwas kon Siya magmando ug maghari na isip Mesiyas sa Milenyum. Ang inyong pagkabililhon, pagkatawo, katuyoan, ug balaan nga sugo nakapalahi ninyo gikan sa ubang mga tawo.
Apan ang inyong katungod sa pagkatawo ni ang inyong ordinasyon sa premortal ug mga sugo makaluwas ninyo. Nga kamo mohimo pinaagi sa inyong kaugalingong mga desisyon ug kon kamo mopili sa pag-access sa gahum sa Pag-ula sa Ginoo sa inyong mga kinabuhi. Ang mahangturong baruganan sa kabubut-on importante sa plano sa Amahan. Mao nga, kamong batan-on nga bililhon, unsay inyong pilion?
Mopili ba kamo nga madugangan ang makat-unan?
Makaangkon mo og edukasyon sa inyong paninguha. Walay lain makahatag niini alang kaninyo. Bisan asa kamo, palamboa ang dakong tinguha sa pagkat-on. Kita isip mga Santos sa Ulahing mga Adlaw, ang pag-angkon og edukasyon dili lang usa ka pribilehiyo, reilihiyoso kini nga responsibilidad. Ang himaya sa Dios mao ang salabutan (D&P 93:36). Sa pagkatinuod, ang atong edukasyon alang sa kahangturan.
“Bisan unsa nga baruganan sa salabutan nga kita makakab-ut niini nga kinabuhi, kini madala uban kanato sa pagkabanhaw.
“Ug kon ang usa ka tawo makakab-ut og daghan pa nga kahiblao ug salabutan dinhi niini nga kinabuhi pinaagi sa iyang kakugi ug pagkamasulundon …, siya adunay daghan nga kahigayunan didto sa kalibutan nga umaabut” (D&P 130:18–19).
Ang maong mahangturong panglantaw makatabang ninyo sa paghimo’g maayong mga pagpili bahin sa pagkat-on.
Ayaw kahadlok sa pagpadayon sa inyong mga tumong—gani sa inyong mga damgo! Apan hibaloi nga walay shortcut sa kamaayo ug abilidad. Ang edukasyon mao ang kalainan tali sa paghandom nga makatabang mo sa ubang tawo ug sa paghimo sa pagtabang kanila.
Unsa nga matang sa pagpakabuhi ang inyong pilion?
Gipaabut nga magpakabuhi nga lahi kay sa uban. Kahibalo mo unsay gisulti ni Pablo ngadto sa batan-ong Timoteo: “Pagkinabuhi ingon nga panig-ingnan sa sinultihan, ug sa paggawi, sa gugma, sa pagtuo, sa kaputli.” (1 Timoteo 4:12).3 Pagpili sa paghunahuna ug sa paglihok nga lahi gikan sa kalibutan. Pagpili nga lahi kamong tan-awon ug tan-awa unsa nga impluwensya ang inyong mahimo alang sa kaayohan. Sama sa gisulti ni Ardeth G. Kapp, kanhi kinatibuk-ang presidente sa Young Women, sa makausa miingon, “Dili kamo mahimong life-saver, kon pareho ra kamo sa ubang mga swimmer diha sa baybayon!”.4
Isip batan-on nga bililhon, kamo dunay nindot nga sinugdanan sa kinabuhi, apan kamo adunay dugang nga responsibilidad usab “Alang kaniya ngadto kinsa daghan ang gihatag daghan ang gikinahanglan.” (D&P 82:3; tan-awa usab sa Lucas 12:48). Kabahin niana nga panginahanglan mao ang pagkahimong usa ka recruit. Sa dihang kamo gibunyagan, sa tinuod kamo nalista sa kasundalohan sa Ginoo.5 Didto sa premortal, nagbarug kamo uban ni Jesukristo panahon sa Gubat sa Langit. Ug karon ang panagbangi tali sa mga gahum sa maayo ug dautan nagpadayon dinhi sa kalibutan. Tinuod kini! (Tan-awa sa Pinadayag 12:7–9; D&P 29:40–41). Sa habig sa Dios mao si Jesukristo, giordinahan nang daan nga mahimong Manluluwas sa Kalibutan (tan-awa sa 1 Nephi 10:4). Sa pikas habig mao si Satanas—usa ka rebelde—ang tiglaglag sa kabubut-on (tan-awa sa Moises 4:3).6
Ang plano sa Dios nagtugot sa kaaway sa pagtintal kaninyo aron nga kamo makagamit sa inyong kabubut-on sa pagpili sa maayo gikan sa dautan, sa pagpili sa paghinulsol, ug sa pagpili sa pagduol ngadto ni Jesukristo ug motuo sa Iyang mga panudlo ug pagsunod sa Iyang ehemplo. Pagkadako nga responsibilidad ug pagkadako nga pagsalig!
Ang inyong kagawasan sa paglihok alang sa inyong kaugalingon mao ang sentro sa inyong mahangturong kalamboan ug kalipay nga ang kaaway naningkamot pag-ayo sa pagbaliwala niini (tan-awa sa 2 Nephi 2:27; 10:23).
Moestablisar ba kamo og mga prayoridad sa pagtabang ninyo sa paghimo sa inyong mga pagpili sa kinabuhi?
Ang inyong mga pagpili dili lamang tali sa maayo ug dautan. Daghan ang kapilian tali sa duha ka maayong mga opsyon. Dili tanang mga kamatuoran gihimo nga managsama, kinahanglan kamong moestablisar og mga prayoridad. Sa inyo nga padayong pag-angkon og kahibalo, hibaloi nga ang labing importante kaayo nga kamatuoran nga inyong makat-unan nagagikan sa Ginoo. Sa Iyang pagpangamuyo sa Iyang Amahan, ang Manluluwas Mismo mikumpirmar niini. Miingon Siya, “Ug ang kinabuhing dayon mao kini, ang ilang pagpakaila kanimo nga mao ang bugtong tinuod nga Dios, ug kang Jesukristo nga imong gipadala.” (Juan 17:3). Labaw sa tanan naningkamot kamo sa pagkat-on, naningkamot nga makaila sa Dios, inyong Langitnong Amahan, ug sa Iyang Anak, nga si Jesukristo. Ilha Sila ug higugmaa Sila sama sa akong gibuhat.
Laing prayoridad nga kasulatan nakatabang nako sa akong tibuok kinabuhi: “Apan paninguha kamo sa pagtukod og una sa gingharian sa Dios, ug sa pagpatunhay sa iyang pagkamatarung, ug kining tanan nga mga butang idugang nganha kaninyo.” (Mateo 6:33).
Labaw kay sa bisan unsa niining kalibutana, gusto kamong mohimo og mga pagpili nga mosangpot sa importante ug mahimayaong kapalaran sa kinabuhing dayon. Mao kana ang labing importanting himaya sa Dios alang ninyo (tan-awa sa D&P 14:7; Moises 1:39). Pilia ang kinabuhing dayon nga maoy inyong labing taas nga prayoridad! Tun-i ang mga kasulatan, sama sa mga seksyon 76 ug 88 sa Doktrina ug mga Pakigsaad, aron mas makasabut sa lain-laing mga panalangin nga naghulat niadtong kinsa mopili sa kinabuhing dayon ug niadtong dili. Pilia ang kinabuhing dayon isip inyong labing taas nga prayoridad ug matnguni kon sa unsang paagi mapahimutang ang ubang mga pagpili
Kinsa ang inyong pilion nga ikakuyog-kuyog?
Kamo makig-uban sa daghang buotang mga tawo kinsa nagtuo usab sa Dios. Ma-Jewish, Katoliko, Protestante, o Islam man, ang mga tumutuo nasayud nga adunay hingpit nga kamatuoran. Ang mga tumutuo sa Dios adunay konsensya usab. Ang mga tumutuo boluntaryong mosunod sa sibil ug balaan nga balaod, bisan sa mga balaod nga wala mapatuman.
Sa inyong pasalig sa pagsunod sa sibil ug balaan nga balaod, mohunong mo kon mopula ang suga, bisan kon wala moy nakita nga sakyanan. Isip anak sa Dios, nasayud nga bisan kon ang pulis wala makadakop ninyo, nga kon kamo mangawat, mopatay, o manapaw, kini nga mga buhat sayop, ug ang Dios sa katapusan maningil niini gikan kaninyo. Nasayud kamo sa mga sangputanan sa wala pagsunod sa mga lagda dili lamang temporal apan mahangturon.
Sa inyong pagpadayon sa kinabuhi, makaila usab kamo sa mga tawo nga wala motuo og Dios. Kadaghanan nila wala pa makakita sa balaan nga kamatuoran ug wala masayud asa kini pangitaa. Apan kamong batan-on nga bililhon motabang sa pagluwas nila. Sa dinaghan, kamo misunod sa tawag sa propeta sa Dios alang sa dugang nga mga misyonaryo. Mapasalamaton kaayo mi sa matag usa ninyo!
Sa inyong pakig-uban sa dili mga tumutuo, pagbantay nga pipila nila dunay dautang mga laraw (tan-awa sa D&P 1:16; 89:4). Kon makamatikod kamo niini, palayo kanila diha-diha dayon ug permanente (tan-awa sa 1 Timoteo 6:5–6, 11).
Subo kaayo, makasugat kamo og mga tawo kansang desperado nga nangita sa butang nga daw makalipay nga maoy nakapadala nila ngadto sa danglog nga agianan sa sala. Pagbantay nianang danglog nga agianan! Ang bisan unsang kalipay sa sala mubo ra, ug ang dili malimtan nga handumanan nahugawan sa pangagot ug mapait nga sala. Ang makasasala nga pagtipas sa gidawat nga balaang plano sa paghiusa sa bana ug asawa usa ka haw-ang nga imitasyon. Ang matag ilegal nga kasinatian gikuhaan sa lawom nga kahulugan ug matam-is nga handumanan.
Mopili ba kamo og kagawasan o pagkaulipon?
Ang mga gahum nga walay kahadlok sa Dios anaa sa palibut. Kamo literal nga nagpuyo sa teritoryo sa kaaway.7 Ang sakit sa makahilo nga pornograpiya nagkadaghan. Makalit-ag kini sa tanan kinsa magpadala sa makuyaw nga paggunit.
Nakita kini sa Ginoo, kinsa miingon, “Ug karon ako mopakita nganha kaninyo og usa ka misteryo, usa ka butang nga anaa sa tinago nga mga lawak, sa pagpahinabo gani sa imong kalaglagan sa pagpanglabay sa panahon, ug ikaw wala masayud niini” (D&P 38:13; tan-awa usab sa bersikulo 28).
Hunahunaa pila ka mga tawo, nga anaa sa daghang tinago nga mga lawak, ang nagtinguha karon sa paglaglag sa inyong kinabuhi ug kalipay! Kalibutanon nga tintasyon dili bag-o. Si Apostol Pedro mipasidaan niining sama nga lit-ag sa dihang siya misulat:
“Pinaagi sa maulagon nga mga pangibog sa lawas ilang ginahaylo, … ang mga tawo nga bag-o. …
“Sila magasaad kanilag kagawasan, samtang sa ilang mga kaugalingon sila mga ulipon nga iya sa pagkadunot; kay ang tawo ulipon man sa bisan unsa nga makabuntog kaniya” (2 Pedro 2:18–19).
Likaye ang pagkaulipon, akong minahal nga mga kaigsoonan. Kon kamo nagtan-aw og pornograpiya karon, hunong! Pangayo og tabang gikan sa inyong bishop. Walay mas bright nga makalupig sa kaaway sa ilang kaugalingon, kon nahiloan na sila sa pornograpiya. Usa kini ka makamatay nga sangla, makapaadik sama sa drugas, ug makakut-kot sama sa lihiya.
Mopili ba kamo sa pagsunod sa Ginoo o sa mga pilosopiya sa mga tawo?
Tun-i pag-ayo ang “Ang Pamilya: Usa ka Pamahayag ngadto sa Kalibutan.”8 Ang pamilya giataki sa tibuok kalibutan, ang kamatuoran sa pamahayag sa pamilya manalipod kaninyo.
Kinahanglang kamong makasabut sa malungtarong mga sangputanan sa pakig-away sa katilingban karon sa kahulugan sa kaminyoon. Ang gidebatihan karon naglakip sa pangutana kon ang duha ka mga tawo nga managsama ang gender mahimo bang magminyo. Kon kamo adunay pangutana mahitungod sa posisyon sa Simbahan bahin niini o sa bisan unsa nga importante nga isyu, pagmainampoon sa pagpalandong niini, dayon patalinghugi ang propetikanhong mga mensahe sa buhi nga mga propeta. Ang ilang dinasig nga mga pulong, dugangan pa sa inspirasyon gikan sa Espiritu Santo, makahatag og hingpit nga pagsabut sa inyong hunahuna.9
Ang debate sa kaminyoon usa lamang sa daghang mga kontrobersiya nga mohagit ninyo sa umaabut. Batok sa kusog nga tingog sa kaaway, kamo, isip batan-on nga bililhon, mopili sa pagbarug alang sa Ginoo ug sa Iyang kamatuoran.
Si Apostol Pablo nanagna mahitungod sa kahimtang sa atong panahon (tan-awa sa 2 Timoteo 3:1–5). Ang eksakto nga panan-aw ni Pablo sa espiritwal nga kalaglagan sa atong panahon gisundan sa iyang masiguroon nga pagtapos, nagsulti nato unsaon nga kita mahimong luwas: “Sukad sa imong pagkabata ikaw nakasabut na sa balaan nga kasulatan nga makagagahum sa pagtudlo kanimo ngadto sa kaluwasan pinaagi sa pagtuo ni Jesukristo.” (2 Timoteo 3:15).
Sa iyang tambag ako modugang sa akong tambag: Padayon sa pagtuon sa mga kasulatan. Padayon sa pagbuhat sa mga butang nga naglig-on sa inyong pagtuo kang Jesukristo. Ug dayon bantayi ang maalamong mga pagpili nga natural ninyong himoon.
Ang inyong pagtuo kang Jesukristo ug sa Iyang ebanghelyo makahatag ninyo og kusog sa pagminyo ug pagbaton og mga anak sa inyong pamilya samtang batan-on pa kamo ug makahimo pa niini. Kon kamo moabut na sa akong pangidaron, inyong hataga’g bili ang inyong mga anak, mga apo, ug ilang mga anak, labaw sa bisan unsang kabantog o katigayunan nga tingali moabut kaninyo.
Unsaon ninyo sa pagpangandam alang sa inyong personal nga interbyu uban sa Manluluwas?
Kamong batan-on nga bililhon dili hingpit. Walay usa nato nga hingpit. Mao nga, kamo, uban natong tanan, mapasalamaton kaayo sa Pag-ula sa Manluluwas, nga naghatag og hingpit nga kapasayloan kon tinud-anay kamong maghinulsol. Nasayud usab kamo nga ang inyong pagpuyo dinhi sa pagkamortal kadiyot ra kaayo. Moabut ang higayon, kada usa ninyo mogradwar gikan niining huyang nga pagkinabuhi ug mobalhin ngadto sa sunod nga kalibutan.
Ang adlaw sa paghukom nagpaabut sa matag usa nato. ako nasayud, sama sa tanang mga estudyante sa Basahon ni Mormon, nga “ang magbalantay sa ganghaan mao ang Usa nga Balaan sa Israel; ug wala siya mogamit og [mga] sulugoon didto.” (2 Nephi 9:41). Oo, kada usa nato adunay personal nga interbyu ni Jesukristo.
Kada adlaw sa kalibutan naghatag ninyo og panahon ug oportunidad sa pagpangandam alang niana nga interbyu. Hibaloi kini: Kon kamo mopili sa pagpuyo sa habig sa Ginoo, wala kamo mag-inusara. Ang Dios mihatag ninyo og access sa Iyang tabang samtang kamo magpadayon sa makuyaw nga dalan sa pagka-mortal. Kon magkugi, matinuoron kamong mobu-bu sa inyong kasingkasing ngadto Kaniya sa inadlaw nga pag-ampo, Siya mopadala sa Iyang mga anghel sa pagtabang ninyo (tan-awa sa D&P 84:88). Siya mihatag ninyo sa Espiritu Santo nga magauban ninyo kon kamo magpuyo nga takus. Siya mihatag ninyo sa mga kasulatan aron kamo hingpit nga magbusog sa mga pulong ni Jesukristo (tan-awa sa 2 Nephi 9:51; 32:3). Siya mihatag ninyo sa mga pulong nga patalinghugan gikan sa buhi nga mga propeta.
Kang kinsa kamo mosalig?
Kamo nasayud nga ang Dios mao ang inyong Amahan. Siya nahigugma kaninyo. Gusto Siya nga kamo magmalipayon. Salig Kaniya (tan-awa sa 2 Nephi 4:34; 28:31). Ipadayon ang inyong pag-focus sa Iyang balaan nga templo. Pagpakatakus sa pagdawat sa inyong mga ordinansa sa endowment ug sealing. Pagpabilin nga matinud-anon niadto nga mga pakigsaad, ug balik kanunay ngadto sa templo. Hinumdumi, ang inyong labing importante nga tumong mao ang pag-angkon sa tanang mga panalangin sa Dios, nga mao ang kinabuhing dayon (tan-awa sa D&P 14:7). Ang mga ordinansa sa templo importante niana nga panalangin (tan-awa sa D&P 131:1–3).
Modapit ko ninyo sa pagtuon sa mainampoong paagi sa pamahayag sa kasulatan sa inyong pagkatawo, katuyoan, ug mga panalangin (tan-awa sa D&P 86:8–11). Oo, kamo gayud ang batan-on nga bililhon, gilalang sa hitsura sa Dios. Kamo ang Iyang legal nga manununod, gisulayan ug gitestingan dinhi. Hinaut nga mopili kamo nga mahimong kahayag sa kalibutan, sa pagtabang sa pagluwas sa mga anak sa Dios, sa pagbaton og kalipay, ug sa katapusan makaangkon sa panalangin sa kinabuhing dayon.