Iaļ Eo Ejim̧we

Jān Elder Claudio D. Zivic

Jān Doulul eo an Jiljilimjuonn̄oul eo

Jān “Jab Bōk Iaļ eo Ebōd,” Liaona, Eprōļ 2014, 39–41.

Doctrine and Covenant ej jiron̄ kōj n̄an ron̄jake naan ko an Eo eaar kōm̧anm̧an kōj (Lale D&C 43:23).

Elōn̄ iiō ko rem̧ootļo̧k baam̧le eo aō im n̄a kar loļo̧k Arches National Park ilo Utah, USA. Juon iaan arch ko raiboojoj im bun̄bun̄ ilo baak eo ilo Delicate Arch, im kōm̧ ar pepe n̄an talōn̄e toļ eo n̄an am̧ pād ie.

Kōm̧ kar lukkuun m̧ōņōņō ke kōm̧ij jinoe, ejjab etto ro jet raar kōņaan kakkije. Iaar kōņaan bwe en m̧ōkaj aō tōpar ijo, kōn menin iaar wōnm̧aanļo̧k wōt make iaaō. Ilo aō jab lukkuun in lale iaļ eo iaar aikuj etal ie ļo̧k, iaar jino etal ippān em̧m̧aan eo eaar āinwōt ejeļā ia eo ej etal ie ļo̧k.

Iaļ eo eaar jino pen n̄an tallōn̄e. Iaar jeļā ke baam̧le eo aō eban maron̄ etal ie ļo̧k. Ejjab etto iaar loe Delicate Arch, ak kōn bwilōn̄ eo aō, ikar jab maron̄ tōpar e. Iaļ eo iaar etal ie ļo̧k ekar jab kajuļo̧k n̄an arch eo.

Iaar illu im ro̧o̧l. Ikar kijenmej im kōttar m̧ae iien eo ikar bar ioon kumi eo aō. Raar ba n̄an n̄a bwe raar ļoor kōkkaļļe ko rej kwaļo̧k iaļ eo ejim̧we im, kōn tiljek im kijejeto, rekar tōparļo̧k Delicate Arch. Ejerata, ikar etal ilo iaļ eo ebōd. Em̧m̧an katak eo ikar katak jāne!

Jab bweradikļo̧k jān iaļ eo am̧ n̄an mour indeeo ippān Jemedwōj Ilan̄. Ļoor pedped in katak ko an gospel eo im kien ko kwaar ekkatak, im kwonaaj pād ilo iaļ eo ejim̧we n̄an mour Ippān n̄an indeeo.