Jetōb eo eaar Unoojdikdik n̄an Eō
Christina Albrecht Earhart, Washington, USA
Kōmeļeļe ko jān Bradley H. Clark
“Aa, ļōm̧aroro! Ro̧o̧ltok!” juon ainikien kijoror eaar ba.
Iaar oktak im kile ruo ļaddik enan̄in ļalem im jiljilimjuon iiō rūttoer rej ettōrtok jān jikin baak an wa edānin kōm̧jaļaļ turin mejāer. Em̧m̧aan eo ej jerbal m̧ōn wia eo einepata ke eaar kūr er.
Ke iaar oktaklik n̄an wa eo waaō, Jetōb eo eaar unoojdikdik, “Kwomaron̄ jipan̄ ijin.” Unoojdikdik eo eaar mera eo eaar alikkar jidik iien tokālik ke iaar ettōrļo̧k n̄an ļaddik ro jān jikin baak an wa eo.
Iaar loe juon ļaddik erūttoļo̧k ej jutak iturin juon minivan ebūrawiin. Iaar kepaakļo̧k im bukwelōlō iturin.
“Iakwe. Eta in Christina. Em̧m̧an ke jabdewōt?”
Ke iaar kōnono, eaar lukkuun jan̄ im den̄ōt mejān kōn pein. Em̧m̧aan eo ej jerbal m̧ōn wia eo im ļaddik eo juon raar kobatok ippam̧.
“Ij ļōmņak remaron̄ kōnono wōt kajin French,” rijerbal eo eo eaar ba n̄an n̄a. “Kōm̧ ar loe er rej ettōrtok jān m̧ōn wia eo, jōbwābwe.”
Iaar bar kwaļo̧k kadkadin n̄an ajri ro ilo kajin French. French ekar kajin eo aō, ak ij jan̄in kōnono kake jān ke juon baam̧le rej kōnono kajin Pālle raar kōkkaajririk eō ke iaar juon ajri. Ilo m̧ool, kajin French eo aō enana. Ilo tōre eo, men̄e, ekar raļļo̧k ak lukkuun jejjet. Naan ko raar alikkar ilo ļōmņak eo aō im ainikiō ke iaar kaenōm̧m̧an ļaddik ro.
Ke ej jan̄ wōt, ļaddik eo erūtto em̧ōkaj an kōnono im kōmeļeļeik bwe e im ļaddik eo jatin rekar jab maron̄ loe jineer im jimāer jikin ko otemjej ilo m̧ōn wia eo im rekar ettōr namōjļo̧k n̄an pukōt er. Ke iaar ron̄jake, iaar jino kile wāween an kabwilōn̄lōn̄ aō jab maron̄ wōt kōnono ilo kajin French ak barāinwōt maron̄ meļeļe im kaenōm̧m̧an ajri ro ruo remijak.
“Raar jōbwābwe jān ro jineer im jemāer im kōņaan in kōttar er ilo wa eo waer.” Iaar jiron̄ļo̧k em̧m̧aan eo ej jerbal m̧ōn wia eo. Ļaddik eo edik eaar kwaļo̧k n̄an eō etan jinen im jemān, im iaar leļo̧k n̄an em̧m̧aan eo ej jerbal m̧ōn wia eo bwe en kōjjeļļāik er. Jet minit tokālik ļaddik eo eaar loe jemān ej diwōjtok jān m̧ōn wia eo im eaar ettōrļo̧k n̄an ippān.
Ke iaar ļoorļo̧k ļaddik eo n̄an ippān jemān, iaar loe bwe iaar jab maron̄ ba good-bye ilo kajin French. Iaar kajjieon̄ ak kar likjab in ba jabdewōt men ļaddik ro remaron̄ meļeļe, iaar jab maron̄ ba jabdewōt men eļapļo̧k jān jet eļapļo̧k jān jejjo naan ko kar ļōmņaki. Āliktata, iaar ba ilo English, ba n̄an ļaddik ro, “Bye. Ekar em̧m̧an bwe imaron̄ ioon eok.”
Ke iaar kōro̧o̧lļo̧k ļaddik ro n̄an jineer im jemāer, iaar lukkuun m̧ōņōņō. Jemedwōj Ilan̄ eaar jerbal ippa n̄an kaenōm̧m̧an ruo iaan ajri ro Nejin. Iaar ettā bwe Irooj en maron̄ kōļapļo̧k maron̄ ko aō relikjab n̄an kakūrm̧ool kōttōbar ko An. Iaar kam̧oolol n̄an kam̧ool ta eo emaron̄ waļo̧k n̄e jej leļo̧k kōj make n̄an E jej kūr Ioon, aaet ilo jekjek ko rejeja.