Kajjitōk ko im Uwaak ko
“Ekōjkan aō maron̄ aenōm̧man n̄an kōnono n̄an bisop eo aō kōn unin kōnono ko ak n̄ūrbōktak ko?”
Komaron̄ mijak in kōnono ippān bisop eo am̧ kōn men ko rej kapan̄ eok, im menin ekkā an waļo̧k. Ekkā ad mijak m̧okta jen ad ioon jet men rōkāāl ak m̧okta jen ad kōnono ippān juon rūtto.
Ak bisop eo am̧ ej kūr jān Anij. Kar kūri kōnke ej juon rikaļoran Jisōs Kraist eo ej ujlep e ļo̧k. Enaaj kōmaat an maron̄ bwe en jouj im meļeļe. Kōttōbar eo An ej n̄an jiban̄ eok itok n̄an Rilo̧mo̧o̧r im kwonaj maron̄ lo aenōm̧m̧an. M̧oktata, komaron̄ en̄jake am̧ jook in kōnono ippān kōn kajjitōk ko am̧ ak jerawiwi ko, ak eban dikļo̧k an ļōmņak kake eok. Ilo m̧ool, enaaj m̧ōņōņō bwe ewōr am̧ ikdeleel n̄an kōkōm̧anm̧anļo̧k. Im enaaj an wōt kōnono ko amiro.
Kwojjab aikuj make kake eddo ko am̧. Bisop eo am̧ emaron̄ jipan̄ eok pukōt uwaak n̄an kajjitōk ko am̧ im, eļan̄n̄e em̧enin aikuj, jipan̄ eok n̄an ukweļo̧k im anemkwōj, kōn Pinmuur eo an Jisōs Kraist, en̄jake ajļo̧k in bōd, ekalulu, ak ejjab erreo.
Ilo am̧ kōnono ippān bisop eo am̧, kwonaj en̄jake iakwe eo an n̄an eok. Men̄e ej eddo kake aolepān ward ak branch eo, men eo ej lukkuun kalimjōke ej ājmour eo an likao im jiron̄ ro. Kwōj jab kapōnōnōiki ilo am̧ kajjitōk jipan̄.
Komaron̄ jar n̄an Jemedwōj Ilan̄ kōn kajoor im peran n̄an kōnono ippān bisop eo ej eo am̧. E ekar kōmālim bisop eo am̧ n̄an jipan̄ eok im bisop kōņaan in kōm̧m̧ane. Eļan̄n̄e kwoj etal kōn juon bōro epojak im ikideleel bwe en em̧m̧anļo̧k, kwonaaj lo bwe ilo am̧ diwōjļo̧k jān opiij eo an enaaj em̧m̧anļo̧k am̧ en̄jake jān kar m̧okta.
E Ej Jāmin Dik an Ļōmņak kōn Eok
Bisop eo ilo ward eo am̧ ej kabwijer mālim eo n̄an tōl eo ilo bun̄tōn ko an ukweļo̧k. Jet iien oktakļo̧k n̄an bisop eo ej ial eo de eo n̄an lukkuun ukweļo̧k ippān Rilo̧mo̧o̧r eo. Eļan̄n̄e ij aikuj kōnono ippān bisop eo aō, ej jipan̄ eō loe Rilo̧mo̧o̧r eo im meļo̧kļo̧k kineej eo emwiļaļ me ej kab waļo̧k tok n̄an eō. Bisop eo am̧ ekōņaan jipan̄ eok. Kūr eo an ej n̄an kōjparok eok, im e ej jāmin dik an ļōmņak kōn eok kōnke loļo̧k e ej men eo kwōj aikuji.
Madison D., 18 iiō, Utah, USA
Bisop Eo Am Ej Mōnōnō in Jipan̄
Ij kijon̄ en̄jake jab aenōm̧m̧an ilo intōrpiu ko, ak ekkā aō kile bwe bisop eo aō ekar aolep iien m̧ōņōņō in jipan̄ ņamejļan inepata ko aō. Lōke bisop eo am̧; e ej juon rilale sip im ward eo ej sip ko nejin.
Jaime R., iiō 19 Cochabamba, Bolivia
E Ej Jāmin Kaarmejete Lōke eo Am̧
Kiiō ijeļā bwe juon bisop ej armej eo lōke tata juon rūm̧m̧an ded emaron̄ in pukōt jipan̄ jān e. Ej ej jāmin kaarmejete lōke eo am̧—aolep men kwōj ba n̄ane rej an wōt opiij eo an. Jet iien eļap an pen kwaļo̧k apan̄ ko am̧, ak jelm̧ae ro jet im kōnono ippān juon eo kwōj iakwe im kea kake im kōņaan men eo em̧m̧an tata n̄an kwe enaaj kanooj pidodoļo̧k.
Nicole S., iiō 18 dettan, Idaho, USA
Komaron̄ Kōjatdikdik Kake
Bisop eo am̧ ak branch būreejtōn eo ej juon rikarejar an Irooj. Komaron̄ kōjatdikdik kake kōn tōl ilo am̧ pukōt im̧we jān Jetōb Kwojarjar im jeje ko rekwojarjar. Kwōj aikuj meļeļe bwe bisop eo ej pād ijeņ n̄an jipan̄ im bwe ej tōl jān Anij.
Stanislav R., iiō 19 Donestsk, Ukraine
Keememej Bwe Ej Iakwe Eok
Eļan̄n̄e elōn̄ men en kwokōņaan kōnono kake ippān bisop eo, emaron̄ pidodo n̄an jijet ippān kōn jikuuļ ak men ko jet m̧okta. Eļan̄n̄e kwoj mijak kōnke kwoj aikuj kōnono ippān kōn ukweļo̧k, keememej bwe e ej iakwe eok. Kwoj jab aikuj mijak kōn ta eo enaaj ļōmņake kōn eok, kōnke etke enaaj kajejtokjem̧ ke ekōņaan bwe kwon epaakeļo̧k Kraist?
Ashley D., iiō 17, Arizona, USA
Jar n̄an Jeļā
Kajitōk ippām make etke kwōj abōņōņō in kōnono n̄an bisop eo. Kwōj ke ļōmņak e ej jāmin jipan̄ ņamejļan inepata ko am̧? Jar n̄an jeļā bwe bisop eo ej iakwe eok im ekar kūr n̄an jipan̄ eok.
Adam H., 13 iiō dettan, California, USA
Jekdo̧o̧n N̄e Kwoj Kōm̧m̧ane Juon Bōd
Emaron̄ pen im kajookok n̄an kwaļo̧k men ko n̄an bisop eo am̧, ak ilo am̧ diwōjļo̧k jān opiij eo, kwonaaj en̄jake am̧ mour, im kwonaaj jeļā bwe Jemedwōj Ilan̄ ej iakwe eok. Ekōņaan bwe kwōn m̧ōņōņō, men̄e kwōj kōm̧m̧an bōd.
Amenda W., 16 iiō, Utah, USA
Ej Pād Ijin n̄an Jipan̄
Bisop eo ej rilale sip eo an ward eo. Keememej bwe enaaj kōm̧aat an maron̄ n̄an jipan̄ eok im e bōk kajoor an Anij. Eļan̄n̄e kwoj en̄jake mijak, kwomaron̄ jar kōn kajoor n̄an maron̄ kōnono ippān bisop eo am̧. Ilo jem̧ļo̧kin, kwonaaj m̧ōņōņō bwe kwaar etal ippān—im enaaj wōrtokjān.
Samuel H., iiō 14 dettan, Idaho, USA