Tahua itenati no te ohiparaa

Eaha ta te feia mo‘a i te mau mahana hopea nei e rave nei no te haamaitai i te vahi ta ratou e ora ra ? A imi na roto i te haereraa i ni‘a i te MormonNewsroom.org. Teie te tahi mau hi‘oraa no ni‘a i te mau mea tei tuuhia i ni‘a i te tahua itenati o te parau apî.

Niuterani e Vanuatu

I te ta‘iriraa te mata‘i rorofa‘i Pam i te motu iti na‘ina‘i o Vanuatu, ua haere atu te feia mo‘a no te mau mahana hopea nei no Niuterani—e te tauturu no roto mai i te Faanahoraa Tauturu a te Ekalesia—no te tauturu i te feia tei ta‘irihia e te vero. Ua faaî ratou e 2 000 afata i te maa no te tauturu i te rahiraa o te huiraatira e ti‘a ia tauturuhia. Ua faaîhia te mau afata auri i te faraoa ota, te raiti, te punu maa hotu, te pipi, te punu puatoro, te i‘a, te faraoa paapaa, te vine, te û totora puehu, e hoê tapu punu. E nehenehe atoa e faaohipa i te mau afata auri no te tahi atu mau ohipa, mai te faautaraa i te pape.

Te Repupirita Dominika e Tanata

I roto i te Repupirita Dominika e TanaTa, ua putuputu te mau tuahine feia mo‘a i te mau mahana hopea nei no te faahanahana i te mahana o te mau vahine, e ohipa teie i paturuhia e te Hau Amui. Hau i te 1 200 vahine tei tairuru i roto i te mau fare pureraa a te Ekalesia i te mau vahi e rave rahi no te Repupirita Dominika no te faahanahana i te mau vahine no ta ratou mau tauturu e rave rahi i roto i te ao nei. Ua amui atoa atu te mau ti‘a faatere faaroo, tivira e no te nuu faehau i roto i te reira ohipa, e ua faaterehia te mau himene e te mau a‘oraa. I Tanata, ua haamana‘o atoa te mau vahine feia mo‘a i te mau mahana hopea nei i te reira mahana na roto i te faaiteraa i te haamaramaramaraa no ni‘a i te Sotaiete Tauturu, ma te parau e, « ua riro ïa ei rave‘a faahiahia no te ohipa taviniraa na te ao atoa nei ».

Peretane

Ta ratou opuaraa matamua, o te niraraa ïa 100 ahu no te mau tamarii veve no Afirita, tera râ ia hope te niraraa, ua hamani te mau vahine no te paroisa no Coventry i Peretane hau i te 230 ahu. E mea ohie roa ia hamani i te mau ahu i te vehi turua. Ua ti‘a i te hoê tuahine aitâ i nira a‘e nei ia hamani e 3 ahu.

Arkansas, HAM

Hau i te 600 taata tei tairuru i roto i te hoê pureraa pae auahi amui na te mau faaroo i ni‘a i te tumu parau no te tiamaraa pae faaroo, tei faaterehia e te tĭtĭ no Little Rock Arkansas, ua tae atoa mai te mau ti‘a no te Karorika, Metoti, e no te mau pŭpŭ Mahometa e te hoê taata paraparau no te ratio. I roto i te reira rururaa, ua patahia te hoê video no te parau poro‘i na te tavana o te reira tuhaa, e te pure hopea, na te hoê toofa, no te faaroo Bapetizo raua toopiti. Te parau ra te feia tei faatupu i teie ohipa e, ua patu teie ohipa i « te mau araturu o te iteraa ».